Terus ngagai penerang

Nama Ulih Nulung Nuan Nemu Pasal Petara?

Nama Ulih Nulung Nuan Nemu Pasal Petara?

Saut ari Bup Kudus

 Nuan ulih nemu pasal Petara enggau chara belajar pasal Iya, sereta ngelantangka ati Iya. Enggau tu, Petara “deka datai semak” nuan. (James 4:8) Bup Kudus mega ngasuh kitai andal, “Iya enda jauh ari kitai siku-siku.”—Kereja Rasul 17:27.

 Chara nemu pasal Petara

 Macha Bup Kudus

  •  Ajar ari Bup Kudus: ‘Semua Bup Kudus endang bepun ari Petara magang.’—2 Timoti 3:16.

  •  Reti iya: Petara nya Pengarang Bup Kudus. Iya ngiring mensia nulis Bup Kudus, lalu madahka runding Iya dalam Bup Kudus. Nengah bup ti spesial tu, Petara madahka utai kedeka Iya ngagai kitai. Iya mega madahka kualiti ti dikembuan Iya baka pengerindu, pengelurus, sereta penyiru.—Pemansut 34:6; Ulang Adat 32:4.

  •  Utai ke ulih dikereja nuan: Macha Bup Kudus ninting hari. (Joshua 1:8) Belematika utai ti dibacha nuan lalu tanya diri empu: ‘Nama utai dipelajarka aku pasal kualiti Petara?’—Masmur 77:12.

     Ngambika chunto, pengudah nuan macha Jeremiah 29:11, tanya diri empu, ‘Kati Petara deka meda aku idup dalam pemaik tauka dalam pemerinsa? Kati Iya seiku Petara ti rindu malas dendam, tauka kati Iya deka aku bulih pengidup ti manah jemah ila?’

 Belematika utai ti ditempa

  •  Ajar ari Bup Kudus: ‘Kenyau ari penumbuh dunya . . . kualiti [Petara] enda ulih dipeda, udah ditemu sereta dipeda mensia ari utai ti digaga Iya.’—Rome 1:20.

  •  Reti iya: Kitai ulih ngelala seseiku pelukis nengah utai ke dilukis iya, tauka seseiku tukang nengah utai ke digaga iya. Sama mega, kitai ulih ngelala Petara nengah utai ke ditempa Iya. Chunto iya, chara untak mensia ditempa amat ngalitka ati, lalu ulih ngambarka kuasa Petara ti enda ulih ditelah ngena leka jaku. Pia mega pengangat mata panas sereta pengelawa bintang ba langit pan ngayanka pemesai kuasa Iya.—Masmur 104:24; Isaiah 40:26.

  •  Utai ke ulih dikereja nuan: Giga meh awak belemati sereta belajarka utai ti ditempa Petara. Udah nya tanya diri empu, ‘Nama utai ke ulih dipelajarka aku pasal Petara, nengah utai ke ditempa Iya?’ a Amat, agi mayuh utai ke enda ulih dipelajarka kitai pasal Petara nengah utai ke udah digaga Iya. Nya kebuah, Iya meri kitai Bup Kudus.

 Ngena nama Petara

  •  Ajar ari Bup Kudus: ‘Aku lalu nyaga orang ke ngaku Aku nyadika Petara sida. Lebuh sida ngangauka Aku, Aku deka nyaut sida.’—Masmur 91:14, 15.

  •  Reti iya: Petara, ke benama Jehovah amat beratika orang ke nemu nama Iya sereta ngena nama Iya enggau basa. b (Masmur 83:18; Malaki 3:16) Maya Petara madahka nama diri, tu nunjukka Iya deka kitai ngelala Iya. Iya madah, ‘Semina Aku aja ti Jehovah Petara nuan.’—Isaiah 42:8.

  •  Utai ke ulih dikereja nuan: Kena meh nama Jehovah lebuh nuan bejaku pasal Iya.

 Bejaku ngagai Jehovah nengah sampi

  •  Ajar ari Bup Kudus: ‘Jehovah semak sida ke ngangauka Iya.’—Masmur 145:18.

  •  Reti iya: Jehovah semak ngagai orang ke besampi sereta arapka Iya. Sampi siti ari chara kitai meri sembah. Maya kitai besampi ngagai Petara, tu nunjukka kitai bebasaka Iya.

  •  Utai ke ulih dikereja nuan: Seruran besampi ngagai Petara. (1 Tesalonika 5:17) Padahka meh pengirau sereta asai ati nuan ngagai Iya.—Masmur 62:8. c

 Kemansangka pengarap ngagai Petara

  •  Ajar ari Bup Kudus: ‘Nadai orang ulih ngerinduka ati Petara enti iya enda arapka Petara.’—Hebrew 11:6.

  •  Reti iya: Kitai patut arapka Petara, ngambi ulih semak Iya. Nitihka Bup Kudus, pengarap ukai semina nemu Petara nya endang bisi. Kitai mega patut arap enggau pengabis ati ngagai Petara, nyengkaum semua semaya sereta standard ke udah ditetapka Iya. Pengarap amat beguna kena ngetanka kaul ti manah.

  •  Utai ke ulih dikereja nuan: Pengarap ti bendar bepelasarka penemu. (Rome 10:17) Nyadi, belajar meh pasal Bup Kudus ngambi nuan ulih arapka Petara sereta semua lalau ke datai ari Iya. Saksi-Saksi Jehovah gaga ati nulung nuan belajarka Bup Kudus. d

 Ngereja utai ti ngelantangka ati Petara

  •  Ajar ari Bup Kudus: ‘Reti rinduka Petara nya kitai ngasaika pesan Iya.’—1 John 5:3.

  •  Reti iya: Jehovah semak orang ke ngayanka pengerindu ngagai Iya, lalu bebendar ngasika pesan Iya.

  •  Utai ke ulih dikereja nuan: Maya nuan belajarka Bup Kudus, uji kelala utai ke dikerindu sereta dipegedika Iya. Tanya diri empu, ‘Nama ubah ke patut digaga aku, ngambi ulih ngelantangka Petara ti nempa aku?’—1 Tesalonika 4:1.

 Nitihka lalau Petara lalu ngasaika penguntung iya

  •  Ajar ari Bup Kudus: ‘Awakk kita empu ngasaika pemadas Petara.’—Masmur 34:8.

  •  Reti iya: Petara mai nuan ngasaika pemadas Iya. Lebuh nuan ngasaika pengerindu sereta sukung ari Petara, nuan deka agi semak Iya.

  •  Utai ke ulih dikereja nuan: Titihka meh lalau Petara ba Bup Kudus, lalu asaika penguntung iya. (Isaiah 48:17, 18) Peratika mega peneleba orang bukai ke bepanggai ngagai Petara, lalu ulih mutarka penekul ba pengidup, ngembuan diri sebilik ti lantang, sereta bulih pengelantang ti bendar. e

 Runding ti salah pasal chara semak Petara

 Runding ti salah: Petara kelalu bekuasa, lalu penuduk Iya amat tinggi. Nyadi, kapa Iya deka semak mensia ke baka kitai.

 Iya ke amat: Amat, Petara nya amat bekuasa ari semua utai. Tang Iya agi dekaka kitai semak Iya. Bup Kudus bisi mayuh chunto pasal lelaki enggau indu ke nyadi pangan rapat Iya.—Kereja Rasul 13:22; James 2:23.

 Runding ti salah: Kitai enda ulih ngelala Petara, laban nadai orang nemu sapa Iya.

 Iya ke amat: Bisi sekeda utai ngasuh kitai enda ulih nemu sapa Petara. Ngambika chunto, Petara nya enda ulih dipeda. Tang kitai agi ulih ngelala Iya. Indah, dalam Bup Kudus pan madah, kitai patut ngelala Iya ngambi bulih pengidup ti belama iya. (John 17:3) Penerang dalam Bup Kudus senang dimeretika kitai, ngambi ngelala sapa Petara, kualiti Iya, tuju Iya ngagai mensia sereta dunya, enggau standard Iya. (Isaiah 45:18, 19; 1 Timoti 2:4) Baka ke disebut tadi, Bup Kudus pan bisi madahka nama Petara. (Masmur 83:18) Kitai ukai semina ngelala Petara, tang kitai mega ulih semak Iya.—James 4:8.

a Peda siri artikel “Siapaka Perekanya?” dalam jaku Melayu, kena nemu mayuh agi pasal utai ditempa Petara.

b Mayuh orang ngumbai, reti nama Jehovah nya, “Iya ke Ngasuh Utai Nyadi.” Maya Iya madahka nama Iya ngagai kitai, tu baka ke Iya madah: “Aku deka ngamatka semua peneka sereta tuju Aku. Aku seruran ngamatka semaya Aku.”

c Peda artikel “Mengapakah Berdoa? Adakah Tuhan Akan Menjawap Doa Saya?” dalam jaku Melayu.

d Kena nemu mayuh agi peda meh video, “Nama Nyadi Lebuh Belajarka Bup Kudus?

e Peda siti srtikel, “Bup Kudus Ngubah Pengidup