Enti nuan udah ngereja utai ke diajar dalam Bup Kudus, sereta berengkah ngerapatka kaul enggau Petara, nuan engka bisi runding deka dibaptisa. Tang, baka ni nuan nemu diri udah besedia tauka bedau? a

Ba artikel tu bisi:

•  Nama utai ke patut ditemu aku?

•  Nama utai ke patut digaga aku?

•  Nama ku nembiak serambau nuan

 Nama utai ke patut ditemu aku?

 Nyediaka diri dibaptisa, enda sama baka ke nyediaka diri ujian ba sekula. Nuan enda ibuh ingatka semua utai ke udah dipelajar. Tang, nuan patut nemu berunding, ngambika nuan ulih andal utai ke dalam Bup Kudus nya endang amat betul. (Rome 12:1) Chunto iya, peratika beberapa iti tanya tu:

•   Kati nuan amat pechaya Petara nya bisi lalu patut disembah?

   Ajar Bup Kudus: ‘barang sapa datai ngagai Petara enda tau enda arapka Petara endang amat bisi, lalu arapka Iya deka ngupah orang ke ngiga Iya.’—Hebrew 11:6.

   Perundingka: ‘Nama kebuah aku tau pechaya Petara nya amat bisi?’ (Hebrew 3:4) ‘Nama kebuah aku patut nyembah Iya?’—Pemandang 4:11.

   Mayuh agi penerang: Peda Penciptaan atau Evolusi?—Bahagian 1: Mengapakah Percaya kepada Tuhan? dalam Bahasa Melayu.

•   Kati nuan amat pechaya Bup Kudus nya ari Petara?

   Ajar Bup Kudus: ‘Semua Bup Kudus endang bepun ari Petara magang, lalu beguna kena ngajar, kena ngerara, kena ngaduka utai ti salah, enggau kena matihka orang diau lurus.’—2 Timoti 3:16.

   Perundingka: ‘Nama kebuah aku tau pechaya jaku dalam Bup Kudus nya datai ari Petara, ukai ari mensia?’—Isaiah 46:10; 1 Tesalonika 2:13.

   Mayuh agi penerang: Peda “Nama Kebuah Patut Macha Bup Kudus?—Begian 1: Belajar Mayuh Agi Pasal Bup Kudus Nuan.”

•   Kati nuan pechaya, Petara ngena eklisia Kristian ngereja peneka Iya?

   Ajar Bup Kudus: “Awakka semua turun-menurun dalam eklisia, enggau dalam Jesus Kristus, ngemuliaka Iya belama-lama iya.”—Epesus 3:21.

   Perundingka: ‘Kati utai ke dipelajar aku ba gempuru nya, datai ari mensia tauka Petara?’ (Matthew 24:45) ‘Enti sema apai indai aku enda tauka badu agi datai begempuru, kati aku agi terus begempuru tauka enda?’—Hebrew 10:24, 25.

   Mayuh agi penerang: Peda “Nama Kebuah Begempuru ba Palan Gempuru?”

 Nama utai ke patut digaga aku?

 Nuan ibuh nyadi sempurna enti deka dibaptisa. Tang, nuan patut ngayanka nuan amat-amat deka ‘ngelengkaka penyai, lalu ngereja utai ti badas.’ (Masmur 34:14) Chunto iya, uji pikirka sekeda tanya tu:

•   Kati chara pengidup nuan nitihka jalai Petara?

   Ajar Bup Kduus: “Intu ati kita beresi.”—1 Peter 3:16.

   Perundingka: ‘Kati aku ulih berunding enggau manah, lalu nemu ni bagi utai ti betul enggau utai ti salah? Kati ulah nya ulih dipeda ari utai ke digaga aku?’ (Hebrew 5:14) ‘Lebuh aku diasuh bala kaban aku ngereja utai ti salah, baka ni chara aku nyaga diri? Kati aku berani madahka diri enggai? Kati bala kaban ke enggau aku begulai nya ngasuh aku ngereja utai ti manah?’—Jaku Dalam 13:20.

   Mayuh agi penerang: Peda “Chara Ngembuan Asai Ati ti Manah.”

•   Kati nuan betanggungjawapka pengawa diri?

   Ajar Bup Kudus: ‘Genap iku kitai deka madahka pasal diri empu ngagai Petara.’—Rome 14:12.

   Perundingka: ‘Kati aku enda nipu diri tauka orang bukai?’ (Hebrew 13:18) ‘Enti aku ngaga penyalah, kati aku ka ngaku? Tauka, aku belalaika penyalah nya lalu nyalahka orang bukai?’—Jaku Dalam 28:13.

   Mayuh agi penerang: Peda “Nama Patut Digaga Aku Enti Aku Ngereja Penyalah?”

•   Kati nuan bebendar ngetanka kaul ti manah enggau Petara Jehovah?

   Ajar Bup Kudus: ‘Datai semak ngagai Petara, lalu Iya deka datai semak ngagai kita.’—James 4:8.

   Perundingka: ‘Nama utai ke patut digaga aku, ngambika kaul aku enggau Jehovah rapat agi?’ Chunto iya, ‘Kati aku selalu macha Bup Kudus?’ (Masmur 1:1, 2) ‘Kati aku selalu besampi?’ (1 Tesalonika 5:17) ‘Nama utai ke disebut aku dalam sampi? Kati kaban ke enggau aku begulai nyembah Jehovah?’—Masmur 15:1, 4.

   Mayuh agi penerang: Peda “Nama Kebuah Patut Macha Bup Kudus?—Begian 2: Macha Bup Kudus enggau Chara ti Ngerinduka Ati.” enggau “Nama Kebuah Aku Patut Besampi?”

 CHARA: Kena nuan nyediaka diri dibaptisa, bacha meh bup Pertanyaan Kaum Muda—Jawapan yang Berkesan, Jilid 2, bab 37 dalam Bahasa Melayu. Isi meh begian Lampiran ba lambar 308 enggau 309.