Terus ngagai penerang

NELADAN PENGARAP SIDA | JONATAN

Seduai Iya Nyadi Kaban ti Rapat

Seduai Iya Nyadi Kaban ti Rapat

Perang udah badu, nadai bunyi agi ba Lebak Elah. Angin bepuput lebuh maya tengah hari. Raja Saul betemu enggau sekeda nembiak iya. Jonatan, anak iya ti pemadu tuai, bisi dia mega. Seiku pengibun bedus ti biak, enggau gagit nusuika cherita diri. Pengibun bedus nya David, lalu iya penuh enggau pengeransing. Saul ninga enggau manah ngagai semua cherita David. Tang, baka ni enggau pengasai ati Jonatan? Iya udah mayuh menang ba perang lebuh iya nyadi seiku ari raban soldadu Jehovah. Tang ukai Jonatan ke nguluka menang saritu; David ke ngulu. David udah munuh seiku soldadu ke besai gamal, Goliat! Kati Jonatan papas ke semua puji ke diberi ngagai David?

Nuan engka tekenyit enggau saut Jonatan. Bup Kudus madahka: “Lebuh Saul udah bejaku enggau David, anak Saul ke benama Jonatan balat amat tetarit ati ngagai David, lalu belabuh rinduka iya baka ke rinduka diri empu.”Jonatan meri ngagai David perengka perang iya empu ke nyengkaum siti panah. Tu pemeri ti chukup besai laban Jonatan amat tebilang ketegal pengelandik iya ngena panah. Tang utai ke berat agi, Jonatan ngaga siti sempekat enggau David ke ngasuh seduai nyadi kaban ti rapat ke ulih nyukung pangan diri.—1 Samuel 18:1-5.

Lalu, berengkah meh siti cherita pasal kaul dua iku kaban ti amat rapat ke kala ditulis ba Bup Kudus. Orang ke bepengarap endang begunaka kaban. Enti kitai milih kaban enggau bejimat, lalu kitai empu nyadi seiku kaban ti ulih nyukung orang bukai sereta taluk, kitai deka negapka agi pengarap pangan diri. (Jaku Dalam 27:17) Nya alai, aram kitai beratika utai ke ulih dipelajar pasal bekaban ari Jonatan.

Pugu Semua Kaul Entara Kaban

Baka ni seduai tau nyadi kaban enggau jampat? Tu bepanggai ba pugu kaul entara seduai ke nyadi kaban. Uji perundingka tu. Jonatan benung napi siti timpuh ti chukup tusah. Apai iya, Raja Saul, udah mayuh berubah lalu nyadi majak jai sejai. Suba apai iya seiku nembiak ti tetap ati, tang diatu, iya udah nyadi sumbung sereta seiku raja ti enda ngasi.—1 Samuel 15:17-19, 26.

Jonatan tentu tusah ati meda apai iya berubah laban iya amat rapat enggau apai iya. (1 Samuel 20:2) Jonatan engka berunding penusah ke deka dibai Saul ngagai bansa ke dipilih Jehovah. Kati ulah raja ti enda ngasi deka ngasuh rayat limpang lalu lenyau berekat ari Jehovah? Endang amat, tu maya ti tusah ngagai Jonatan laban iya tetap ati ke Jehovah.

Penerang nya nulung kitai mereti kebuah Jonatan amat rapat enggau David. Jonatan ulih beratika pengarap David ti tegap. Kingatka meh, enda baka soldadu Saul, David enda takut ke pemesai tubuh Goliat. Iya berunding, enti sema iya datai belaban ngena nama Jehovah, nya deka ngasuh iya kering agi ari Goliat enggau semua perengka perang iya.—1 Samuel 17:45-47.

Betaun-taun sebedau nya, Jonatan pan ngembuan runding ti sebaka. Iya chukup andal. Dua iku lelaki—Jonatan enggau seiku agi ke mai senyata—ulih ngalahka seraban soldadu. Nama kebuah iya ulih andal? Ku Jonatan madahka: ‘Jehovah deka nyaup tua. Enti Iya nyaup tua, nadai utai ulih nagang Iya ngasuh tua menang.’ (1 Samuel 14:6) Nya alai, Jonatan enggau David ngembuan utai ti sama: pengarap ti tegap sereta pengerindu ti dalam ngagai Jehovah. Nya meh pugu kaul seduai ke nyadi kaban. Taja pan Jonatan nya seiku anak raja sereta nyau deka beumur 50 taun, lalu David nya seiku pengibun bedus ke engka bedau beumur 20 taun agi, seduai agi ulih nyadi kaban ti rapat.  *

Sempekat ke digaga seduai endang beguna ke kaul entara seduai. Nama kebuah? Uji perundingka tu. David nemu Jehovah dekaka iya nyadi raja Israel pengudah Saul! Kati iya ngelalaika tu ari Jonatan? Enda! Kaul entara kaban ti bendar deka nyadi kering agi enti sida nyebut utai ke amat, ukai belalai tauka madahka utai ti bula. Nama deka nyadi ngagai pengasai ati Jonatan lebuh iya nemu pasal David ke deka nyadi raja? Baka ni enti Jonatan bisi pengingin deka nyadi raja dudi hari lalu mutarka semua pengawa apai iya ti salah? Bup Kudus nadai madahka Jonatan ngembuan runding ti negatif pasal pekara nya, tang iya semina madahka utai ti beguna, iya nya, penaluk sereta penetap ati Jonatan. Iya ulih meda berekat Jehovah ba David. (1 Samuel 16:1, 11-13) Nya alai, Jonatan ngamatka semaya iya. Iya ngumbai David nya kaban iya, ukai munsuh. Jonatan dekaka peneka Jehovah nyadi.

Jonatan enggau David bela ngembuan pengarap ti tegap sereta pengerindu ti dalam ngagai Jehovah

Kaul seduai ke nyadi kaban mai mayuh berekat. Nama ulih dipelajarka kitai ari pengarap Jonatan? Nembiak Petara sigi ulih meda kebuah ngembuan kaban nya beguna bendar. Kaban kitai enda ibuh serambau tauka ngembuan adat ti sebaka, tang sida ulih mai mayuh penguntung enti pengarap sida bendar. Jonatan enggau David ulih suah meransang sereta ngeringka pangan diri. Lalu, tu utai ke diguna seduai, laban kaul seduai ke nyadi kaban deka napi mayuh penguji ti balat agi.

Penanggul Deka Nentuka Ngagai Sapa Patut Taluk

Lebuh keterubah iya, Saul amat rinduka David, indah ngeletak David nyadika tuai soldadu. Tang nyau kelama, Saul nejuka diri nyadi mansa ngagai munsuh ke enda ulih ngalahka Jonatan—ati ti kepapas. David mayuh menang ngelaban orang Pilistin, munsuh orang Israel. Nya alai, mayuh orang muji David. Sekeda indu orang Israel indah belagu: “Saul udah munuh beribu iku, tang David udah munuh bepuluh ribu iku.” Saul enda rinduka lagu nya. Ku ayat Bup Kudus nya nyambung: “Nya alai berengkah ari sehari nya Saul belabuh kepapaska David.” (1 Samuel 18:7, 9) Iya irauka David deka ngerampas hak iya nyadi raja. Nya runding ti beli. Endang amat, David nemu diri deka nyadi raja pengudah Saul, tang David enda kala berunding deka ngerampas hak Saul ke nyadi raja laban Saul pan raja ke dipilih Jehovah!

Saul ngaga pelan ngambika David dibunuh lebuh beperang, tang enda mujur. David terus menang mayuh perang lalu rayat berengkah rindu sereta bebasaka iya agi. Saul lalu madah ngagai semua ulun iya sereta anak iya ke pemadu tuai pasal runding iya ti deka munuh David, lalu ngarapka sida deka nyukung pelan iya. Gambarka asai ati Jonatan. Iya tentu pedis ati meda apai iya baka nya! (1 Samuel 18:25-30; 19:1) Jonatan anak ti taluk, tang iya mega seiku kaban ti taluk. Diatu penaluk iya diuji. Ngagai sapa Jonatan deka taluk?

Jonatan madahka: ‘Tuan, anang besalah David, laban iya nadai kala ngereja utai ti salah ngagai nuan. Semua utai ti udah dikereja iya sigi bisi guna magang ba nuan. Iya berambunka nyawa diri lebuh iya munuh Goliat, lalu Jehovah ngasuh orang Israel menang. Lebuh nuan meda nya, ati nuan gaga. Nya alai, nama kebuah nuan deka ngereja utai ti salah ngagai orang ke nadai penyalah, lalu deka munuh David enggau nadai kebuah?’ Lalu enda memukai, Saul madahka diri deka ningaka jaku Jonatan sereta besemaya enda ngemediska David. Tang Saul enda ngamatka semaya diri. Maya David bulih mayuh agi pemujur ba perang, Saul amat ringat nyentukka iya numbukka sangkuh iya ngagai David! (1 Samuel 19:4-6, 9, 10) Tang David mujur ngerarika diri ari Saul.

Kati nuan kala patut ngaga pemutus pasal penaluk diri? Kadang-kadang tusah deka ngaga pemutus. Ba sekeda pekara, engka orang ngasuh kitai ngenuluka diri sebilik. Tang Jonatan nemu, nya ukai pemutus ti betul. Baka ni ku iya deka nanahka apai iya ti enda ngasi lalu enda nanahka David ke taluk sereta ngasika Jehovah? Nya alai, Jonatan ngawakka penaluk iya ngagai Jehovah ke nentuka pemutus iya lalu iya mutuska deka nanahka David. Penaluk Jonatan ngagai Petara endang dikenuluka, tang iya mega tetap taluk ngagai apai iya enggau chara meri jaku lalau ti betul ari ke semina madahka utai ke deka didinga apai iya aja. Tiap iku ari kitai deka bulih penguntung enti kita neladan penaluk Jonatan.

Naka ni Ulih Taluk

Jonatan nguji sekali agi mutarka laya entara Saul enggau David tang kali tu Saul enggai mendingka iya. David belalai betemu enggau Jonatan laban takut enggaika diri bebadi. Ku David ngagai Jonatan: “Aku nyau deka mati!” Jonatan besetuju deka mansik pengasai Saul pasal David lalu madahka ngagai David enti sema Saul deka bebaik enggau iya. Lebuh David ngelalaika diri, Jonatan deka madahka berita nya ngena panah enggau laja. Jonatan semina minta David ngamatka semaya ke udah digaga: ‘Pandangka penaluk nuan ngagai kami sebilik belama iya. Lebuh Jehovah udah ngeluska semua munsuh nuan.’ David besemaya deka seruran nyaga sida Jonatan sebilik.—1 Samuel 20:3, 13-27.

Jonatan nguji bejaku ngagai Saul pasal David, tang raja nya nyau ringat! Iya ngumbai Jonatan “anak ti nadai guna” lalu madahka penaluk iya ke David ngemaluka nama diri sebilik. Saul lalu nguji narit ati Jonatan. Ku iya madahka: “Seagi-agi David mengkang idup, nuan enda ulih nyadi raja menua tu.” Tang penaluk Jonatan enda berubah, lalu iya nyaut: “Nama kebuah iya enda tau enda mati? Nama utai ti udah dikereja iya?” Saul tekalanya nyadi orang ti amat mangah! Taja pan Saul udah tuai, tang iya agi seiku soldadu ti kering. Iya numbukka sangkuh ngagai anak iya empu! Enda ngira ni pengelandik Saul ngena sangkuh, iya enda mujur. Jonatan berasai pedis sereta malu, lalu iya enggau ati ti ringat angkat ari endur nya.—1 Samuel 20:24-34.

Jonatan mujur ngelaban penguji ke ngasuh iya berundingka diri empu

Hari siti, Jonatan datai betemu enggau David semak endur iya ngelalaika diri. Iya ngena panah enggau laja madahka ngagai David pasal pengingin Saul ke endang deka munuh iya. Udah nya Jonatan ngasuh nembiak ke sama enggau iya pulai ke nengeri. Diatu Jonatan seduai David kediri, nya alai seduai bisi peluang bejaku enda lama. Seduai nyabak lalu Jonatan enggau ati ti tusah meda aja lebuh David mupuk berengkah pengidup iya nyadi orang pelari.—1 Samuel 20:35-42.

Jonatan ngayanka diri taluk sereta enda berundingka diri taja pan napi utai ti tusah. Munsuh tiap iku orang ke tetap ati, Sitan, tentu rindu meda Jonatan nitihka singkang Saul lalu ngenuluka peneka diri empu kena ngulihka kuasa tauka mulia. Kingatka, Sitan rindu ngena asai ati mensia ke deka ngenuluka diri empu. Iya udah mujur ngelimpangka Adam seduai Awa. (Pemungkal 3:1-6) Taja pia, iya enda mujur ba Jonatan. Sitan tentu balat ringat! Kati nuan deka ngelaban penguji ti baka nya? Kemayaharitu, runding ke ngenuluka diri empu tau dipeda ba dini-dini endur. (2 Timoti 3:1-5) Kati nuan deka belajar ari teladan Jonatan ke taluk sereta enda berundingka diri empu?

Laban Jonatan kaban ti taluk, iya meri tanda ke nulung David nyelamatka diri ari utai ke tau ngasuh iya bebadi

“Naka Meh Pemalat Aku Sayauka Nuan”

Nyau kelama, pemenchi Saul ngagai David balat ngachau runding sereta pengasai iya. Jonatan semina ulih meda aja apai iya nyadi baka orang gila, nguluka soldadu ngelingi menua, ngiga sereta deka munuh seiku lelaki ke enda besalah. (1 Samuel 24:1, 2, 12-15; 26:20) Kati Jonatan sama enggau? Bup Kudus nadai sekali pan madahka Jonatan bisi enggau pengawa ti enda lurus tu. Tu ketegal Jonatan taluk ngagai Jehovah, David, sereta semaya seduai ke nyadi kaban.

Asai ati Jonatan ngagai kaban iya ti biak tu enda kala berubah. Nyau kelama, iya bisi peluang betemu baru enggau David ba endur ti dikumbai Hores ke bererti “Endur ke Mayuh Pun Kayu.” Hores nya ba endur bebukit ti engka beberapa batu ari tenggara Hebron. Nama kebuah Jonatan deka berambunka nyawa diri betemu enggau pelari tu? Bup Kudus madahka, tuju iya kena nulung David bepanggai ba Jehovah ke meri pengering. (1 Samuel 23:16) Baka ni Jonatan ngereja nya?

Ku Jonatan ngagai David: “Anang takut.” Udah nya, iya nambahka jaku ke ngasuh David andal agi: “Apai aku Saul enda ulih ngemediska nuan.” Pengandal tu bepelasarka nama? Tu bepelasarka pengarap Jonatan ti tegap ngagai Jehovah ke deka nentuka semaya ke dipadah Iya endang deka dikeamatka. Ku iya agi: “Nuan deka nyadi raja orang Israel.” Nabi Samuel udah madahka tu beberapa taun ti udah, lalu Jonatan ngingatka David pasal jaku Jehovah ke seruran tau dikearapka. Lalu nama runding Jonatan pasal utai ke digaga iya dudi hari? Iya madah: “Aku deka nyadi lumur dua nuan.” Iya amat baruh ati! Iya puas ati gawa ba baruh lelaki ke biak 30 taun ari iya lalu nyukung iya! Lalu ke pengujung iya, Jonatan madahka: “Iya [Apai] sigi nemu.” (1 Samuel 23:17, 18) Ba ati Saul, iya nemu, endang nadai chara iya deka menang ngelaban lelaki ke udah dipilih Jehovah nyadika raja pengudah iya!

Jonatan meransang David maya iya begunaka nya

Ba taun-taun ke nangkanka nya, lebuh David ngenang baru lebuh maya iya betemu enggau Jonatan, iya tentu gaga ati. Tang nya meh ke penudi iya seduai betemu. Sinu amat, pengingin Jonatan ke deka nyadi orang lumur dua ke David puntan.

Jonatan enggau apai iya beperang ngelaban orang Pilistin ke sigi udah madahka diri deka nyadi munsuh orang Israel. Iya ulih sama beperang ba sepiak apai iya enggau ati ti beresi laban Jonatan seruran ngenuluka pengawa iya ke Jehovah, enda ngira nama penyalah ke digaga apai iya. Jonatan enggau berani sereta taluk ngelaban orang Pilistin. Tang pengujung iya enda manah ngagai orang Israel. Saul udah nyadi chukup jai. Iya indah ngena pengawa bemanang, siti dosa ti chukup besai ba baruh Adat Petara. Nya alai, Jehovah enda agi merekatka Saul. Tiga iku anak lelaki Saul, nyengkaum Jonatan, dibunuh lebuh beperang. Saul balat amat bakal lalu iya munuh diri.—1 Samuel 28:6-14; 31:2-6.

Ku Jonatan madahka: “Nuan deka nyadi raja orang Israel, lalu aku deka nyadi lumur dua nuan.”—1 Samuel 23:17

David amat tusah ati. Lelaki ke siru sereta pengampun tu indah tusah ati ke Saul taja pan Saul balat amat ngenusahka pengidup iya! David mega nuliska leka lagu sabak ke Saul seduai Jonatan. Engka leka sabak ke pemadu negu ati nya, leka ari David ke kaban iya ti rapat: “Aku nyabakka nuan, menyadi aku Jonatan. Naka meh pemalat aku sayauka nuan! Pengerindu nuan ke aku endang amat besai, lebih agi ari pengerindu sida ke indu.”—2 Samuel 1:26.

David seruran ingatka semaya iya ngagai Jonatan. Betaun-taun udah nya, iya ngiga anak Jonatan ke tachat, Mepiboset. (2 Samuel 9:1-13) Terang amat, David udah belajar mayuh ari penaluk, penetap ati, sereta pengeran Jonatan ke deka semampai taluk ngagai kaban iya taja pan tusah. Kati kitai mega ulih belajar ari tu? Kati kitai deka ngiga kaban baka Jonatan? Kati kitai empu tau ngayanka diri nyadi seiku kaban baka Jonatan seduai David? Kitai tau nyadi seiku kaban baka Jonatan enti kitai nulung bala kaban ngering sereta neguhka pengarap sida ngagai Jehovah, ngenuluka penaluk ngagai Jehovah, sereta meruan taluk ngagai pangan diri ari ke berundingka diri empu. Enggau tu kitai deka neladan pengarap Jonatan.

^ per. 10 Jonatan keterubah iya disebut dalam Bup Kudus lebuh maya Saul berengkah merintah. Iya nyadi tuai soldadu. Nya alai, iya abis nadai patut beumur 20 taun. (Penyampau 1:3; 1 Samuel 13:2) Saul merintah pengelama 40 taun. Nya alai, maya Saul nadai, umur Jonatan engka kira 60 taun. Lalu, David beumur 30 taun lebuh Saul nadai. (1 Samuel 31:2; 2 Samuel 5:4) Nya alai, Jonatan engka 30 taun tuai agi ari David.