Terus ngagai penerang

Saksi-Saksi Jehovah

Pilih bansa jaku Iban

TULUNG KE DIRI SEBILIK

Lebuh Enda Sepenemu

Lebuh Enda Sepenemu

Dalam tikah, endang bisi maya laki bini enda sepenemu. Chunto iya pasal hobi, utai ke suah dikereja, tauka ulah seseiku orang. Kekadang, runding ke enda sepenemu tu tusah diputarka, kelebih agi enti nya bekaul enggau utai ke ngasuh enda nyamai ati, baka:

  • Ni penyuah nuan begulai enggau ruang bilik ti besai

  • Chara ngatur belanja

  • Deka bisi anak tauka nadai

Nama ulih digaga nuan enti kaling nuan enda sepenemu?

 Utai ke patut ditemu nuan

Ulih begulai ukai reti iya sepenemu. Laki bini ke ulih begulai enggau pangan diri ukai reti iya seruran sepenemu, indah ba pekara ti berat.

“Diri sebilik aku rindu beserumpu enggau pangan diri. Ba ujung minggu, kami selalu beserumpu enggau aki, ini, aya, ibu, sereta bala petunggal aku. Tang, diri sebilik laki aku jarang amat beserumpu enggau pangan diri. Nya kebuah, aku enggau laki aku selalu enda sepenemu pasal beserumpu enggau diri sebilik, tauka berandau enggau diri sebilik ke jauh ari kami.”—Tamara.

“Ketegal chara aku enggau bini aku dibesaika enda sama, chara kami ngatur belanja pan enda sama. Maya baru kawin, kami selalu belaya pasal utai tu. Lalu, penanggul nya pan enda jampat diputarka, taja pan kami udah beberapa kali berandauka nya.”—Tyler.

Dua iku orang ulih ba endur ti sama, tang seduai iya engka beratika utai ti enda sama. Pia mega, laki bini engka bisi penemu ti enda sama pasal sesiti pekara

Ukai semua penanggul ulih diputarka enggau jampat. Chunto, baka ni enti mentua nuan enda disadang sakit lalu patut dijaga? Tauka, baka enti kaling nuan deka bisi anak, tang nuan enggai? *

“Aku enggau bini aku, udah suah berandau panjai pasal deka bisi anak tauka enda. Tang nyau kelama, iya majak inginka anak. Kami majak enda sepenemu pasal pekara tu. Aku tusut runding pasal mutarka penanggul tu.”—Alex.

Ukai reti iya tikah nuan enda mujur ketegal enda sepenemu. Nitihka runding mayuh orang, enti Nuan enggau kaling Nuan enda sepenemu ba pekara ti berat, Nuan patut bebendar ngetanka penemu diri, taja pan nya engka ulih ngujungka sarak nyadi. Tang, nya chara ke berundingka diri empu. Nya mega nunjukka nuan enda beberatka semaya nuan ba mua Petara ti kala madahka diri deka tetap ati ngagai kaling pengidup nuan enda ngira maya tusah tauka senang.

 Utai ke ulih dikereja nuan

Anang enda ingatka semaya nuan deka mengkang tetap ati. Enti nuan seruran ingatka utai tu, seduai ulih nyadi siti tim, lalu ulih mutarka penanggul ke enda sepenemu.

Prinsip Bup Kudus: “Nadai orang tau nyeraraka utai ti udah ditampilka Petara.”—Matthew 19:6.

Perundingka pemanah enggau pengurang iya: Chunto, bini engka dekaka anak, tang laki enggai. Bisi beberapa iti utai ke patut diperundingka, baka:

  • Ni pengetan tikah nuan.

    Kati seduai ulih napi stres ke engka ditapi ketegal ngemesaika anak?

  • Tanggung pengawa nyadi apai indai.

    Nyadi apai indai ukai semina nyediaka pemakai, gari, sereta endur diau.

  • Belanja nuan.

    Kati nuan ulih ngatur awak ba entara kereja, ruang bilik, sereta utai bukai?

Prinsip Bup Kudus: “Laban sapa ari bala kita ke deka ngaga sebuah menara, enda dulu ngira ungkus utai nya, ngambika iya nemu sekalika iya bisi duit kena nembuka pengawa nya?”—Luke 14:28.

Pikirka utai ke ngasuh seduai enda sepenemu. Pengudah mikirka utai tu, tentu bisi sekeda pekara nya ngasuh seduai sepenemu. Chunto, enti seduai bedau sepenemu pasal bisi anak tauka nadai, kaling pengidup ke enggai ngembuan anak ulih berundingka:

  • ‘Lebuh aku madahka diri enggai ngembuan anak, kati nya reti iya, aku endang enggai bisi anak tauka bedau sedia ke diatu?’

  • ‘Kati aku irau enggai ke aku enda ulih nyadi apai tauka indai ti manah?’

  • ‘Kati aku irau, enti kami bisi anak, kaling aku enda tentu ibuhka aku agi?’

Pia mega, kaling pengidup ke deka ngembuan anak mega patut berundingka:

  • ‘Kati kami udah sedia nyadi apai indai?’

  • ‘Kati kami chukup belanja kena ngemesaika anak?’

Prinsip Bup Kudus: “Penemu-dalam ti datai ari atas . . . nelap.”—James 3:17.

Giga meh pemanah ari penemu kaling pengidup nuan. Dua iku orang ulih ba endur ti sama, tang seduai iya engka beratika utai ti enda sama. Pia mega, laki bini engka bisi penemu ti enda sama pasal sesiti pekara, chunto iya pasal ngatur belanja. Nya alai, lebuh berandauka pekara nya, giga meh penemu ti sama ba seduai.

  • Nama utai ke jemah ila ti deka digaga seduai?

  • Nama pemanah ari penemu ke diberi kaling nuan?

  • Ngambika tikah seduai ulih tan, kati ulih seiku ari seduai tauka sama bela seduai ngalahka diri, ngambi ulih sepenemu?

Prinsip Bup Kudus: “Anang berundingka diri empu aja, tang berunding ke orang bukai.”—1 Korint 10:24.

^ per. 14 Utai ti berat patut dikerandauka dulu sebedau kawin. Taja pia, pengudah kawin, agi bisi utai ke enda disadang tau nyadi, pia mega, engka penemu kaling nuan mega ulih berubah.—Pengajar 9:11.