Saut ari Bup Kudus

 Baptisa reti iya diselam abis ba dalam ai. a Mayuh cherita pasal baptisa bisi ditulis ba dalam Bup Kudus. (Surat Kereja Rasul 2:41) Siti ari cherita nya lebuh Jesus dibaptisa ba Sungai Jordan. (Matthew 3:13, 16) Betaun pengudah nya siku lelaki ari Etiopia dibaptisa ba “endur ke bisi mayuh ai” ba tisi jalai ke ditujah iya.—Surat Kereja Rasul 8:36-40.

 Jesus ngajar sapa ke deka nyadi murid iya enda tau enda dibaptisa. (Matthew 28:19, 20) Rasul Peter mega ngajar utai ti sama.—1 Peter 3:21.

Ba artikel tu

•  Nama reti baptisa?

•  Nama dipadah Bup Kudus pasal maptisa tauka masu pala anak mit?

•  Nama reti dibaptisa dalam nama Apai, Anak enggau Roh Kudus?

•  Kati nya salah dibaptisa lebih ari sekali?

•  Baptisa ti bukai ke dipadah dalam Bup Kudus

•  Runding ti salah pasal baptisa orang Kristian

 Nama reti baptisa?

 Lebuh sesiku orang dibaptisa tu kena nunjukka orang bukai iya udah nesal ati ke dosa diri sereta besemaya ngagai Petara deka ngereja peneka Petara ba pengidup. Iya deka seruran ngasika Petara enggau Jesus dalam semua utai ke dikereja iya. Orang ke dibaptisa berengkah idup enggau chara ke dikedekaka Petara ngambika sida bulih pengidup ti meruan belama iya.

 Pengawa diselam abis ba dalam ai ngambarka ubah ke digaga orang nya ba pengidup. Baka ni? Bup Kudus nyemaka orang ke dibaptisa nya baka orang ke dikuburka. (Rome 6:4; Kolosi 2:12) Lebuh iya diselamka ba dalam ai tu ngambarka iya ke suba udah mati, lalu lebuh iya pansut ari ai nya tu ngambarka iya ngembuan pengidup ti baru nyadi orang Kristian.

 Nama dipadah Bup Kudus pasal maptisa tauka masu pala anak mit?

 Bup Kudus nadai ngajar sida ke anak mit patut dibaptisa. b Bup Kudus ngajar, enti orang nya deka dibaptisa bisi utai ke patut dikereja iya dulu. Ambika chunto, iya patut meretika ajar asas ba Bup Kudus sereta idup sejalai enggau utai ke udah dipelajarka iya. Iya udah nesal ati ke dosa iya, lalu dalam sampi iya udah nyerahka pengidup diri ngagai Petara. (Surat Kereja Rasul 2:38, 41; 8:12) Anak mit enda ulih ngereja semua utai tu.

Nama reti dibaptisa dalam nama Apai, Anak enggau Roh Kudus?

  Jesus ngasuh bala murid iya, “ajar [orang] nyadi murid aku. Baptisa sida dalam nama Apai, Anak, enggau kuasa kudus Petara. Ajar sida ngasika semua utai ke udah dipadah aku ngagai kita.” (Matthew 28:19, 20) Lebuh Jesus madah “dalam nama” tu mai reti orang ke dibaptisa nya meretika sereta ngaku hak enggau penuduk Apai, Anak sereta ungkup kuasa kudus (tauka Roh Kudus) Petara. Ambika chunto, rasul Peter bejaku ngagai siku lelaki ke timpang pendiau kenyau ari ada: “Dalam nama Jesus Kristus, orang Nasaret, bejalai meh nuan!” (Surat Kereja Rasul 3:6) Tu amat terang. Peter nemu Jesus meh ke bisi kuasa sereta hak kena ngeraika lelaki nya, lalu iya ke amat, Jesus meh ke ngereja pengawa ajih tu.

•   “Apai” dituju ngagai Petara Jehovah c. Laban Iya Penempa, Pun Pengidup sereta Petara ti Pemadu Bekuasa, Iya bisi kuasa ti pemadu besai.—Pemungkal 17:1; Pemandang 4:11.

•   “Anak” dituju ngagai Jesus Kristus ke meri pengidup iya ke kitai. (Rome 6:23) Kitai enda ulih diselamatka enti kitai enda ngaku tauka nerima ungkup Jesus ti penting dalam tuju Petara ke mensia.—John 14:6; 20:31; Surat Kereja Rasul 4:8-12.

•   “Kuasa kudus Petara” iya nya kuasa ke datai ari Petara. d Petara ngena kuasa Iya kena nempa utai, ngasuh utai idup, madahka pesan Iya ngagai bala nabi Iya enggau ke orang bukai lalu ngeringka sida kena ngereja peneka Iya. (Pemungkal 1:2; Jop 33:4; Rome 15:18, 19) Petara mega ngena kuasa kudus Iya lebuh ngasuh bala penulis Bup Kudus nuliska pesan Iya.—2 Peter 1:21.

Kati nya salah dibaptisa lebih ari sekali?

  Mayuh orang nukar pengarap sida. Tang baka ni enti sida udah dibaptisa ba gerija sida suba? Kati nya dosa enti sida dibaptisa baru? Sekeda orang nyebut au, ketegal chara sida meretika Epesus 4:5 ti madahka: “Semina bisi siku Tuan, siti ajar ke dikearapka kitai, siti baptisa.” Tang ayat tu ukai reti sesiku orang enda ulih dibaptisa baru. Nama kebuah?

 Konteks. Penerang ke sebedau enggau pengudah ayat Epesus 4:5 nunjukka rasul Paul deka nekanka poin, orang Kristian ti bendar patut beserakup dalam pengarap. (Epesus 4:1-3, 16) Sida ulih ngasaika penyerakup tu semina enti sida nitihka siku aja Tuan, Jesus Kristus; arap sereta ngembuan penemu ti sama pasal ajar Bup Kudus; lalu sama nitihka syarat ari Bup Kudus pasal baptisa.

 Rasul Paul meransang sekeda orang ke udah dibaptisa, dibaptisa baru. Tu ketegal lebuh dibaptisa sida bedau chukup penemu pasal ajar Kristian.—Surat Kereja Rasul 19:1-5.

 Baptisa bepelasarka penemu ti betul. Ngambika ulih diterima Petara, pengawa baptisa enda tau enda bepelasarka penemu ti betul pasal pemendar ari Bup Kudus. (1 Timoti 2:3, 4) Enti sesiku orang dibaptisa nitihka ajar pengarap ti enda sejalai enggau Bup Kudus, pengawa baptisa nya enda diterima Petara. (John 4:23, 24) Orang nya engka bisi tuju ati ke manah tang iya enda dibaptisa “nitihka penemu ti betul.” (Rome 10:2) Ngambika ulih diterima Petara iya patut belajar pemendar ba dalam Bup Kudus, ngena utai ke udah dipelajarka iya, nyerahka diri ngagai Petara lalu dibaptisa baru. Ba dalam situasi ke baka tu, orang ke dibaptisa baru ukai bedosa. Ke bendar iya, tu utai ti patut dikereja iya.

Baptisa ti bukai ke dipadah dalam Bup Kudus

  Bup Kudus madahka pasal beberapa bengkah baptisa ke bukai ti enda sama reti enggau pengawa baptisa murid Kristus ke diselamka dalam ai. Peratika sekeda chunto.

 Lebuh John Pemaptisa maptisa orang. e John maptisa orang Judah enggau orang bansa bukai ke megai pengarap Judah kena nunjukka sida nesal ati ke dosa sida ti ngelanggar Adat Moses. Adat tu diberi Petara ngagai orang Israel nengah Moses. Pengawa baptisa John nulung sida besedia deka nerima Messiah, Jesus ari Nasaret.—Luke 1:13-17; 3:2, 3; Surat Kereja Rasul 19:4.

 Lebuh Jesus empu dibaptisa. Lebuh Jesus dibaptisa John Pemaptisa, nya enda sama enggau baptisa ke bukai. Jesus mensia ti sempurna lalu iya nadai dosa. (1 Peter 2:21, 22) Lebuh iya dibaptisa, tu ukai kena nunjukka iya nesal ati tauka “minta ati ti beresi ari Petara.” (1 Peter 3:21) Tang tu nunjukka Jesus nyerahka diri ngagai Petara kena ngereja peneka Iya lalu nyadi Messiah, tauka Kristus. Tu nyengkaum sanggup mati ke kitai.—Hebrew 10:7-10.

 Baptisa ngena kuasa kudus. John Pemaptisa enggau Jesus Kristus kala madah pasal baptisa ngena kuasa kudus. (Matthew 3:11; Luke 3:16; Surat Kereja Rasul 1:1-5) Baptisa tu enda sama enggau baptisa dalam nama kuasa kudus. (Matthew 28:19) Nama kebuah?

 Semina mimit aja murid Jesus dibaptisa ngena kuasa kudus. Sida diiri ngena kuasa kudus laban sida dipilih begulai gawa enggau Kristus ba serega nyadi raja enggau imam lalu merintah atas dunya. f (1 Peter 1:3, 4; Pemandang 5:9, 10) Sida deka merintah atas bejuta iku murid Jesus ke bukai ke bisi harapan idup belama iya ba dunya Paradais.—Matthew 5:5; Luke 23:43.

 Baptisa dalam Jesus Kristus sereta dalam pemati iya. Sida ke dibaptisa ngena kuasa kudus mega “dibaptisa dalam Jesus Kristus.” (Rome 6:3) Pengawa baptisa tu nyadi ba bala murid Jesus ke dipilih ke serega. Lebuh sida dibaptisa dalam Jesus, sida nyadi sebagi ari raban gempuru ke dipilih ke serega. Jesus meh Kepala, lalu sida nyadi perengka tubuh.—1 Korint 12:12, 13, 27; Kolosi 1:18.

 Orang Kristian ke dipilih ke serega mega “dibaptisa dalam pemati [Jesus].” (Rome 6:3, 4) Sida nunda teladan Jesus enggau ngasika Petara, ari ke ngagaka ati sida empu ba pengidup. Lalu sama baka Jesus, sida nemu sida enda ulih idup belama iya ba dunya. Pengawa baptisa dalam pemati Jesus nya tembu lebuh sida mati lalu diidupka baru ba serega enggau tubuh ke enda ulih dipeda.—Rome 6:5; 1 Korint 15:42-44.

 Baptisa enggau api. John Pemaptisa madahka ngagai orang ke ningaka iya: “Iya [Jesus] deka maptisa kita ngena kuasa kudus enggau api. Jari iya megai sekup kena nampi. Iya deka meresi endur ngindik gandum lalu nyimpan gandum nya dalam setor. Lalu iya deka nunu ampa dalam api ke enda ulih dipadam.” (Matthew 3:11, 12) Peratika bisi bida entara baptisa enggau api sereta baptisa ngena kuasa kudus. Nama reti utai ku John dalam sempama tu?

 Gandum nya ngambarka sida ke ningaka sereta ngasika Jesus. Sida bisi peluang ulih dibaptisa ngena kuasa kudus. Ampa nya ngambarka orang ke enggai ningaka Jesus. Sida deka dibaptisa enggau api ti ngambarka sida deka dipunaska belama iya.—Matthew 3:7-12; Luke 3:16, 17.