Terus ngagai penerang

TANYA ARI BALA NEMBIAK

Utai ke Patut Ditemu Aku Pasal Bekunsika Gambar Nengah Internet

Utai ke Patut Ditemu Aku Pasal Bekunsika Gambar Nengah Internet

Nuan benung bechuti, lalu nuan deka bala kaban nuan nemu pasal chuti nuan nya! Baka ni? Kati nuan deka

  1. nganjung poskad ngagai sida?

  2. nulis email ngagai sida?

  3. bekunsika gambar nengah internet?

Maya jeman aki ini nuan, engka sida semina ulih milih “A” aja.

Maya jeman apai indai nuan, sida engka milih “B”.

Kemayaharitu, mayuh nembiak ke ulih bekunsika gambar nengah internet deka milih “C”. Kati baka nuan? Enti au, artikel tu deka nulung nuan nyeliahka utai ti ulih ngemediska.

 Nama penguntung iya?

Jampat. “Maya aku benung chuti sereta benung begulai enggau bala kaban, aku ulih bekunsika gambar kami enggau jampat sereta tekala nya.”—Melanie.

Senang. “Senang amat meda gambar ke baru dikunsi bala kaban aku, ari ke muka email.”—Jordan.

Senang begiga pangan diri. “Sekeda ari bala kaban sereta diri sebilik jauh ari aku. Enti aku ulih meda gambar ke dikunsi sida, nya sempama aku ulih betemu enggau sida ninting hari!”—Karen.

 Nama utai ke enda manah ti ulih nyadi?

Nuan engka ngachau pengelikun diri. Enti kamera ba talipun nuan bisi tag endur tauka lokasi (geotag), nuan engka mantaika kelalu mayuh penerang pasal diri empu. Nitihka riput ari laman web Digital Trends, “Gambar tauka fail media sosial ke bukai, ti bisi ngembuan tag lokasi ulih ngasuh orang ke jai, nemu dini endur nuan. Sida ulih ngena siti aplikasi ke ulih ngiga, endur nya.”

Sekeda orang jai ngena chara nya, kena nemu sekalika nuan bisi ba rumah tauka nadai. Nitihka riput ari Digital Trends, tiga iku perumpak udah tama ngagai 18 buah rumah, lebuh orang ke bempu rumah nya nadai ba rumah. Baka ni sida tau nemu kemaya rumah nya nadai orang? Sida ngena siti chara ke dikumbai cybercasing, ti ulih nitihka kebut orang ke bempu rumah nengah internet, lalu tu ngujungka sida ulih ngenchuri barang nyauka 100,000 dolar Amerika Serikat.

Nuan engka dipeda ngereja ulah ti enda menuku. Sekeda orang ke enda malu bekunsika semua utai ngagai mayuh orang. Seiku nembiak indu ke benama Sarah madah, “Penanggul tu deka nyadi ketegal nuan meda akaun orang ke enda dikelala. Nuan baka ke benung bejalai ba endur ke enda ditemu tang nadai peta. Nuan engka ngagai endur ti enda patut ditujah.”

Nuan muai mayuh awak. “Nuan engka enda berasai kelalu balat meda gambar orang bukai ke dikunsi tauka macha komen orang bukai,” ku seiku nembiak indu ke benama Yolanda. “Tiap kali bisi peluang, nuan tentu mansutka talipun binching lalu meda gambar ke baru dikunsi bala kaban.”

Nuan patut nemu nagang diri maya nuan deka bekunsika gambar ba Internet

Seiku nembiak ke benama Samantha mega setuju. Iya madah, “Aku patut natak awak meda laman web ke baka nya. Nuan patut nemu nagang diri enti deka muka akaun ke baka nya.”

 Utai ke ulih digaga nuan

  • Enggau naka ulih nyeliahka diri ari macha utai ke ditagang Bup Kudus. Bup Kudus bisi lalau: “Aku enggai meda penyai.”—Masmur 101:3.

    “Aku selalu meresa gambar ke dikunsi orang bukai, lalu enti aku ngasaika gambar ke dikunsi nya enda manah, aku ngetu follow sida.”—Steven.

  • Anang bekaul enggau orang ke bisi penanggul ba moral, laban tu ulih ngujungka nuan sebaka enggau sida. Bup Kudus bisi nangkan, “Anang nejuka orang nipu kita: “Orang ke jai ngerusak moral ti menyana.””—1 Korint 15:33.

    “Anang nitihka trend gambar kemayaharitu. Nuan engka ulih tepedaka gambar ti enda menuku sereta bisi ulah seks ke mansutka jaku ti kamah.”—Jessica.

  • Tetapka awak ke dikena meda laman web ke baka tu, enggau ni penyuah nuan bekunsika gambar. Bup Kudus bisi madah, “Idup enggau bejimat, ukai baka orang ke beli, tang baka orang ke bepenemu-dalam. Kena semua peluang kita enggau badas, laban hari tu jai.”—Epesus 5:15, 16.

    “Aku ngetu follow orang ke kelalu suah bekunsika gambar. Chunto iya, maya iya ngagai tasik, iya bekunsika 20 iti gambar ba endur ti sama. Nya amat mansau jam!”—Rebekah.

  • Tentuka nuan bekunsika gambar ti ukai semina pasal nuan aja. Paul, seiku ari penulis Bup Kudus nulis, “Aku bejaku ngagai genap iku kita: anang ngumbai diri pama agi ari ti patut.” (Rome 12:3) Anang ngumbai semua kaban nuan rindu meda gambar selfie nuan tauka gambar pasal semua pengawa nuan.

    “Bisi orang rindu bekunsika gambar selfie. Enti kitai bekaban, aku tentu nemu baka ni gamal nuan. Enda ibuh meh selalu ngingatka aku pasal gamal nuan!”—Allison.