Terus ngagai penerang

Saksi-Saksi Jehovah

Pilih bansa jaku Iban

Nama Kebuah Pemati Jesus Ulih Dikumbai “Kena Nebus Orang Mayuh”?

Nama Kebuah Pemati Jesus Ulih Dikumbai “Kena Nebus Orang Mayuh”?

Saut ari Bup Kudus

Nengah tebus Jesus, Petara meri pengelepas, tauka nyelamatka, mensia ari dosa sereta pemati. Bup Kudus madahka darah Jesus, rega ti dibayar nyadika tebus. (Epesus 1:7; 1 Peter 1:18, 19) Nya kebuah, Jesus madahka iya datai ke dunya, “nyerahka nyawa diri kena nebus orang mayuh.”—Matthew 20:28.

Nama kebuah beguna “Kena Nebus Orang Mayuh”?

Adam, mensia keterubah ke digaga enggau sempurna. Reti iya, iya nadai dosa sereta ulih idup belama iya. Tang, ketegal iya enda ngasika Petara, iya ngelenyauka peluang ti manah nya. (Pemungkal 3:17-19) Dosa Adam udah ngelengkai ngagai semua peturun iya. (Rome 5:12) Nya kebuah, Bup Kudus madahka Adam sereta peturun iya, udah “dijual” nyadika ulun dosa enggau pemati. (Rome 7:14) Ketegal semua peturun Adam enda sempurna, nadai seiku pan ari sida ulih mayar rega kena ngulihka baru utai ti udah dilenyauka Adam.—Masmur 49:7, 8.

Petara sinu ati meda peturun Adam ti nadai daya deka nyelamatka diri. (John 3:16) Tang, ketegal Petara nya lurus ba semua utai, Iya enda ulih enda betatika penyalah sida tauka ngampunka sida enggau nadai kebuah. (Masmur 89:14; Rome 3:23-26) Ketegal Petara amat rinduka mensia, Iya udah berundingka siti chara ngambika dosa sida ulih diampun sereta dilenyauka belama iya. (Rome 5:6-8) Chara ke dikena nya, nyediaka tebus.

Nama utai ke disengkaum ba tebus?

Dalam Bup Kudus, rambai jaku “tebus” nyengkaum tiga pekara:

  1. Tebus utai ke dibayar.Penyampau 3:46, 47.

  2. Tebus ulih meri pengelepas.Pemansut 21:30.

  3. Tebus patut sama rega enggau utai ke dibeli tauka utai ke ditebus. *

    Aram kitai berati, nama kebuah tebus Jesus disengkaum dalam tiga pekara tu:

  1. Dibayar. Bup Kudus madahka, orang Kristian “udah dibeli ngena rega ti besai.” (1 Korint 6:20; 7:23) Rega ke dibayar nya, darah Jesus. Iya udah meli orang ke datai ari semua “raban bansa, jaku, menua, enggau bansa.”—Pemandang 5:8, 9.

  2. Pengelepas. Ketegal tebus Jesus, kitai ulih bibas ari dosa.—1 Korint 1:30; Kolosi 1:14; Hebrew 9:15.

  3. Sama rega. Utai ke diberi Jesus sama rega enggau utai ke dilenyauka Adam iya nya, nyawa mensia ti sempurna. (1 Korint 15:21, 22, 45, 46) Bup Kudus madahka, “Laban baka orang siku [Adam] ke enda ngasi nya mai mayuh orang bedosa, baka nya mega mayuh orang deka digaga lurus laban orang siku [Jesus Kristus] ngasi.” Ayat tu nerangka, baka ni pemati seiku orang ulih nebus, tauka nyelamatka mayuh orang ke bedosa. Tebus Jesus “nyadika penebus semua mensia.” Enti kitai ngereja utai ke patut, kitai deka bulih mayuh penguntung ari tebus nya.—1 Timoti 2:5, 6.

^ per. 11 Dalam Bup Kudus, rambai jaku “tebus” reti iya rega, tauka sesiti barang ti berega ke dibayar. Chunto, ba jaku Hebrew ­ka·pharʹ mai reti ‘nutup.’ (Pemungkal 6:14, Salin Dunya Baru) Jaku nya mai reti nutup dosa, tauka ngampunka dosa. (Masmur 65:4) Pia mega jaku Hebrew ­koʹpher nerangka pasal rega ke dibayar kena ngulihka tebus tauka pengampun. (Pemansut 21:30) Pia mega enggau jaku Gerika ­lyʹtron ke selalu disalin ngagai “tebus” mega ulih disalin ngagai “rega tebus.” (Matthew 20:28; The New Testament in Modern Speech, by R. F. Weymouth) Ba jaku Gerika, jaku tu suah dikena nerangka rega ke dibayar, kena ngelepaska orang tangkap tauka ulun.