Terus ngagai penerang

Terus ngagai Ripih Isi

 PELAJAR 2

Petara Nya Meh Pangan ti Pemadu Manah ke Nuan

Petara Nya Meh Pangan ti Pemadu Manah ke Nuan

Nyadi pangan Petara nya meh utai ti pemadu manah ke kala nyadi ba nuan. Petara deka ngajar nuan baka ni tau bulih pengelantang sereta pengelikun; Iya deka ngelepaska nuan ari mayuh macham pengarap ti salah enggau pengawa ti tau ngemediska. Iya deka ningaka sampi nuan. Iya deka nulung nuan bisi pemaik dalam ati sereta bisi pengarap. (Masmur 71:5; 73:28) Petara deka nyukung nuan lebuh bisi penusah. (Masmur 18:18) Lalu Petara deka meri nuan pemeri, iya nya pengidup ti belama iya.—Rome 6:23.

Lebuh nuan semak ngagai Petara, nuan mega ulih semak ngagai bala pangan Petara. Sida mega ulih nyadi pangan nuan. Kebendar iya, sida baka menyadi nuan. Sida gaga ngajar nuan pasal Petara lalu deka nulung nuan sereta meransang nuan.

Kitai enda setipak enggau Petara. Lebuh nuan deka bepangan enggau Petara, nuan patut meretika siti utai ti amat beguna. Bepangan enggau Petara nya ukai utai ti setipak. Iya jauh lebih tuai enggau pintar sereta lebih bekuasa ari kitai. Iya nya meh Pemerintah kitai. Nya kebuah, enti kitai deka nyadi pangan Iya, kitai patut ninga enggau ngereja utai ke diasuh Iya. Semua utai tu pulai ke pemanah kitai.—Isaiah 48:18.