Jaku-Dalam 14:1-35
14 Indu ke amat bepenemu-dalam negapka ruang bilik iya,Tang indu ke beli ngeruntuhka ruang bilik iya ngena jari iya empu.
2 Orang ke nitihka jalai pengelurus nangika Jehovah,Tang orang ke nitihka jalai ti bingkuk begedika Iya.
3 Jaku sumbung ari mulut orang ke beli baka tungkat ke dikena ngukum,Tang jaku orang ke bepenemu-dalam deka ngelindung iya empu.
4 Dulang* deka beresi enti nadai sapi,Tang sapi ti kering deka ngulihka mayuh asil utai ti diketau.
5 Saksi ti setia enda kala bula,Tang saksi ti pelesu selalu nyebut utai ti bula.
6 Orang ke sumbung* begigaka penemu-dalam tang nadai tetemuka iya,Tang orang ke ulih meretika utai senang ngulihka penemu.
7 Jauhka diri ari orang ke beli,Laban nuan nadai tetemuka penemu ari jaku iya.
8 Orang ke pintar nemu tunga diri laban iya bisi penemu-dalam,Tang orang ke beli dikemulaka* pemeli iya empu.
9 Orang ke beli ketawaka penyalah diri,*Tang orang ke lurus deka bebaik.
10 Enti orang tusah ati, semina iya empu aja ke ulih ngasaika nya,Lalu nadai siku pan ulih ngasaika pengaga ati iya.
11 Rumah orang ke jai deka anchur,Tang langkau kain orang ke lurus deka mengkang tegap.
12 Orang engka ngumbai diri nitihka jalai ti ngena,Tang pengujung iya, jalai nya mai iya ngagai pemati.
13 Taja orang dipeda ketawa, tang ati iya engka pedis,Lalu ati ti gaga ulih betukar nyadi ati ti tusah.
14 Orang ke nguingka diri ari Petara deka ngetau asil ari pengawa iya empu;Orang ke manah deka ngetau berekat ari pengawa iya empu.
15 Orang ke nadai pengalaman pechayaka tiap iti utai ke disebut orang,Tang orang ke pintar beratika tiap iti singkang diri.
16 Orang ke bepenemu-dalam bejimat lalu nguing ari penyai,Tang orang ke beli enda bejimat* sereta kelalu yakin enggau diri empu.
17 Orang ke jampat ringat ngereja utai baka orang ke beli,Tang orang ke berunding enggau bejimat deka dipegedi.
18 Orang ke nadai pengalaman deka ngereja utai ti beli,Tang orang ke pintar deka bulih penemu.
19 Orang ke jai terpaksa meremi ba depan orang ke manah;Sida deka meremi ba pintu penama orang ke lurus.
20 Orang ke miskin dipegedi bala ke enggau iya begulai,Tang orang ke kaya bisi mayuh kaban.
21 Orang ke begedika orang bukai nya bedosa,Tang orang ke sinuka sida ke baruh pendiau deka gaga ati.
22 Orang ke ngaga pelan ti jai deka tesat,Tang orang ke bisi niat ti manah deka dikerinduka* sereta dikearapka.
23 Tiap iti pengawa ti dikereja enggau bebendar mai penguntung,Tang enti semina mulut aja engkebut, orang deka nyadi miskin.
24 Makota orang ke bepenemu-dalam nya reta sida,Tang orang ke beli deka mengkang beli.
25 Saksi ti bendar nyelamatka nyawa,Tang saksi ti enda jujur seruran bula.
26 Orang ke nangika Jehovah deka arapka Iya enggau pengabis ati,Lalu bala anak iya deka dilindung.
27 Nangika Jehovah nya pun pengidup.
Au, nangika Petara ulih nyelamatka orang ari panjuk pemati.
28 Raja ke bisi mayuh rayat ngembuan mulia ti tinggi,Tang enti nadai rayat, iya nadai guna.
29 Orang ke amat-amat berunding enggau dalam lubah ringat,Tang orang ke jampat ringat mandangka pemeli diri.
30 Ati ti tenang ngasuh tubuh bepengerai,Tang ati ti chemburu baka penyakit ke makai tulang.
31 Orang ke nipu sida ke baruh pendiau ngeleseka Petara ke ngaga iya,Tang orang ke sinuka sida ke miskin ngemuliaka Iya.
32 Orang ke jai deka labuh ketegal penyai iya empu,Tang orang ke lurus deka dilindung ketegal iya setia.
33 Orang ke nemu berunding nyimpan penemu-dalam ba ati iya,Tang orang ke beli rindu mantaika utai ke ditemu diri.
34 Pengelurus ngemesaika bansa,Tang dosa mai pemalu ngagai bansa.
35 Raja lantang ati ngagai ulun ke ngereja utai ngena penemu-dalam,Tang iya ringat ngagai ulun ke ngereja utai ti ngemaluka.
