Terus ngagai penerang

Nama Reti ‘Bebasaka Apai enggau Indai Nuan’?

Nama Reti ‘Bebasaka Apai enggau Indai Nuan’?

Saut ari Bup Kudus

 Pesan ke ngasuh ‘bebasaka apai enggau indai nuan’ udah suah ayan dalam Bup Kudus. (Pemansut. 20:12; Ulang Adat 5:16; Matthew 15:4; Epesus. 6:2, 3) Bisi empat iti chara.

  1.   Beterima kasihka sida. Nuan bebasaka apai enggau indai nuan lebuh nuan beterima kasihka semua utai ke udah digaga sida. Nuan ulih nunjukka nya ari nitihka iring sida. (Jaku Dalam 7:1, 2; 23:26) Dalam Bup Kudus bisi meransang nuan “temegahka” sida.—Jaku Dalam 17:6.

  2.   Nerima kuasa sida. Kelebih agi lebuh nuan agi biak, nuan bebasaka apai enggau indai lebuh nuan nemu nama kuasa ke diberi Petara ngagai sida. Kolosi 3:20 madahka bala nembiak: ‘Kita ke anak, ngasika apai indai kita dalam semua utai, laban nya ngerinduka ati Petara.’ Indah Jesus empu mega ngasika apai indai iya lebuh iya agi nembiak.—Luke 2:51.

  3.   Bebasaka sida. (Adat Lewi 19:3; Hebrew 12:9) Tu bekaul enggau utai ke disebut nuan sereta chara nuan bejaku. Amat, kekadang sekeda apai indai bisi ngereja utai ke ngasuh anak pedis deka bebasaka sida. Taja pia, anak ulih nunjukka basa ngagai apai indai enti sida enda bejaku kasar sereta nyeliahka diri ari ngayanka ulah ti enda manah. (Jaku Dalam 30:17) Bup Kudus bisi ngajar, bejaku kasar ngagai apai indai nya penyalah ti besai.—Matthew 15:4.

  4.   Nyediaka utai guna sida. Lebuh apai indai udah tuai, sida begunaka tulung ari nuan. Nuan ulih bebasaka sida ari enggau naka ulih nyediaka utai ti diguna sida. (1 Timoti 5:4, 8) Ngambika chunto, enda lama sebedau iya mati, Jesus ngatur ngambika indai iya dijaga.—John 19:25-27.

Penemu ti salah pasal bebasaka apai indai

 Penemu ti salah: Kena ngayanka basa ngagai apai indai, nuan patut nejuka sida ngatur tikah nuan.

 Ke bendar: Bup Kudus ngajar kaul melaki bini lebih ari kaul enggau diri sebilik ke bukai. Pemungkal 2:24 madah: “Nya kebuah lelaki ninggalka apai indai iya, lalu begulai enggau bini iya, lalu seduai iya nyadi siku.” (Matthew 19:4, 5) Endang amat, laki bini tau bulih lalau ti manah ari apai indai sida tauka ari bala mentua sida. (Jaku Dalam 23:22) Tang, laki bini empu patut ngeletak naka ni takat kaban belayan ulih masuk champur ba ruang bilik sida.—Matthew 19:6.

 Penemu ti salah: Apai indai nuan bisi kuasa ti nadai takat.

 Ke bendar: Taja pan Petara udah meri apai indai kuasa dalam diri sebilik, tang semua orang bisi takat diri empu–sida enda ulih lebih ari kuasa Petara. Sama baka, lebuh perintah ngasuh murid Jesus enda ngasika Petara, sida nyaut: ‘Kami enda tau enda ngasika Petara, ukai mensia.’ (Kereja Rasul 5:27-29) Nya kebuah, anak mega ngasika apai indai sida ‘dalam Tuan,’ reti nya ba semua utai ke enda ngelanggar adat Petara.—Epesus 6:1.

 Penemu ti salah: Bebasaka apai indai nuan ari nitihka pengarap sida.

 Ke bendar: Bup Kudus meransang kitai meresa utai ke diajar ngagai kitai kena nemu sekalika nya pemendar tauka enda. (Kereja Rasul 17:11; 1 John 4:1) Nyau kelama, orang ke ngereja tu engka milih pengarap ke enda sebaka enggau apai indai iya. Bup Kudus bisi madahka mayuh ari nembiak Petara ke taluk enda nitihka pengarap apai indai sida, nya nyengkaum Abraham, Rut, enggau rasul Paul.—Joshua 24:2, 14, 15; Galatia 1:14-16, 22-24.

 Penemu ti salah: Kena bebasaka apai indai nuan, nuan enda tau enda ngereja adat ke bekaul enggau nyembah bala peturun ke udah nadai.

 Ke bendar: Bup Kudus madah: ‘Sembah Jehovah Petara nuan, lalu betuaika Iya siku aja!’ (Luke 4:8) Orang ke nyembah bala peturun enda ngenyamaika ati Petara. Nambahka agi, Bup Kudus ngajar “orang ke mati nadai nemu utai.” Sida enda ulih ngasaika nama-nama agi; tauka sida mega enda ulih nulung sereta ngemediska utai ti agi idup.—Pemungkal 9:5, 10; Isaiah 8:19.