Terus ngagai penerang

Surat Ari Raban ti Ngiring

Surat Ari Raban ti Ngiring

Bala Menyadi ke Dikerindu:

Ba abad ketujuh S.M. kelia, nabi Esekiel diasuh meda siti visi ke ngalitka ati. Iya meda siti rengka pengangkut ti besai, kerita ba serega, ke dikemudika Pemerintah dunya raya enggau langit luar. Utai ke balat ngalit ke ati pasal kerita nya iya nya chara iya mindah. Iya mindah ngelaju kilat, indah lebuh iya nukar tunga pejalai ​​—iya enda ibuh ngurangka pengelaju tauka beputar!​​—Esk. 1:​4, 9, 12, 14, 16-​27.

Visi tu ngingatka kitai gerempung Jehovah ba serega seruran mansang. Kati baka gerempung Iya ba dunya tu? Ba taun nginjil ti udah nunjukka enggau terang Jehovah mega ngemansangka nembiak Iya ba dunya tu!

Ba Amerika Serikat ditu, raban diri sebilik Betel kisuk mindah ari Brooklyn ngagai endur baru indu opis ba Warwick, New York. Bisi mega mindah ngagai bengunan ke bukai sereta mindah ngagai pengawa nginjil. Raban Betel ba sekeda pampang opis di serata dunya mega kisuk nirika sereta ngaduka baru bengunan, begabung pampang opis, tauka mindah ngagai endur ti baru. Kati baka nuan? Taja pan nuan enda mindah, tang nuan engka kisuk ba pengawa ke bukai.

Raban ti Ngiring gaga amat ati sereta berasai diperansang meda nembiak Petara ba serata dunya kisuk agi ari ke udah ketegal sida deka nitihka pemansang gerempung Jehovah. Mayuh udah mindah ngagai endur ke begunaka mayuh penginjil. Sekeda udah mindah ngagai pengawa nginjil ke baru ba sida, baka ngagai bansa jaku bukai. Mayuh udah nguji nginjil ngena chara ti baru sereta ke enda kala digaga sida. Bisi mega udah ngemansangka pengawa nginjil sida ngena chara bukai. Lalu semua orang Kristian ke tetap ati, nyengkaum ke udah tuai enggau ke sakit, tetap taluk ba lumba ke nuju pengidup​​—majak mansang ba pengawa ke Jehovah, lalu ngasuh orang nemu pemula ke digaga Sitan!​​—1 Kor. 9:​24.

Kingatka, Jehovah beratika pengeransing ke diayanka nuan. (Heb. 6:​10) Penyanggup ke diayanka nuan ngasuh kami teingatka pasal Abraham seduai Sarah. Lebuh iya urung 70-an, Abraham pansut ari nengeri Ur di menua Kaldea, lalu nguluka ruang bilik iya mindah jauh ngagai menua Kanaan. Ba menua nya, iya neruska pengidup iya lebih ari seratus taun diau ba langkau kain. Teladan ke chukup manah diayanka Abraham enggau bini iya!​​—P-kal. 11:31; SKR. 7:​2, 3.

Kati nuan ngayanka teladan ti sama? Semua kita ke mengkang tetap ati ba maya ti tusah  tu, nitihka utai ti diasuh Jesus. Ku iya: ‘Nya alai, bejalai kita ngagai semua bansa lalu gaga sida nyadi murid aku, maptisa sida dalam nama Apai, Anak enggau roh kudus.’​​—Mat. 28:⁠19.

Jesus mega nyebut ‘bejalai” reti nya kitai enda tau enda mindah, majak mansang. Naka meh pengaga ati meda pemayuh utai ke udah digaga bala murid Kristus ba taun nyin kemari! Kitai ulih meda enggau terang berekat ari kuasa Jehovah ba pengawa ngerembaika berita manah pasal Perintah Petara ngagai semua bansa.​​—Mrk. 13:⁠10.

Mayuh orang nerima pesan nya. Penyampau penginjil ke pemadu mayuh ba taun nyin kemari iya nya 8,340,847, lalu purata pelajar Bup Kudus kitai ninting bulan iya nya 10,115,264. Endang amat, kerita Jehovah ba serega mindah, lalu baka nya mega enggau nuan! Tetap meh ba pengawa nuan ti manah dalam timpuh ti pandak tu, sebedau Jehovah nutup pintu endur nyelamatka orang.

Ayat taun 2017 kitai amat ngena: ‘Panggaika pengarap kita ba Jehovah, lalu kereja utai ti badas’! (Mas. 37:⁠3) Enti nuan ngasika jaku nya, ngereja utai ti badas enggau bejalaika pengawa ke Jehovah, nuan nunjukka diri arapka Iya. Kingatka, nuan enda kala kediri. Jaku Jesus seruran dikeamatka: ‘Lalu ingat, aku deka seruran enggau kita nyentuk ngagai pengujung dunya.’​​—Mat. 28:⁠20.

Pechaya meh Jehovah deka terus merekat pengawa nuan ke tetap ati. Jehovah deka nuan ngereja utai enggau naka ulih sereta meri enggau tuju ati ti betul, enda ngira utai nya mit tauka besai. Semua pemeri nya ngerinduka ati Iya lalu diterima Iya enggau gaga ati. (2 Kor. 9:​6, 7) Nya alai, terus meh semak ngagai Apai nuan ke penuh pengerindu enggau tetap besampi, belajarka Bup Kudus, datai begempuru, sereta nurun nginjil.

Sebedau timpuh ti pandak ke diberi ngagai Sitan tu abis, iya deka enggau naka ulih ngena semua peluang endur ngelimpangka kitai ari mengkang taluk ngagai Jehovah. (Pem. 12:12) Mengkang semak ngagai Jehovah, lalu Sitan deka alah. (Mas. 16:⁠8) Kingatka, kami amat rinduka kita sereta beterima kasih ke bantu kita bejalaika pengawa Perintah Tuan ba hari ti penudi tu.

Menyadi Nuan,

Raban ti Ngiring Saksi-Saksi Jehovah