Saut Bup Kudus

 Bup kudus nerangka utai ke nyadi, gaya dunya sereta ulah ti nunjukka “tanda pengujung dunya.” (Matthew 24:3) Bup kudus madahka timpuh tu dikumbai “hari ti penudi” sereta “pengujung dunya.”—2 Timoti 3:1; Daniel 8:19.

Nama utai ke dipadahka jaku benabi pasal “hari ti penudi”?

 Bup kudus udah madah mayuh tanda ke deka nyadi ba “hari ti penudi.” (Luke 21:7) Peratika sekeda chunto:

 Perang ba mayuh menua. Jesus madahka: “Bansa siti deka beperang ngelaban bansa siti, lalu menua siti deka beperang ngelaban menua siti.” (Matthew 24:7) Sama mega, Pemandang 6:4 madahka siku orang ke nepan kuda mirah ngambarka perang ke “muai pemaik ari dunya.”

 Lapar pungkang. Jesus madahka: “Lapar pungkang deka nyadi.” (Matthew 24:7) Bup Pemandang madahka siku agi orang ke nepan kuda ti ngujungka lapar pungkang nyadi ba mayuh bengkah endur.—Pemandang 6:5, 6.

 Tanah berenyang balat nyadi. Jesus madahka tanah berenyang deka nyadi ba mayuh bengkah endur.” (Matthew 24:7; Luke 21:11) Tanah berenyang ke balat nyadi ba serata dunya mai pemerinsa enggau nabanka mayuh nyawa ba mayuh bengkah endur.

 Penyakit. Nitihka ku Jesus, penyakit deka balat nyadi.—Luke 21:11

 Jenayah. Taja jenayah lama udah nyadi, Jesus madahka ba hari ti penudi “penyai deka nambah-menambah.”—Matthew 24:12.

 Pengerusak alam. Pemandang 11:18 madahka, mensia deka nyadi “pengerusak dunya.” Sida ngereja nya enggau mayuh macham chara, ukai semina nengah ulah ti mangah sereta pengawa ke enda lurus aja. Sida mega mai pengerusak ngagai alam sekitar.

 Ulah ti majak jai. Ba 2 Timoti 3:1-4, Bup Kudus madahka mayuh orang deka ‘enda nemu meri terima kasih, enda kudus, nadai nemu siruka orang, bejakuka orang, enda nemu nagang diri, mangah, begedika utai ti badas, aum-juak, enda berunding ngereja utai, ngerigangka diri laban sumbung.’ Ulah ke jai baka tu deka ngujungka “mayuh macham penusah deka nyadi.”

 Ruang bilik bepechah-belah. Ba 2 Timoti 3:2-3 Bup Kudus madahka, mayuh orang kasar enggau sida sebilik. Pia mega, bala anak kemayaharitu majak enda ngasika apai indai.

 Pengerindu ke Petara majak kurang. Jesus madahka, “mayuh orang enda agi rinduka pangan diri.” Reti jaku Jesus nya, pengerindu ke Petara majak kurang ba mayuh orang. Sama mega, 2 Timoti 3:4 madahka ba hari ti penudi, sida tu semina deka ngelantangka diri lalu enda rinduka Petara.

 Pengarap ke pura-pura: Ba 2 Timoti 3:5 Bup Kudus madahka, mayuh orang baka ke nyembah Petara, tang jalai pengidup sida enda nitihka standard Petara.

 Faham agi ke reti jaku benabi: Bup Daniel madahka, maya ba “pengujung dunya” mayuh orang faham agi ke reti pemendar dalam Bup Kudus, nyengkaum pengamat jaku benabi.—Daniel 12:4.

 Pengawa nginjil ba serata dunya. Jesus madahka, “Berita Manah pasal Perintah Petara deka ditusui di serata dunya.”—Matthew 24:14.

 Mayuh orang enda minat sereta ngeleseka. Jesus madahka, mensia enda pedulika tanda hari ti penudi. (Matthew 24:37-39) Kelebih agi, 2 Peter 3:3-4 madahka, sekeda orang deka ngeleseka enggau bebendar nyakal.

 Semua jaku benabi dikeamatka: Jesus nyebut, ba hari ti penudi deka bisi tanda ba maya ti sama, lalu tu nyadi enggau amat mayuh, ukai semina mimit aja.—Matthew 24:33.

Kati kitai idup ba “hari ti penudi”?

 Au. Gaya dunya sereta semua utai ke dipadah dalam Bup Kudus nunjukka, hari ti penudi berengkah kenyau ari taun 1914, lebuh maya perang dunya kesatu nyadi. Kena meda bukti ke nunjukka kitai idup ba hari ti penudi, peda meh video ke nangkanka tu:

 Kena taun 1914, Perintah Petara berengkah merintah ba serega. Lalu utai ti keterubah ke digaga nya, muai Sitan enggau melikat ti jai ari serega. Ketegal tu, pengawa sida bisi tatak, laban sida semina ulih diau ba bumi aja, tang enda ulih niki ke serega agi. (Pemandang 12:7-12) Kesan penyai Sitan, ulih dipeda ba mayuh macham ulah sereta pengawa ti jai ke ngasuh ‘mayuh macham penusah nyadi.’—2 Timoti 3:1.

 Mayuh orang berasai tetekan ketegal mayuh macham penusah. Sida irau meda mensia majak jai, lalu sekeda ari sida takut pasal nama penyadi ngagai pengidup mensia dudi hari.

 Taja pia, sekeda ari sida ke ditekan ngembuan harapan ti manah. Sida pechaya Perintah Petara deka mutarka semua penanggul ke ba dunya enda lama da agi. (Daniel 2:44; Pemandang 21:3, 4) Enggau sabar sida nganti Petara ngamatka semaya Iya, lalu sida tetemuka pemerindang ari jaku Jesus tu: “Orang ke tan datai ke ujung, deka diselamatka.”—Matthew 24:13; Mikah 7:7.