Saut ari Bup Kudus

 Sitan enggau bala melikat ti jai bisi kuasa atas mensia nyentukka Bup Kudus madah: “Serata dunya di baruh kuasa Sitan.” (1 John 5:19) Bup Kudus madahka beberapa iti chara Sitan ulih nguasa mensia.

•   Pengawa nipu. Bup Kudus meransang orang Kristian “ngelaban panjuk Sitan ti pintar nipu.” (Epesus 6:11) Siti chara Sitan nipu orang iya nya lebuh orang ke ngereja peneka iya nyaru diri baka ulun Petara.—2 Korint 11:13-15.

•   Pengawa ke bekaul enggau melikat ti jai. Sitan nesatka orang nengah bala manang, dukun, orang ke betilitka nasit tauka meramal, nyengkaum ngena bintang. (Ulang Adat 18:10-12) Enti orang salah guna dadah, pukau, tauka ngusungka runding ngena meditasi, nya meri peluang iya dikuasa melikat ti jai.—Luke 11:24-26.

•   Pengarap pelesu. Pengarap ti ngajar utai ti pelesu nesatka orang lalu ngujungka sida enda ngasika Petara. (1 Korint 10:20) Bup Kudus ngumbai ajar nya “ari bala melikat ti jai.”—1 Timoti 4:1.

•   Ngerasuk orang. Bup Kudus bisi madahka sekeda cherita pasal melikat ti jai ke ngerasuk orang. Kekadang orang ke dirasuk nya nyadi buta tauka bisu, indah ngemediska diri empu.—Matthew 12:22; Mark 5:2-5.

Chara nyeliahka diri ari dikuasa Sitan

 Nuan tau enda ibuh takutka kuasa melikat ti jai. Bup Kudus nunjukka baka ni nuan ulih ngelaban Sitan:

•   Belajar pasal chara ke dikena Sitan ngambika nuan “nemu panjuk iya.”—2 Korint 2:11.

•   Belajarka Bup Kudus lalu kereja meh utai ke dipelajarka nuan. Enti nuan nitihka prinsip Bup Kudus, nya ulih ngelindung nuan ari kuasa Sitan.—Epesus 6:11-18.

•   Buai sebarang utai ke bekaul enggau pengawa melikat ti jai. (Surat Kereja Rasul 19:19) Tu nyengkaum lagu, bup, majalah, poster, sereta video ke mandangka pengawa ke bekaul enggau melikat ti jai.