Masmur 37:1-40
Lagu David.
א [Alef]
37 Anang pedis ati ketegal orang ke jai;Tauka ngining orang ke ngereja penyalah.
2 Sida deka jampat layu baka rumput,Lalu ngeriut baka rumput ijau.
ב [Bet]
3 Panggaika pengarap ba Jehovah lalu kereja utai ti lurus;Diau meh ba menua* tu lalu tunjukka diri setia.
4 Giga meh pengelantang* ari Jehovah,Lalu Iya deka meri nuan utai ti dikinginka nuan.
ג [Gimel]
5 Serahka pengidup nuan ngagai Jehovah;Bepanggai meh ba Iya, lalu Iya deka nulung nuan.
6 Iya deka ngasuh pengelurus nuan manchar baka penampak maya pagi hari,Lalu ngasuh pengawa nuan ti adil manchar baka mata panas maya siang hari.
ד [Dalet]
7 Diau jenuh di mua Jehovah,Lalu anti meh Iya enggau sabar.
Anang meh ringatLebuh pelan orang ke jai mujur.
ה [He]
8 Buai meh pengeringat sereta ati ti pedis;Anang pedis ati sereta ngereja penyai.*
9 Laban orang ke jai deka dipunaska,Tang orang ke manggaika pengarap ba Jehovah deka bempu dunya tu.
ו [Waw]
10 Enda lama da agi, orang ke jai deka nadai agi;Nuan deka begigaka sida,Tang nuan nadai tetemuka sida.
11 Orang ke baruh ati* deka bempu dunya tu,Lalu sida deka balat amat lantang ati ketegal pengelikun ti belimpah.
ז [Zayin]
12 Orang ke jai ngaga pelan deka ngelaban orang ke lurus;Sida begerit ngeli laban sida ringat ngagai orang ke lurus.
13 Tang Jehovah deka ketawaka sida,Laban Iya nemu pengujung sida udah semak.
ח [Het]
14 Orang ke jai nyintak pedang sida lalu melekuka panah sidaDeka nyerang orang ke miskin enggau orang ke ditekan,Deka munuh orang ke nitihka jalai ti bendar.
15 Tang pedang sida deka ngerejang ati sida empu;Lalu panah sida deka dipatahka.
ט [Tet]
16 Taja pan orang ke lurus ngembuan mimit utai,Tang nya manah agi ari orang ke jai ke ngembuan mayuh utai.
17 Laban lengan orang ke jai deka dipatahka,Tang Jehovah deka nyukung orang ke lurus.
י [Yod]
18 Jehovah nemu utai ke ditapi orang ke nadai ngereja penyalah,Iya deka meri sida pesaka ti meruan belama iya.
19 Maya bisi penusah, sida enda dikemaluka;Maya lapar pungkang, sida bisi mayuh pemakai.
כ [Kap]
20 Tang orang ke jai deka dipunaska;Taja pan bala munsuh Jehovah baka padang rumput ti manah,Tang sida deka nadai agi lalu lenyau baka asap.
ל [Lamed]
21 Orang ke jai nginjau tang enda mayar,Orang ke lurus gerah jari sereta rindu meri.
22 Orang ke diberekatka Petara deka bempu dunya tu,Tang orang ke dikutuk Iya deka dipunaska.
מ [Mem]
23 Enti Jehovah lantang ati enggau jalai pengidup sesiku orang,Iya deka ngiring tiap singkang orang nya.
24 Taja pan orang nya labuh, tang iya enda labuh tetingkap,Laban Jehovah megai jari iya.
נ [Nun]
25 Suba aku biak lalu diatu aku udah tuai,Tang aku nadai kala meda orang ke lurus ditinggalka Petara,Tauka bala anak sida bepintaka pemakai.
26 Sida seruran gerah jari lebuh nyali,Lalu bala anak sida deka diberekatka Petara.
ס [Samek]
27 Kuingka diri ari utai ti jai lalu kereja utai ti manah,Enggau nya nuan deka diau ba dunya tu belama iya.
28 Jehovah rinduka utai ti adil,Lalu Iya enda ninggalka bala nembiak Iya ti setia.
ע [Ayin]
Sida deka seruran dilindung,Tang peturun orang ke jai deka dipunaska.
29 Orang ke lurus deka bempu dunya tu,Lalu sida deka diau dia belama iya.
פ [Pe]
30 Mulut orang ke lurus mansutka penemu-dalam,Lalu dilah sida nyebut utai ti adil.
31 Sida nyimpan adat Petara dalam ati sida;Sida enda sekali-kali tesangkut.
צ [Tsade]
32 Orang ke jai beratika orang ke lurus,Lalu sida begigaka peluang alai munuh orang ke lurus.
33 Tang Jehovah enda nejuka sida labuh ngagai jari orang ke jai,Iya enda nejuka sida dikumbai salah lebuh sida diakim.
ק [Qof]
34 Panggaika pengarap ba Jehovah lalu titihka jalai Iya,Iya deka ngeninggika nuan lalu nuan deka bempu dunya tu.
Lebuh orang ke jai dipunaska, nuan deka meda utai nya nyadi.
ר [Res]
35 Aku meda orang ke jai sereta kejamLantang diau baka pun kayu ke tumbuh galak ba tanah iya empu.
36 Tang sida ngenyit lenyau;Aku begigaka sida, tang aku nadai tetemuka sida.
ש [Shin]
37 Peratika orang ke nadai bepenyalah,*Lalu peda meh orang ke lurus ati,Laban jemah ila orang ke baka nya meh ke deka ngasaika pengelikun.
38 Tang semua orang ke bedosa deka dipunaska;Lalu semua orang ke jai deka nadai agi.
ת [Taw]
39 Jehovah nyelamatka orang ke lurus;Iya kubu sida ba maya ti tusah.
40 Jehovah deka nulung lalu nyelamatka sida.
Iya deka ngelepaska sida lalu nyelamatka sida ari orang ke jai,Laban sida belindung ba Iya.
