Saut ari Bup Kudus

 Ngampun reti iya enda ingatka penyalah seseiku orang. Ba Bup Kudus, nitihka jaku Gerika ke disalin ngagai “ngampun” mai reti “nginsil” tauka “muai.” Rambai jaku tu sama baka orang ke enda minta bayar ari orang ke berutang enggau iya. Jesus ngena tu nyadika banding maya ngajar murid iya pasal chara besampi, “Ampun kami dosa kami, laban kami ke ngampun orang ke salah ngelaban kami.” (Luke 11:4) Ba sempama iya pasal seiku orang gaji ke enda beterima kasih, Jesus mega nyempamaka pengawa ngampun nya baka ke nginsil utang orang bukai.—Matthew 18:23-35.

 Kitai ngampunka orang bukai enti kitai enda bedendam taja pan ati kitai dikemediska, tauka rugi. Reti iya, kitai sanggup ngelengkaka hak kitai minta ganti rugi. Bup Kudus ngajar, pengerindu ti enda berundingka diri empu meransang kitai ngampunka orang bukai ari ati, laban pengerindu “enda jampat ringat tauka bedendam.”—1 Korint 13:4, 5.

Ngampun enda nyengkaum:

•   Enda kiruhka penyalah. Bup Kudus begedika orang ke ngumbai pengawa ti jai nya enda salah.—Isaiah 5:20.

•   Ngumbai penyalah nya enda kala nyadi. Petara ngampunka penyalah besai ke digaga Raja David, tang Iya enda nyaga David ari asil penyalah ke digaga iya. Indah, Petara nentuka penyalah David nya ditulis dalam Bup Kudus nyadika pengingat ngagai kitai kemayaharitu.—2 Samuel 12:9-13.

•   Nejuka orang bukai ngambi ulih ari kitai. Gambarka nuan nyali duit ngagai seiku orang, tang iya masau duit nya, lalu enda tebayarka utang iya ngagai nuan. Iya amat nesal lalu minta ampun ngagai nuan. Nuan ulih milih deka ngampunka iya lalu enda bedendam, enda nyebut pekara nya agi, tauka nginsil semua utang nya. Tang, nuan engka enda berani nyali duit ngagai iya agi.—Masmur 37:21; Jaku Dalam 14:15; 22:3; Galatia 6:7.

•   Ngampunka orang ke enda layak nerima nya. Petara enda ngampunka orang ti sengaja ngereja dosa. Enti seseiku orang ngereja penyalah, tang enggai ngaku, lalu enggai berubah, sereta minta ampun, orang nya enda nerima pengampun ari Petara. (Jaku Dalam 28:13; Kereja Rasul 26:20; Hebrew 10:26) Orang ke enda nesal ati deka nyadi munsuh Petara, lalu kitai enda ibuh ngampunka orang ti enda diampunka Petara.—Masmur 139:21, 22.

   Baka ni enti nuan diperinsa, tang orang ke salah nya enggai minta ampun tauka ngaku penyalah iya? Bup Kudus madah, “Anang ringat, lalu badu agi pedis ati!” (Masmur 37:8) Taja pan nuan enda setuju enggau pengawa iya, tang nuan ulih milih nagang pengeringat diri. Pechaya meh, Petara tentu deka malas pengawa jai orang nya. (Hebrew 10:30, 31) Semaya Petara pasal ke jemah ila mega ulih ngelantangka nuan. Maya nya, kitai nadai agi pedis ati ketegal pengawa jai ke diasaika kitai baka ke diatu.—Isaiah 65:17; Pemandang 21:4.

•   Ngumbai tiap pekara ke mit pan patut “diampunka.” Taja pan kitai berasai enda nyamai ati, tang ukai reti iya orang nya ngaga penyalah lalu patut diampunka. Kekadang kitai patut ngaku diri kelalu jampat ringat, lalu nadai kebuah nyalahka orang bukai. Bup Kudus madah, “Anang lengkar. Nuan beli enti nuan bedendam.”—Pengajar 7:9.

Chara ngampun

1.   Ingat pasal sempama. Ngampun ukai reti iya enda kiruhka penyalah, tauka ngumbai penyalah nya enda kala nyadi. Nuan semina milih anang nyimpan dendam.

2.   Ngampunka orang bukai ulih mai penguntung. Enti kitai muai pengeringat lalu enda bedendam, kitai deka berasai nyamai agi, gerai sereta gaga ati. (Jaku Dalam 14:30; Matthew 5:9) Iya ke pemadu berat, Petara semina ngampunka penyalah kitai enti kitai ngampunka orang bukai dulu.—Matthew 6:14, 15.

3.   Bisi penyinu. Semua kitai enda sempurna. (James 3:2) Enti kitai deka orang bukai ngampunka kitai, kitai mega patut ngampunka penyalah orang bukai.—Matthew 7:12.

4.   Anang ngarapka lebih ari ke patut. Lebuh kitai berasai enda nyamai ketegal pekara ti mit aja, kingatka meh lalau ari Bup Kudus tu: “Sabar enggau pangan diri.”—Kolosi 3:13.

5.   Anang nganti kelalu lama. Ampunka orang bukai enggau jampat, lalu anang nejuka pengeringat majak balat.—Epesus 4:26, 27.