Terus ngagai penerang

TULUNG KE DIRI SEBILIK

Chara Nulung Anak Nuan Lebuh Sida Enda Mujur

Chara Nulung Anak Nuan Lebuh Sida Enda Mujur

Enda ngira maya, anak nuan tentu bisi napi ati ti asa tauka enda mujur ba pengidup sida. Baka ni nuan ulih nulung lebuh sida enda mujur?

 Utai ke patut ditemu nuan

Semua kitai kala ngasaika enda mujur. Bup Kudus madah, “semua kitai bela ngereja mayuh macham penyalah.” (James 3:2) Pia mega enggau bala anak. Tang, utai ke enda mujur nya ngajar kitai reti tan sereta liat ati. Anak mit enda terus ada lalu ngembuan pemanah tu. Ku seiku indai ke benama Laura madah, “Ari peneleba kami, aku enggau laki aku nemu anak kami tentu napi ati ti asa tauka enda mujur ba sekeda utai. Manah agi enti sida belajar napi nya, ari ke pepura baka ke nadai nama-nama nyadi.” Iya nambah, “Sida belajar sabar lebuh sekeda utai enda nitihka peneka sida.”

Lebuh enda mujur, mayuh anak mit enda nemu chara napi nya. Sekeda anak mit enda nemu chara napi utai ke enda mujur ba pengidup sida, laban apai indai enda ngajar sida chara betanggungjawapka penyalah diri. Chunto, enti seiku anak mit bulih peresa ti enda manah, apai indai terus nyalahka cikgu. Enti sida belaya enggau anak mit bukai, apai indai selalu nanahka anak diri empu.

Iya ke amat, anak mit enda ulih belajar betanggungjawapka penyalah diri, enti apai indai selalu nyaga sida ari pengawa salah ke digaga sida.

 Utai ke ulih digaga nuan

  • Padah ngagai anak nuan, tiap iti pengawa nya tentu bisi asil iya.

    Bup Kudus bisi ajar, “Kita deka ngetau utai ti ditanam kita empu.”—Galatia 6:7.

    Anak mit patut diajar, tiap iti pengawa sereta pemutus sida tentu bisi asi iya. Enti kitai ngenyaika utai orang bukai, kitai patut mayar ganti rugi. Enti kitai ngereja penyalah, kitai patut napi penanggul iya. Nya alai, anang nyalahka orang tauka ngiga kebuah nanahka anak nuan. Tang, nitihka umur sida, tejuka sida ngasaika asil enda manah ari penyalah ke dikereja sida. Udah nya, tulung sida meda enggau terang pasal penyalah diri enggau asil iya.

  • Tulung anak nuan ngiga chara mutar.

    Prinsip Bup Kudus: “Orang ke lurus ati nyangka rebah tujuh kali, lalu sida angkat baru.”—Jaku Dalam 24:16.

    Enda mujur nya ulih ngenusah ati, tang nya ukai ujung. Lebuh utai ke enda lurus nyadi, tulung meh anak nuan ngiga chara mutar, ukai nyalahka orang bukai. Ngambika chunto, enti anak lelaki nuan enda mujur ba peresa, tulung meh iya ngambi ransing agi belajar, lalu bulih peresa ti manah dudi hari. (Jaku Dalam 20:4) Enti anak indu nuan bisi laya enggau kaban iya, enda ngira sapa salah tauka betul, ajar meh iya chara nyadi orang keterubah ngenuluka pemaik.—Rome 12:18; 2 Timoti 2:24.

  • Tulung anak nuan nyadi baruh ati.

    Prinsip Bup Kudus: “Anang ngumbai diri pama agi ari ti patut.”—Rome 12:3.

    Anang madahka anak nuan, iya manah agi ari orang bukai. Nya enda nulung iya chara mutarka penanggul. Nama kebuah? Indah anak mit ke pandai pan enda ulih bulih markah penuh ba peresa, tauka anak mit ke landik sukan mega enda ulih selalu nyadi pemenang dalam tiap iti pekit. Anak mit ke baruh ati ulih napi utai ke enda mujur tauka ati ti asa ba pengidup enggau chara ti manah agi.

    Bup Kudus madah, penanggul ke ditapi ulih ngasuh kitai liat ati, lalu nulung kitai tan agi. (James 1:2-4) Taja pan enda mujur ulih ngasuh ati tusah, tang nuan ulih nulung anak nuan ngemansangka pemanah bukai.

    Ngajar anak begunaka awak sereta pengering. Pia mega, ngajar anak nuan ngemansangka ati ti tan mega begunaka awak sereta pengering. Tang, nuan ulih meda pemanah nya maya anak nuan mansang besai. Bup Letting Go With Love and Confidence madah, “Nembiak ke udah pandai napi penanggul, enda ngiga jalai muntang taja pan sida benung ditekan.” Bup tu mega madah, nembiak ke nemu chara mutarka penanggul senang deka begulai enggau orang sereta senang diengkah ba dini-dini. Tu tentu nulung sida seraya sida mansang besai.

Chara: Nyadi teladan ti manah. Kingatka, chara nuan mutarka sesiti penanggul dipeda anak nuan. Lalu sida deka neladan chara nuan.