Terus ngagai penerang

TANYA ARI BALA NEMBIAK

Baka Ni Enti Orang Mai Aku Ngirup Ai Bisa?

Baka Ni Enti Orang Mai Aku Ngirup Ai Bisa?

Bup Kudus enda nagang kitai ngirup ai bisa, asal aja kitai udah chukup umur enggau enda ngirup nyentukka mabuk. Laban Bup Kudus begedika pengawa mabuk.—Masmur 104:15; 1 Korint 6:10.

Tang baka ni enti nuan dibai tauka dipejal ngirup ai bisa, taja pan apai indai enda ngemendarka nuan tauka laban nuan bedau chukup umur?

 Perundingka utai ke engka nyadi

Sekeda kaban nuan engka ngumbai, ngirup ai bisa ulih ngasuh gaga ati. Tang nama engka nyadi pengudah nya?

  • Penanggul ba undang-undang. Ba menua nuan, nuan engka kena ukum, didawa, lisin deriba digantung, diasuh ngereja pengawa ke orang mayuh, tauka dijil, enti nuan bedau chukup umur ngirup ai bisa.—Rome 13:3.

  • Bejai nama diri empu. Ai bisa ulih ngachau runding seseiku orang. Nuan engka nyebut tauka ngereja sesiti utai ke ngujungka nuan nesal. (Jaku Dalam 23:31-33) Ba dunya ke penuh pemansang enggau media sosial tu, pengawa ke dikereja nuan enggau enda berunding amat senang ulih ngenyaika nama nuan empu.

  • Senang nyadi mansa. Lebuh nuan mabuk, nuan senang agi diserang ba seksual. Nuan mega senang nitihka orang bukai. Tu ngujungka, nuan engka ngereja utai ke tau ngemedis tauka ngelanggar undang-undang.

  • Gian. Beberapa iti pansik madahka, orang ke berengkah ngirup ai bisa kenyau ari biak tusah deka ngetuka ulah tu. Bisi ari sida ngirup ai bisa kena mutarka asai ati ti tusah, puang tauka semina ngabiska jam aja. Nyau kelama, sida gian.

  • Ngujungka pemati. Orang mabuk ke deriba selalu iya ngujungka eksiden nyadi. Empai lama ke udah, ba Amerika Serikat eksiden nyadi ketegal orang mabuk dalam tiap 52 minit. Dalam 5 taun, lebih ari 1,500 orang ke baruh umur 21 taun mati ketegal eksiden. Semua tu nyadi ketegal sida mabuk. Taja pan nuan enda ngirup ai bisa, tang nuan ulih ngemediska diri empu enti nuan nepan orang ke udah mabuk.

 Tetapka prinsip nuan empu

Nuan ulih nyeliahka diri ari ulah ngirup ai bisa, enti nuan udah netapka prinsip nuan empu sebedau utai nyadi balat agi.

Prinsip Bup Kudus: “Orang ke nemu berunding deka meda penusah datai, lalu belalai.” (Jaku Dalam 22:3) Anang ngirup ai bisa sebedau nuan deriba tauka ngereja sebarang pengawa ke begunaka runding tauka pengering.

Prinsip nuan: ‘Aku semina ngirup ai bisa enti aku udah chukup umur enggau ba maya ti ngena aja.’

Prinsip Bup Kudus: “Enti kita nyerahka diri ngagai orang ngambika kita ngasika iya baka ulun, kita nyadi ulun orang ke dikasika kita.” (Rome 6:16) Enti nuan ngirup ai bisa ketegal deka nitihka bala kaban nuan, nuan sempama udah nyadi ulun sida. Enti nuan ngirup ai bisa kena mutarka asai ati ti tusah tauka puang, nuan enda ulih belajar chara mutarka penanggul nuan.

Prinsip nuan: ‘Aku enda alah umbuk bala kaban aku ngirup ai bisa.’

Prinsip Bup Kudus: “Anang begulai enggau orang ke pengirup.” (Jaku Dalam 23:20) Enti nuan salah pilih kaban, tusah nuan deka ngetanka prinsip diri empu. Nuan ulih ngemediska diri empu enti nuan bekaban enggau orang ke ngirup ai bisa enggau chara ti salah.

Prinsip nuan: ‘Aku enggai bekaban enggau orang ke ngirup ai bisa enggau chara ti salah.’