Terus ngagai penerang

Terus ngagai Ripih Isi

 ARTIKEL DIPELAJAR 23

“Anang Nejuka Orang Nipu Kita”!

“Anang Nejuka Orang Nipu Kita”!

“Anang nejuka orang nipu kita ngena penemu enggau kelakar ti nadai reti, ti datai ari ajar mensia.”—KOL. 2:8.

LAGU 96 Bup ari Petara—Reta ti Berega

DALAM ARTIKEL TU *

1. Nitihka Kolosi 2:4, 8, baka ni Sitan nguji ngubah chara kitai berunding?

SITAN deka kitai badu rinduka Jehovah. Nya alai, iya nguji ngubah chara kitai berunding lalu ngasuh kitai berunding baka iya. Iya nguji ngasuh kitai arap tauka nipu kitai ngambika deka nitihka iya.—Bacha Kolosi 2:4, 8.

2-3. (a) Nama kebuah kitai patut beratika jaku tangkan ke bisi ba Kolosi 2:8? (b) Nama deka dikerandauka kitai ba artikel tu?

2 Kati Sitan amat deka ngelimpangka kitai ari Jehovah? Au, amat! Kingatka, jaku tangkan ke ditulis Paul ba Kolosi 2:8 ukai dituju ngagai orang ke enda arapka Jehovah. Nya dituju ngagai bala menyadi Kristian ti dipilih ke serega. (Kol. 1:2, 5) Sida kala napi penusah ke tau ngujungka sida limpang ari pengarap. Kitai mega napi penusah ti sama baka sida. Lalu penusah ke ditapi kitai balat agi ari enggi sida. (1 Kor. 10:12) Nama kebuah? Sitan udah dibuai ke dunya, lalu iya bebendar deka nipu nembiak Petara ke taluk. (Pem. 12:9, 12, 17) Nambahka nya, kitai benung idup ba maya ke alai orang ke jai enggau orang ke pura-pura ngapa, deka “majak jai se-jai.”—2 Tim. 3:1, 13.

3 Ba artikel tu, kitai deka berandauka baka ni Sitan ngena “kelakar ti nadai reti” nguji ngubah chara kitai berunding. Kitai deka nemu tiga iti akal ti jai ke dikena Sitan. (Eps. 6:11) Ba artikel ke nangkanka tu, kitai deka beratika baka ni kitai ulih mutarka ulah tauka runding kitai ke udah dilimpangka akal Sitan ti jai. Keterubah, aram kitai berandauka baka ni Sitan nesatka orang Israel pengudah sida tama ngagai Menua ti Udah Disemaya, lalu beratika utai ke ulih dipelajarka kitai.

 SITAN MANJUK ORANG ISRAEL NYEMBAH ENGKERAMBA

4-6. Nitihka Ulang Adat 11:10-15, nama chara betanam ti baru ke patut dipelajarka orang Israel lebuh sida diau ba Menua ti Udah Disemaya?

4 Sitan enggau landik manjuk orang Israel nyembah engkeramba. Baka ni iya ngereja nya? Iya nemu sida begunaka pemakai. Nya alai, iya nguji ngena chara tu ngambika sida ngereja peneka iya. Pengudah orang Israel tama ngagai Menua ti Udah Disemaya, sida patut belajarka chara ti baru kena betanam. Lebuh orang Israel ba menua Ejip, sida ngena ai ari Sungai Nil kena betanam. Taja pia, ba Menua ti Udah Disemaya nya nadai sungai ti besai. Nya alai, sida begunaka ai ujan enggau ambun kena betanam. (Bacha Ulang Adat 11:10-15; Isa. 18:4, 5) Ketegal tu, orang Israel patut belajarka chara betanam ti baru. Tu enda senang ba sida laban mayuh ari sida ke bisi peneleba betanam udah mati ba menua puang.

Baka ni Sitan ngubah runding orang Israel ke betanam? (Peda genteran 4-6) *

5 Jehovah madahka pengidup nembiak Iya deka berubah. Lalu, Iya meri sida jaku tangkan ke baka nadai kaul enggau pengawa betanam: ‘Anang nejuka diri dibai orang limpang ari Jehovah lalu besembah sereta betuaika petara bukai.’ (U-dat. 11:16, 17) Nama kebuah Jehovah nangkan sida pasal besembahka petara pelesu taja pan Iya benung bejaku pasal chara betanam ti baru?

6 Jehovah nemu orang Israel deka belajarka sekeda chara betanam ari orang kapir ke diau ngelingi sida. Endang amat, orang kapir nya nemu mayuh agi pasal chara betanam ba endur nya. Tang, orang Israel mega engka deka dikelimpangka ari Jehovah. Orang Kanaan ke betanam nya nyembah Baal lalu chara sida berunding nitihka pengarap sida empu. Sida pechaya Baal  ke bempu langit sereta meri ujan. Jehovah enggai nembiak Iya dikemulaka penemu ti enda betul nya. Taja pia, orang Israel enda ngetu-ngetu milih nyembah Baal. (P-pau. 25:3, 5; P-ulu. 2:13; 1 Raj. 18:18) Peratika baka ni Sitan manjuk orang Israel.

TIGA CHARA KE DIKENA SITAN MANJUK ORANG ISRAEL

7. Baka ni pengarap orang Israel diuji pengudah sida tama ngagai Menua ti Udah Disemaya?

7 Chara keterubah ke dikena Sitan iya nya, ngena pengingin biasa ke utai ti diguna ba pengidup. Orang Israel deka ujan nurun ba endur alai sida betanam. Tang, ninting taun semina bisi mimit aja ujan ke nurun ba Menua ti Udah Disemaya ari ujung bulan April nyentuk ngagai bulan September. Kena beridup, utai ke ditanam orang Israel patut mayuh. Lalu tu bepanggai ba ujan ke suah agi nurun maya bulan Oktober. Sitan nipu orang Israel. Iya ngasuh sida pechaya sida patut nitihka adat orang kapir ke diau ngelingi sida. Orang kapir pechaya petara sida deka ngenataika ujan enti sida ngereja sekeda pengawa ke bekaul enggau sembah sida. Orang Israel ke enda tentu arapka Jehovah pechayaka penemu nya, kena nyeliahka kemarau. Nya alai, sida ngereja pengawa ke digaga orang kapir kena nunjukka basa ngagai Baal.

8. Nama chara kedua ke dikena Sitan? Terangka.

8 Chara kedua ke dikena Sitan iya nya, manjuk orang Israel ngambika ngereja ulah seks ti kamah. Orang kapir ngereja ulah ti kamah lebuh nyembah petara sida. Ulah kamah ke baka tu nyengkaum lelaki sereta indu ke nyundal ba rumah sembiang sida. Homoseksual enggau ulah seks bukai ti kamah ukai semina dikemendarka tang nyadi pengawa ti biasa dikereja! (U-dat. 23:17, 18; 1 Raj. 14:24) Orang kapir nya pechaya, pengawa ke baka tu deka meransang petara sida ngaga tanah ke alai sida betanam nyadi ami agi. Mayuh orang Israel ngembuan pengingin ngagai pengawa ti kamah tu. Lalu sida ngelakka diri dipanjuk ngambika nyembah petara pelesu. Ke amat iya, Sitan benung manjuk sida.

9. Nitihka Hosia 2:16, 17, baka ni Sitan ngasuh orang Israel enda tentu nemu sapa Jehovah nya?

9 Chara ketiga ke dikena Sitan iya nya, iya ngasuh orang Israel enda tentu nemu sapa Jehovah nya kebendar iya. Maya jeman nabi Jeremiah, Jehovah madahka nabi pelesu deka ngasuh nembiak Iya enda ingatka nama Iya ketegal “nitihka Baal.” (Jer. 23:27) Nembiak Petara badu ngena nama Jehovah lalu nganti nama Iya enggau nama Baal, ke mai reti “Tuan” tauka “Laki.” Tu ngasuh orang Israel tusah deka nemu bida entara Jehovah enggau Baal. Ketegal nya, sida senang nyampurka sembah ngagai Baal enggau sembah ngagai Jehovah.—Bacha Hosia 2:16, 17 enggau nota kaki.

CHARA KE DIKENA SITAN KEMAYAHARITU

10. Nama sekeda chara ke dikena Sitan manjuk orang kemayaharitu?

10 Sitan ngena chara ti sama kemayaharitu. Iya manjuk orang ngena pengingin biasa ke utai ti diguna ba pengidup. Iya mega manjuk orang ngambika ngereja ulah seks ti kamah, sereta ngasuh orang enda tentu nemu sapa Jehovah nya kebendar iya. Aram kitai beratika chara ke penudi nya dulu.

11. Baka ni Sitan udah ngasuh orang enda tentu nemu sapa Jehovah nya kebendar iya?

11 Sitan ngasuh orang enda tentu nemu sapa Jehovah nya kebendar iya. Pengudah pemati bala rasul Jesus, sekeda orang ke  limpang ari Jehovah berengkah ngajar utai ti bula. (SKR. 20:29, 30; 2 Tes. 2:3) Sida berengkah ngasuh orang enda tentu nemu sapa Jehovah nya kebendar iya. Ambika chunto, sida badu ngena nama Jehovah ba Bup Kudus, lalu nganti nama nya ngena “TUHAN,” “Tuhan” tauka gelar ke bukai. Enggau ngereja nya, sida ngasuh orang ke macha Bup Kudus tusah deka nemu Jehovah nya enda sebaka enggau “tuhan” bukai ke disebut dalam Bup Kudus. (1 Kor. 8:5) Sida ngumbai Jehovah enggau Jesus nya “Tuhan.” Tu ngasuh orang tusah deka nemu seduai iya enda sama. (Jhn. 17:3) Penemu ti ngasuh orang saru tu ngujungka ajar pasal Triniti nyau bisi, taja pan ajar nya nadai ba Bup Kudus. Ketegal tu, mayuh orang ngumbai Petara nya tusah deka dikelala. Tu pemula ti jai amat!—SKR. 17:27.

Baka ni Sitan ngena pengarap pelesu manjuk orang ngambika ngereja ulah seks ti kamah? (Peda genteran 12) *

12. Nitihka Rome 1:28-31, nama pengawa ti dikemansangka pengarap pelesu? Lalu nama penyadi ketegal nya?

12 Sitan manjuk orang ngambika ngereja ulah seks ti kamah. Maya jeman orang Israel kelia, Sitan ngena pengarap pelesu ngemansangka ulah ti kamah. Iya mega ngereja utai ti sama kemayaharitu. Pengarap pelesu ngemendarka ulah ti kamah lalu nguji ngaga ulah nya baka ke ulih diterima. Ketegal tu, mayuh orang ke ngumbai diri nyembah Petara, udah badu nitihka standard moral Iya. Rasul Paul nulis ngagai orang Rome pasal penusah ke nyadi ketegal pengarap pelesu ti ngemansangka ulah seks ti kamah. (Bacha Rome 1:28-31.) “Utai ti enda patut dikereja” nya semua bansa ulah seks ti kamah ke nyengkaum homoseksual. (Rom. 1:24-27, 32; Pem. 2:20) Endang beguna bendar kitai nitihka ajar Bup Kudus!

13. Nama chara bukai ke dikena Sitan manjuk mensia?

13 Sitan ngena pengingin biasa ke utai ti diguna ba pengidup. Semua kitai endang ngembuan pengingin deka belajarka pengelandik ti ulih nulung kitai nyediaka utai ti diguna diri empu enggau diri sebilik. (1 Tim. 5:8) Kesuah nya, kitai tau ngulihka pengelandik nya lebuh kitai ngagai sekula sereta bagas belajar. Tang, kitai enda tau enda bejimat. Ba mayuh menua, kelimpah ari belajarka pengelandik ti beguna ba sekula, bala nembiak mega belajarka penemu ari  dunya tu. Ambika chunto, sekula meransang bala nembiak kakang sekalika Petara nya bisi tauka nadai. Sekula mega madahka, Bup Kudus tau enda ibuh dipebasa. Kelimpah ari nya, bala nembiak diajar pasal pengidup ke bepun ari evolusi. Lalu sekula madahka orang ke pintar endang pechayaka pekara tu. (Rom. 1:21-23) Ajar ke baka tu ngelaban penemu-dalam Jehovah.—1 Kor. 1:19-21; 3:18-20.

14. Nama utai ti dikemansangka penemu-dalam mensia?

14 Penemu-dalam mensia enda bedulika tauka ngelaban standard Jehovah. Penemu nya enda ngemansangka buah roh kudus Petara. Penemu nya ngemansangka “utai ti dikereja mensia,” iya nya pengingin ti bedosa. (Gal. 5:19-23) Penemu-dalam mensia meransang orang nyadi sumbung sereta temegahka diri. Tu ngujungka orang “berundingka diri empu aja.” (2 Tim. 3:2-4) Ulah tu belaban enggau ulah baruh ati ti dikedekaka Petara kembuan nembiak Iya. (2 Sam. 22:28) Sekeda orang Kristian ke belajar ba universiti nyau berengkah nerima penemu dunya, ukai nerima penemu ari Petara. Aram kitai beratika siti chunto ke nunjukka nama penyadi enti kitai enda bedulika panjuk ari Sitan tu.

Baka ni runding kitai ulih dirusakka penemu-dalam mensia? (Peda genteran 14-16) *

15-16. Nama ulih dipelajarka nuan ari cherita seiku menyadi Kristian indu kitai?

15 Seiku menyadi Kristian indu ke udah 15 taun gawa penuh jam ke Jehovah madahka: “Aku udah dibaptisa. Aku kala macha sereta ninga pasal penanggul ke ulih nyadi enti sema nyambung pelajar ngagai universiti. Tang aku enda betatika utai tu. Aku ngumbai jaku lalau nya ukai dituju ngagai aku.”  Nama penanggul ke ditapi iya? Ku iya madah: “Belajarka kus ke diambi aku begunaka mayuh jam enggau pengering nyentukka aku nadai tentu bisi awak besampi ngagai Jehovah baka selama. Lalu aku pan kelalu lelak deka berandau pasal Bup Kudus lebuh enggau pengawa nginjil, sereta berasai lembau amat deka nyediaka utai ke dikena begempuru. Tang manah amat, pengudah aku sedar pengawa kelalu ngemeratka pelajar tinggi nyau ngerusak kaul aku enggau Jehovah, aku pan nyeliahka nya.”

16 Baka ni pelajar tinggi ngubah chara menyadi Kristian indu nya berunding? Ku iya nyaut: “Belajar ba universiti ngujungka aku betatika penyalah orang bukai, kelebih agi penyalah bala menyadi Kristian kitai. Aku mega kelalu ngarapka sida ngereja utai lebih ari ke patut, sereta ngenyauhka diri ari sida. Nyau kelama baru aku ulih badu berunding baka tu. Utai ke ditapi aku nunjukka, penusah tau nyadi enti sema kitai enda bedulika jaku tangkan ke diberi Apai kitai ti di serega nengah gerempung Iya. Jehovah ngelala aku lebih agi ari aku empu. Aku patut mendingka Iya ari suba!”

17. (a) Nama utai ke enda patut ditejuka kitai? (b) Nama deka dikerandauka kitai ba artikel pengudah tu?

17 Kitai patut enggau naka ulih nentuka diri enda nejuka “penemu enggau kelakar ti nadai reti” ari dunya Sitan bekuasa atas kitai. Mengkang bejimat enggau chara ke dikena Sitan manjuk kitai. (1 Kor. 3:18; 2 Kor. 2:11) Anang sekali-kali ngelakka Sitan ngasuh nuan enda tentu nemu sapa Jehovah nya kebendar iya. Titihka standard moral Jehovah ti tinggi. Lalu anang nejuka Sitan nipu nuan ngambika enda bedulika jaku ajar ari Jehovah. Tang nama patut digaga nuan enti sema nuan nyau ngasaika diri udah nitihka runding dunya tu? Artikel ke nangkanka tu deka nunjukka baka ni jaku Petara ba Bup Kudus ulih nulung nuan mutarka runding enggau ulah ke udah nyadi sebagi ari pengidup nuan.—2 Kor. 10:4, 5.

LAGU 49 Ngelantangka Ati Jehovah

^ per. 5 Sitan landik nipu orang. Iya udah nipu mayuh orang ngambika sida ngumbai diri bibas, tang kebendar iya, sida di baruh kuasa iya. Artikel tu deka mansik sekeda chara ke dikena Sitan nipu orang.

^ per. 48 PENERANG PASAL GAMBAR: Orang Israel ke begulai enggau orang Kanaan benung dipanjuk ngambika nyembah Baal sereta ngereja ulah seks ti kamah.

^ per. 51 PENERANG PASAL GAMBAR: Chura ba papan iklan ari sebuah gerija nunjukka gerija nya ngemendarka pengawa homoseksual.

^ per. 53 PENERANG PASAL GAMBAR: Seiku menyadi Kristian indu ke biak belajar ba universiti. Iya enggau sida sekelas nerima penemu ari profesor sida ke madahka penemu sains enggau teknologi ulih mutarka semua penanggul mensia. Udah nya, lebuh ba Palan Gempuru, menyadi Kristian indu nya enda tentu rindu enggau utai ti dikerandau lalu ngiga penyalah bala menyadi Kristian.