Terus ngagai penerang

Nama Ajar Bup Kudus Pasal Indu Dara Bungas ke Benama Maria?

Nama Ajar Bup Kudus Pasal Indu Dara Bungas ke Benama Maria?

 Saut ari Bup Kudus

 Dalam Bup Kudus madahka Maria, iya nya indai Jesus, bulih basa ti enda dikembuan orang bukai. Iya ngadaka Jesus maya iya agi dara bungas. Bup Kudus nyimpan cherita pengawa ajih tu ba bup Matthew enggau Luke. Lalu lama sebedau pengawa ajih tu nyadi, Bup Kudus endang udah nuliska nya dalam bup Isaiah.

 Lebuh madahka pasal pengada Messiah, nabi Isaiah madahka, “Siku indu dara deka ngandung lalu ngadaka anak lelaki.” (Isaiah 7:14) Ari iring Petara, Matthew seiku ari penulis injil ngaulka jaku Isaiah nya enggau maya Maria ngandung. Pengudah madahka pasal Maria ke ngandung enggau pengawa ajih, Matthew nulis, ‘Semua utai tu nyadi kena ngamatka jaku ti udah disebut Petara beseruanka siku nabi.’ “Siku dara bungas a deka betubuh-bisi, lalu ngadaka anak lelaki siku, lalu iya deka dikumbai Imanuel”, ke mai reti ‘Petara enggau Kitai.’—Matthew 1:22, 23.

 Luke, penulis injil ke bukai mega nulis pengawa ajih pasal Maria ke ngandung. Iya nulis pasal Petara ke nganjung melikat Gabriel “ngagai siku dara bungas ke betunang enggau lelaki siku ke benama Josep ke ari peturun David. Nama dara bungas nya Maria.” (Luke 1:26, 27) Ari jaku Maria empu mega nunjukka iya agi dara bungas. Pengudah iya dipadahka deka nyadi indai Messiah iya nya Jesus, iya nanya, “Baka ni ku utai tu tau nyadi, laban aku dara bungas?”—Luke 1:34.

 Kati ulih seiku indu dara bungas ngadaka anak?

 Maria ulih ngandung ketegal roh kudus, iya nya kuasa Petara ti nulung Iya ngereja tuju Iya. (Matthew 1:18) Maria dipadahka, ‘Roh Kudus deka datai atas nuan, lalu kuasa Petara ti Pemadu Tinggi deka ngayung nuan. Nya alai anak mit ti deka diadaka nya kudus. Iya deka dikumbai Anak Allah Taala.” b (Luke 1:35) Enggau pengawa ajih Petara mindahka nyawa Jesus ngagai kandung Maria, lalu Maria pan betubuh bisi.

 Nama kebuah Jesus patut diadaka seiku indu dara bungas?

 Jesus nadai apai mensia ti enda sempurna. Petara empu mindahka nyawa Jesus ke dalam perut Maria ke agi dara bungas. Enggau chara tu, Jesus tetap sempurna taja pan iya diadaka mensia ke enda sempurna, lalu agi ulih nyelamatka mensia ari dosa enggau pemati. (John 3:16; Hebrew 10:5) Lebuh Jesus dalam kandung Maria, kuasa Petara tentu nyaga iya ari semua utai ke enda sempurna tauka murih semua utai ke enda sempurna.—Luke 1:35.

 Nya alai, Jesus ada sempurna baka Adam keterubah iya digaga. Bup Kudus madahka pasal Jesus, “nadai kala bedosa.” (1 Peter 2:22) Laban Jesus nya sempurna, iya ulih mayar tebus nya lalu nyelamatka mensia ari dosa enggau pemati.—1 Korint 15:21, 22; 1 Timoti 2:5, 6.

 Kati Maria terus nyadi indu dara bungas?

 Bup Kudus nadai madahka Maria nyadi dara bungas sepemanjai pengidup iya. Tang, Bup Kudus bisi nunjukka Maria ngembuan beberapa iku anak ke bukai.—Matthew 12:46; Mark 6:3; Luke 2:7; John 7:5.

Bup Kudus nulis, Jesus ngembuan beberapa iku menyadi

 Kati pengada Jesus ari indu dara bungas Maria sama enggau ajar “Immaculate Conception”?

 Enda. Nitihka New Catholic Encyclopedia, ajar Immaculate Conception reti iya “ajar ti ngumbai indu dara bungas Maria nadai Dosa berengka ari iya idup, reti nya berengkah ari iya agi ba dalam kandung. Semua mensia ke bukai bisi dosa . . . Tang Maria, ketegal iya bulih PELUANG ti spesial tu, iya dijaga ngambika bibas ari dosa asal.” c

 Tang, Bup Kudus nadai kala ngajar Maria bibas ari dosa asal, iya nya dosa ke datai ari Adam. (Masmur 51:5; Rome 5:12) Indah Maria empu nemu diri mensia ti bedosa. Iya ngenjuk pemeri ti bekaul enggau mensia ti bedosa baka ke udah ditetapka dalam Adat Moses ngagai orang indu ke baru udah ngadaka anak. (Adat Lewi 12:2-8; Luke 2:21-24) New Catholic Encyclopedia madahka, “Nadai bukti ti terang nunjukka Bup Kudus nyukung ajar Immaculate Conception . . . [Nya] ajar ke datai ari gerija.”

 Nama runding ti patut pasal Maria?

 Maria nya teladan ti manah ke kitai. Iya ngembuan pengarap ti kering, tetap ati, baruh ati, sereta amat rinduka Petara. Iya seiku ari nembiak Petara ke tetap ati ke patut ditunda kitai.—Hebrew 6:12.

 Taja pan Maria bisi peluang ti spesial nyadi indai Jesus, tang Bup Kudus nadai ngajar kitai patut nyembah sereta besampi ngagai iya. Jesus empu enda kala ngumbai indai iya patut disembah. Jesus mega enda kala ngajar indai iya patut nerima basa ti lebih ari orang bukai. Indah nama Maria semina disebut sekali aja dalam bup Kereja Rasul. Nama iya enda kala disebut dalam 22 iti bup bukai ke selalu iya dikumbai Sempekat Baru.—Kereja Rasul 1:14.

 Bup Kudus mega nadai kala nulis pasal orang Kristian kelia meri basa ti lebih ngagai Maria, kelebih agi nyembah iya. Bup Kudus semina madahka, orang Kristian patut nyembah Petara.—Matthew 4:10.

a Jaku Hebrew ‘dara bungas’ ke dikena Isaiah iya nya ʽal·mahʹ, ti mai reti indu ke agi dara ke bedau belaki tauka ukai dara. Tang ba baruh iring Petara, Matthew ngena jaku Gerika par·theʹnos. Tu endang sigi mai reti ‘dara bungas’.

b Bisi sekeda orang enda entu deka ngena leka jaku ‘Anak Petara’ laban sida ngasaika leka jaku tu baka Petara jadi tauka kawin enggau seiku indu. Ajar ke baka tu nadai dalam Bup Kudus. Bup Kudus ngumbai Jesus nya ‘Anak Petara’ sereta utai keterubah ditempa laban Jesus meh utai keterubah ditempa Petara lalu semina Iya aja ke amat digaga Petara enggau jari Iya empu. (Kolosi 1:13-15) Indah dalam Bup Kudus mega ngumbai mensia keterubah, Adam, ‘Anak Petara’. (Luke 3:38) Laban Adam pan ditempa Petara.

c Edisi kedua, Pelajar 7, lambar 331.