Terus ngagai penerang

Kati Petara Bisi ba Barang Alai sereta ba Barang Maya?

Kati Petara Bisi ba Barang Alai sereta ba Barang Maya?

Saut ari Bup Kudus

Petara ulih meda semua utai. Iya mega ulih ngereja semua utai kedeka Iya ba barang alai. (Jaku Dalam 15:3; Hebrew 4:13) Tang, dalam Bup Kudus nadai madahka Petara bisi ba barang alai sereta ba barang maya. Tang Bup Kudus bisi madahka, Petara nya roh ke bisi endur diau.

  • Tubuh Petara: Petara nya roh. (John 4:24) Nadai mensia ulih meda Iya. (John 1:18) Dalam Bup Kudus ke madahka pasal genera Petara, kesuah iya madahka Iya ba sesiti endur, ukai ba barang alai.—Isaiah 6:1, 2; Pemandang 4:2, 3, 8.

  • Endur Petara diau: Endur Petara diau enda sama baka endur kitai diau. Petara bisi ‘rumah ba serega’. (1 Raja 8:30) Dalam Bup Kudus kala madah, bala orang serega datai ‘ngadap Jehovah’. * Tu nunjukka Petara diau ba siti endur, ukai ba barang alai.—Jop 1:6.

Kati Petara nulung aku enti Iya ukai ba barang alai sereta ba barang maya?

Ulih. Petara amat ibuhka semua orang. Taja pan Iya diau ba serega, Iya ulih meratika orang ke deka ngelantangka ati Iya, lalu Iya deka nulung sida. (1 Raja 8:39; 2 Bansa Israel 16:9) Peratika baka ni Jehovah nunjukka Iya amat ibuhka penyembah Iya ti tetap ati:

  • Lebuh nuan besampi: Berengkah aja nuan besampi, Jehovah tentu ningaka sampi nuan.—2 Bansa Israel 18:31.

  • Lebuh nuan tusah ati: Jehovah diau semak orang ke tusah ati lalu ngidupka sida ke nadai agi pengadang.’—Masmur 34:18.

  • Lebuh nuan begunaka iring: Nengah Bup Kudus, Jehovah deka “nunjukka jalai ti patut ditengah nuan.”—Masmur 32:8.

Runding ti salah pasal penatai Petara

Runding ti salah: Petara bisi ba barang alai.

Fakta: Petara ukai diau ba dunya. (1 Raja 8:27) Endang amat Bup Kudus nunjukka bintang sereta semua utai ke ditempa ‘mandangka mulia Petara’. (Masmur 19:2) Tang, baka seiku pelukis ke enda diau dalam utai ke dilukis iya, Petara mega enda diau dalam utai ke ditempa Iya. Taja pia, kitai ulih ngelala pemanah pelukis nya ari utai ke dilukis iya. Baka nya mega, kitai ulih ngelala sapa Penempa kitai sereta “kualiti Iya ti enda ulih dipeda”, baka kuasa, pemandai, enggau pengerindu nengah utai ke ditempa Iya.—Rome 1:20.

Runding ti salah: Petara bisi ba barang alai sereta ba barang maya, ngambika Iya ulih nunjukka kuasa diri lalu nemu semua utai ke nyadi.

Fakta: Nengah roh kudus Petara tauka kuasa Iya, Petara ulih nemu semua utai sereta ngereja sebarang utai ba barang maya. Taja pan Iya enda ba endur nya.—Masmur 139:7.

Runding ti salah: Petara bisi ba barang alai sereta ba barang maya laban bup Masmur 139:8 madah, “Enti aku niki ke serega, Nuan ga bisi dia. Enti aku gali di dunya pemati, Nuan ga bisi dia.”

Fakta: Ayat tu ukai reti iya madahka dini alai Petara. Tang, ayat tu ditulis ngena leka pantun kena ngajar kitai Petara ulih nulung kitai enda ngira dini endur kitai.

^ per. 5 Jehovah nya nama Petara ke bisi dalam Bup Kudus.