Terus ngagai penerang

Terus ngagai Ripih Isi

 ARTIKEL DIPELAJAR 30

Chara Nyapai Ati Sida ke Nadai Pengarap

Chara Nyapai Ati Sida ke Nadai Pengarap

“Aku udah nyadi semua macham utai ke semua mensia, ngambika aku, ngena sebarang chara, ulih nyelamatka sekeda sida.”—1 KOR. 9:22.

LAGU 82 “Awakka Penampak Kita Manchar”

DALAM ARTIKEL TU *

1. Nama ubah ke udah nyadi ba sekeda menua?

BERIBU taun kelia, mayuh orang ba dunya ngembuan pengarap. Taja pia, bepuluh taun ti udah, siti ubah ti besai udah nyadi. Majak mayuh orang ngumbai diri enda pechayaka Petara. Nambahka nya, ba sekeda menua, mayuh orang ngumbai diri nadai pengarap. *Mat. 24:12.

2. Nama sekeda kebuah ke ngasuh orang ngumbai diri nadai pengarap?

2 Nama kebuah majak mayuh orang ngumbai diri nadai pengarap? * Sekeda engka kelalu betatika pengelantang diri tauka penanggul ke ditapi sida. (Luk. 8:14) Sekeda nya kala bisi pengarap tang udah nya nyau enda pechayaka Petara agi. Bisi nya pechayaka Petara tang ngumbai jalai pengarap enda ulih dikena, enda sejalai enggau penemu sains, sereta enda betul. Sida engka ninga jaku bala bakih, pengajar, tauka orang ke tebilang ba media madahka pengidup bepun ari evolusi. Tang sida jarang ninga kebuah patut pechayaka Petara. Sekeda ke bukai begedika bala tuai pengarap ke gila duit sereta kuasa. Ba sekeda endur, bala pemerintah ngaga atur ke nyekat pengawa ti bekaul enggau pengarap.

3. Nama tuju artikel tu?

3 Jesus ngasuh kitai: ‘Bejalai kita ngagai semua bansa lalu gaga sida nyadi murid aku.’ (Mat. 28:19) Baka ni kitai ulih nulung sida ke nadai pengarap rinduka Petara sereta nyadi murid Kristus? Kitai patut nemu chara sida nerima pesan ari Bup Kudus bepanggai ba endur alai sida dibesaika. Ambika chunto,  sida ke datai ari menua Eropah enda sama enggau sida ke datai ari menua Asia. Nama kebuah? Ba Eropah, mayuh orang nemu sekeda utai pasal Bup Kudus lalu udah teleba enggau penemu ke madahka Petara nempa semua utai. Tang, ba Asia mayuh orang enda tentu nemu pasal Bup Kudus. Lalu ba sekeda menua di Asia, mayuh orang indah enda pechayaka Petara nempa semua utai. Tuju artikel tu iya nya kena nulung kitai nyapai ati sida ke ditemu kitai lebuh nginjil, enda ngira ari ni penatai sida tauka utai ke dipechayaka sida.

MENGKANG NGEMBUAN RUNDING TI POSITIF

4. Nama kebuah kitai ulih ngembuan runding ti positif?

4 Ngembuan Runding ti Positif. Ninting taun, bisi orang ke nadai pengarap nyadi Saksi-Saksi Jehovah. Mayuh ari sida endang udah ngembuan standard moral ti tinggi. Lalu sida begedika jalai pengarap ti pura-pura ngapa. Bisi nya ngembuan standard moral ti baruh. Lalu mayuh ari sida ngembuan tebiat ti enda manah ke patut dilengkaka sida. Enggau tulung ari Jehovah, kitai pechaya kitai ulih tetemuka “sida ke bisi pengingin deka bulih pengidup ti meruan belama iya.”—SKR. 13:48, NW; 1 Tim. 2:3, 4.

Ngubah chara nuan bejaku lebuh nginjil ngagai orang ke enda pechayaka Bup Kudus (Peda genteran 5-6) *

5. Nama ke suah ngasuh orang rinduka pesan ke dibai kitai?

5 Ayanka Penelap sereta Nemu Berunding. Kesuah nya, orang deka ninga pesan ke dibai kitai, ukai ketegal utai ke disebut kitai tang ketegal chara kitai nyebut iya. Sida rindu lebuh kitai ngayanka penelap, berundingka sida, lalu nunjukka diri ibuhka sida. Kitai enda ngansak sida ningaka pekara ti disebut kitai. Tang, kitai nguji meretika runding sida pasal pengarap. Ambika chunto, kitai nemu sekeda orang enda rindu bejaku pasal pengarap enggau orang ti enda dikelala. Sekeda ngumbai orang nya nadai ngayanka basa enti betanyaka runding sida pasal Petara. Bisi mega berasai malu lebuh orang meda sida macha Bup Kudus, kelebih agi enggau Saksi-Saksi Jehovah. Enda ngira kebuah iya, kitai nguji deka meretika asai ati sida.—2 Tim. 2:24.

6. (a) Baka ni rasul Paul nunjukka diri nemu berunding lebuh bejaku enggau orang? (b) Baka ni kitai ulih neladan iya?

6 Nama ulih digaga enti kitai ngasaika sida enda tentu nyamai ati lebuh kitai ngena leka jaku baka “Bup Kudus,” “utai ti ditempa Petara,” “Petara,” tauka “pengarap”? Kitai ulih neladan rasul Paul lalu ngubah chara kitai bejaku. Lebuh bejaku enggau orang Judah, Paul ngena ayat Bup Kudus. Tang, lebuh bejaku enggau orang ke bepenemu ari bansa Gerika ba Areopagus, iya enda madahka diri benung bejaku ngena ayat Bup Kudus. (SKR. 17:2, 3, 22-31) Baka ni kitai ulih neladan Paul? Enti kitai betemu enggau orang ke enda pechayaka Bup Kudus, engka manah agi enti kitai enda madahka diri benung ngena ayat Bup Kudus lebuh berandau enggau iya. Enti nuan beratika iya enda tentu berasai nyamai lebuh dipeda macha Bup Kudus enggau nuan, uji mandangka ayat Bup Kudus nya ngena chara bukai baka ngena perengka elektronik.

7. Nama patut digaga kitai kena neladan Paul baka ke dipadah ba 1 Korint 9:20-23?

7 Uji Mereti sereta Mending. Kitai patut nguji meretika kebuah orang ke ditemu kitai berunding tauka ngembuan asai ati ke baka nya. (J-lam. 20:5) Peratika chunto Paul baru. Iya dibesaika enggau orang Judah. Tang iya patut ngubah chara iya nginjil ngagai orang ke ukai bansa Judah laban sida nemu mimit tauka enda nemu nama-nama pasal Jehovah enggau ayat Bup Kudus. Kitai engka patut ngaga pansik ba litaricha kitai, lalu betanya ngagai sida ke udah lama nginjil ngambika kitai ulih mereti agi ke asai ati enggau runding orang ba kandang endur kitai nginjil.—Bacha 1 Korint 9:20-23.

8. Nama siti chara kitai ulih ngepunka randau enggau orang pasal Bup Kudus?

 8 Juluk ati kitai iya nya, ngiga orang ke deka nerima pemendar ari Bup Kudus. (Mat. 10:11) Kena ngereja tu, kitai patut nanya runding orang lalu udah nya mendingka sida. Seiku menyadi ba England nanya penemu orang pasal chara ngulihka pengelantang ba tikah, chara ngemesaika anak, tauka chara mutarka pengawa ti enda lurus. Pengudah ningaka saut sida, ku iya nanya, “Nama runding nuan pasal jaku lalau tu ke udah ditulis 2,000 taun suba?” Udah nya, iya ngena talipaun binching mandangka sekeda ayat ke udah dipilih tang iya enda madahka ayat nya ari Bup Kudus.

NYAPAI ATI ORANG

9. Nama siti chara kitai ulih nulung sida ke nyeliah ari bejaku pasal Petara?

9 Kitai ulih nyapai ati orang ke selalu nyeliah ari bejaku pasal Petara lebuh berandauka utai ti ditemu sida. Ambika chunto, mayuh orang alit ati enggau utai ke bisi ba dunya enggau langit. Nya alai, kitai ulih nyebut baka tu: “Nuan engka nemu mayuh utai ti digaga bala saintis nya datai ari pengawa sida ke niru utai ke udah bisi ba dunya. Ambika chunto, orang ke ngaga mikrofon belajar pasal pending jelu lalu orang ke ngaga kamera belajar pasal mata jelu. Nama runding nuan lebuh mikirka pasal utai tu? Kati nuan ngumbai utai nya bisi kediri empu, digaga orang, tauka utai bukai?” Pengudah mendingka saut sida, nuan ulih nyebut: “Lebuh injinir belajar ari gaya pending enggau mata, kitai engka berunding ari sapa sida belajarka utai nya. Aku alit ati enggau utai ke disebut seiku orang kelia menya: ‘Pending kitai deh digaga Iya, kati Iya enda ulih ninga? Lalu mata kitai ditempa Iya, kati Iya enda ulih meda? . . . Iya nyadi pengajar ke semua kitai.’ Sekeda bala saintis setuju enggau jaku tu lalu pechaya semua utai ditempa.” (Mas. 94:9, 10) Kitai ulih ngayanka siti video ari jw.org® ba begian “Temu Ramah dan Pengalaman” ba “Pandangan tentang Asal Usul Kehidupan” dalam jaku Melayu. (Peda ba BAHAN TERBITAN > VIDEO.) Tauka kitai ulih meri sida brosur Adakah Kehidupan Diciptakan? dalam jaku Melayu.

10. Nama chara bukai ke ulih dikena kitai ngepunka randau enggau orang ke enggai berandau pasal Petara?

10 Nyauka semua orang keran deka ngembuan pengidup ti lantang agi dudi hari. Taja pia, mayuh ari sida irau dunya tu deka rusak tauka enda ulih nyadi endur alai diau agi. Seiku tuai ti ngabas ba menua Norway madahka, orang ke enggai berandau pasal Petara kesuah agi deka berandau pasal utai ke nyadi ba dunya. Pengudah meri jaku tabi ngagai sida, ku iya nanya:  “Kati dunya kemayaharitu tau nyadi manah dudi hari ila? Kati kitai ulih arapka bala politik, bala saintis tauka orang bukai?” Pengudah ninga saut ari sida, iya macha tauka ngelansa ayat Bup Kudus ke nyebut pasal utai manah ke deka nyadi jemah ila. Sekeda orang alit ati enggau semaya ari Bup Kudus ke madahka dunya deka mengkang bisi lalu orang ke manah deka diau dia belama iya.—Mas. 37:29; P-jar. 1:4.

11. Nama kebuah kitai patut ngena mayuh macham chara lebuh berandau enggau orang ke ditemu kitai? Baka ni kitai ulih neladan Paul baka ke dipadah ba Rome 1:14-16?

11 Kitai patut ngena mayuh macham chara lebuh berandau enggau orang ke ditemu kitai. Nama kebuah? Laban genap iku sida enda sama. Sekeda topik ngerinduka ati orang lalu sekeda nya enda. Sekeda orang deka berandau pasal Petara tauka Bup Kudus. Lalu bisi nya deka berandau pasal utai bukai dulu. Enda ngira sapa ke ditemu kitai, kitai patut ngambi peluang bejaku enggau semua orang. (Bacha Rome 1:14-16.) Endang amat, kitai mega patut ingat, Jehovah ke ngasuh pemendar Bup Kudus tumbuh ba ati orang ke rinduka pengelurus.—1 Kor. 3:6, 7.

BEKUNSIKA PEMENDAR ENGGAU ORANG KE ENDA PECHAYAKA PETARA

Mayuh penginjil Saksi-Saksi Jehovah ngayanka pengibuh ngagai orang bukai ti datai ari menua ke alai nadai mayuh orang megai pengarap Kristian lalu bekunsi enggau sida penemu-dalam ke bisi ba Bup Kudus (Peda artikel dipelajar 30, genteran 12-13)

12. Nama digaga kitai ngambika ulih nginjil ngagai orang ke diau di menua Asia ke nadai kala berunding pasal sekalika Petara bisi tauka nadai?

12 Ba serata dunya, mayuh Saksi-Saksi Jehovah betemu enggau orang ke enda pechayaka Petara. Tu nyengkaum sida ke datai ari endur alai perintah udah nyekat pengawa ti bekaul enggau pengarap. Ba sekeda menua di Asia, mayuh orang nadai berunding pasal sekalika Petara bisi tauka nadai. Sekeda nya engka deka nemu lalu nerima lebuh bala Saksi mai sida belajarka Bup Kudus. Tang bisi sekeda nya terubah-rubah enggai belajarka Bup Kudus. Baka ni kitai ulih nulung sida? Sekeda bala penginjil ke bepeneleba udah mujur nginjil ngagai sida enggau chara ngepunka randau ti manah sereta ngayanka pengibuh. Lalu lebuh bisi peluang, bala penginjil nya bekunsika peneleba diri pasal baka ni prinsip Bup Kudus udah nulung sida ngemansangka pengidup diri.

13. Nama ulih narit ati orang ngagai Bup Kudus? (Peda gambar ba kulit majalah.)

13 Mayuh orang rindu enggau prinsip manah ke ditemu ba Bup Kudus. (P-jar. 7:12) Ba menua New York, seiku menyadi Kristian indu ke ngelawa orang ti bejaku ngena jaku Mandarin madahka: “Aku nguji ngayanka pengibuh ngagai orang lalu mendingka sida. Enti aku nemu sida baru datai ari menua bukai, aku nanya sida: ‘Kati nuan udah nelebaka diri ba menua tu? Kati nuan udah bulih kereja? Kati orang ba ditu manah enggau nuan?’” Kadang-kadang tu ulih nulung menyadi Kristian indu nya ngepunka randau pasal Bup Kudus. Lebuh bisi peluang, iya deka nanya: “Ba runding nuan, nama patut digaga kitai kena bulih kaul ti manah enggau orang bukai? Ulih aku mandangka utai ti dipadah ba Bup Kudus? Ditu bisi madahka: ‘Pun kelikuh nya baka tekat ai ti baru deka runtuh. Padamka kelikuh nya enggau jampat.’ Kati jaku lalau tu ulih nulung kitai ngembuan kaul ti manah enggau orang bukai?” (J-lam. 17:14) Randau ke baka tu ulih nulung kitai nemu sapa ke amat deka belajar pasal Bup Kudus.

14. Baka ni seiku menyadi Kristian ba Asia Timur nulung orang ke madahka diri enda pechayaka Petara?

14 Nama ulih disebut kitai ngagai sida ke madahka diri enda pechayaka Petara? Seiku menyadi Kristian lelaki ke ngembuan mayuh peneleba nginjil ngagai orang ke baka tu ba menua Asia Timur madahka: “Selalu iya, lebuh orang ditu madahka diri enda pechayaka Petara, reti nya sida enda pechayaka petara ke disembah orang ke diau ngelingi sida. Nya alai aku setuju pasal mayuh petara nya digaga mensia lalu petara nya ukai petara ti bendar. Aku  suah macha ari Jeremiah 16:20 ke madahka: ‘Kati mensia ulih ngaga petara ke diri empu? Enda, laban enti sida ulih, petara nya ukai petara ti bendar.’ Udah nya aku nanya: ‘Baka ni kitai ulih nemu ni bagi petara ti bendar enggau iya ke digaga mensia?’ Aku ningaka saut ari sida, lalu udah nya macha Isaiah 41:23: ‘Padahka ngagai kami nama utai ti deka nyadi jemah ila, nya baru kami deka nemu kita tu endang petara!’ Udah nya aku nunjukka siti chunto pasal utai ke udah dipadah Jehovah pasal jemah ila.”

15. Nama ulih dipelajarka kitai ari chunto seiku menyadi Kristian ba menua Asia Timur?

15 Seiku menyadi Kristian lelaki ba menua Asia Timur ngena chara tu lebuh iya datai ngabas. Ku iya madahka: “Aku nunjukka sekeda penemu-dalam ari Bup Kudus, jaku benabi ti udah dikeamatka, sereta atur pasal bintang, planet enggau utai bukai ba dunya raya. Udah nya aku madahka baka ni semua tu nunjukka Petara nya endang bisi sereta bepenemu. Lebuh orang berengkah berunding pasal pengamat Petara nya bisi, aku berengkah nunjukka utai ke dipadah Bup Kudus pasal Jehovah ngagai iya.”

16. (a) Nitihka Hebrew 11:6, nama kebuah pemelajar Bup Kudus patut arapka Petara sereta Bup Kudus? (b) Baka ni kitai ulih nulung sida ngemansangka nya?

16 Lebuh kitai belajarka Bup Kudus enggau orang ke nadai pengarap, kitai enda tau enda terus nulung sida arapka Petara endang amat bisi. (Bacha Hebrew 11:6.) Lalu kitai mega patut nulung sida ngemansangka pengarap ba Bup Kudus. Kitai engka patut suah madahka sekeda ajar Bup Kudus ngagai sida. Tiap kali belajar enggau sida, kitai engka patut berandauka bukti ke nunjukka Bup Kudus nya endang ari Petara. Tu engka nyengkaum nerangka enggau ngelansa jaku Petara ke udah dikeamatka, baka ni Bup Kudus sejalai enggau penemu sains sereta sejarah, sereta baka ni Bup Kudus ulih nulung kitai ba pengidup.

17. Nama deka nyadi enti kitai ngayanka pengerindu ngagai orang?

17 Kitai nulung orang nyadi murid Kristus lebuh kitai ngayanka pengerindu ngagai sida enda ngira sida bisi pengarap tauka nadai. (1 Kor. 13:1) Lebuh kitai ngajar sida, juluk ati kitai iya nya deka nunjukka Petara rinduka sida lalu deka sida rinduka Iya. Ninting taun, beribu-ribu iku orang ke semina nemu mimit tauka nadai ati deka nemu pasal pengarap udah dibaptisa ketegal udah belajar rinduka Petara. Nya alai, kitai patut ngembuan runding ti positif lalu ibuhka semua orang. Dingaka sida. Uji meretika sida. Nengah teladan nuan, ajar meh sida nyadi murid Kristus.

LAGU 76 Kati Asai Nuan?

^ per. 5 Kitai engka deka suah agi betemu enggau orang ke nadai pengarap enti dibandingka enggau suba. Artikel tu deka berandauka chara kitai ulih bekunsika pemendar Bup Kudus enggau sida, lalu nulung sida pechayaka Bup Kudus sereta ngembuan pengarap ba Petara Jehovah.

^ per. 1 Nitihka pansik, sekeda menua nya: Albania, Australia, Austria, Azerbaijan, Kanada, China, Republik Czech, Denmark, Perancis, Jerman, Hong Kong, Ireland, Israel, Jepun, Belanda, Norway, Korea Selatan, Sepanyol, Sweden, Switzerland, United Kingdom, enggau Vietnam.

^ per. 2 PENERANG JAKU: Ba artikel tu, rambai jaku sida ke nadai pengarap reti nya sida enda pechayaka Petara.

^ per. 54 PENERANG PASAL GAMBAR: Seiku menyadi Kristian lelaki nginjil ngagai orang ke sama gawa enggau iya ba sepital. Udah nya, orang ke sama gawa enggau iya nya meda laman web kitai ba jw.org.