Au, Petara amat bisi. Bup Kudus bisi mayuh penerang pasal tu. Bup Kudus mega meransang kitai, ngemansangka pengarap ngagai Petara ngena “penemu” kitai ke diberi Petara. (1 John 5:20) Amat, kitai enda ulih terus arapka ajar pasal pengarap tang nadai mansik pasal nya. Aram meh kitai sama bela mansik beberapa iti bukti ke bisi dalam Bup Kudus:

•   Ari dunya enggau langit luar kitai ulih nemu endang amat bisi Penempa. Bup Kudus madah, ‘Laban semua rumah endang digaga orang, tang Petara ngaga semua utai.’ (Hebrew 3:4) Ayat tu pandak aja tang amat terang. Mayuh orang ke tepelajar pan setuju enggau ayat tu. a

•   Maya mensia ada, sida endang udah bisi pengingin deka nemu reti sereta tuju ba pengidup. Pengingin tu tetap bisi taja pan utai ke diguna kitai udah bisi. Bup Kudus ngumbai pengingin tu, “seranta dalam roh” reti iya utai ke diguna ba pengarap. Ketegal bisi pengingin tu, kitai bisi ati deka ngelala sapa Petara enggau nyembah Iya. (Matthew 5:3; Pemandang 4:11) Tu nunjukka Petara endang amat bisi. Nambahka nya, ari tu kitai nemu Petara amat rinduka kitai lalu deka kitai bisi pengingin ti manah tu.—Matthew 4:4.

•   Bup Kudus ngembuan mayuh utai ke deka nyadi ti ditulis kenyau ari suba. Lalu semua utai ke deka nyadi tu, ditulis enggau silik. Pia mega, utai ke nyadi nya dikeamatka ba maya ti ngena baka ke ditulis. Tu nunjukka, Bup Kudus ukai datai ari mensia.—2 Peter 1:21.

•   Penulis Bup Kudus bisi penemu ti dulu agi ari jeman sida. Chunto iya, dulu kelia mayuh orang pechaya, bumi tu dipegai siku jelu, baka gajah, jani kampung, tauka lembu lelaki. Tang dalam Bup Kudus madah, Petara “ngitang dunya ba langit ti puang.” (Jop 26:7) Kelimpah ari nya, Bup Kudus ngumbai dunya tu “kumbang dunya” reti iya utai ti segala. (Isaiah 40:22, footnote; Douay Version) Mayuh orang amat pechaya, penulis Bup Kudus bulih penerang ti betul tu ari Petara.

•   Bup Kudus ngembuan mayuh saut ngagai tanya ti tusah. Enti saut ngagai tanya ke tusah tu enda ngemuaska ati, tu ngujungka orang nya nyadi ateis. Ngambika chunto, enti amat Petara nya pengerindu sereta bekuasa, nama kebuah dunya tu mayuh pemerinsa sereta penyai, lalu nama kebuah pengarap ngajar mayuh agi utai ke jai ari utai ke manah?—Titus 1:16.