Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Baka Ni Aku Ulih Ngetu Berunding Pasal Seks?

Baka Ni Aku Ulih Ngetu Berunding Pasal Seks?

“Enda memukai aku berengkah berunding pasal seks, lalu enda ulih berunding pasal utai bukai. Aku ngasaika baka bisi orang bukai benung nguasa runding aku.”—Vera.

“Tusah amat ngetuka runding pasal seks. Nyamai agi belajar terebai ari ke ngetu berunding pasal seks.”—John.

Kati nuan mega ngasaika utai ti sama baka Vera enggau John? Enti au, artikel tu ulih nulung nuan.

 Nama kebuah kitai enda patut terus berunding pasal seks?

“Aya, iya nya menyadi indai aku madah, enti Petara kala nempa mensia enggau pengingin seks, Iya tentu deka mensia ngemuaska diri enggau pengingin nya,” ku seiku nembiak lelaki ke benama Alex.

Sekeda ari utai ke dipadahka aya Alex nya amat. Petara meri kitai pengingin seks lalu Iya deka kitai ngemuaska pengingin nya enggau chara ti betul. Mensia bisi ba dunya kemayaharitu, pan ketegal pemeri tu. Enti baka nya, nama kebuah kitai enda patut terus berunding pasal seks? Bisi dua iti kebuah ti manah:

  • Bup Kudus ngajar, semina sepasang laki bini ti udah kawin aja ulih ngembuan pengingin tu.—Pemungkal 1:28; 2:24.

    Enti nuan bedau kawin, tang majak berunding pasal seks, nuan semina merinsa diri empu laban nuan enda ulih ngemuaska pengingin nuan nya. Nambahka nya, nuan senang diuji ngereja pengawa seks ti salah, lalu nya ulih ngasuh nuan nesal.

  • Enti nuan bebendar nagang runding diri, nuan belajar ngemansangka ulah ti nemu nagang diri ke amat beguna sepemanjai pengidup.—1 Korint 9:25.

Ulah ti nemu nagang diri ulih ngasuh nuan ngembuan idup ti lantang. Siti pansik nunjukka, anak mit ke nemu nagang diri jarang bisi penanggul ba pengerai, penanggul ba duit, tauka bisi penanggul enggau piak ti bekuasa lebuh sida mansang besai. *

 Nama kebuah tusah deka ngetu ari berunding pasal seks?

Hormon ke dalam tubuh sereta dunya ti gila seks ngasuh orang tusah deka ngetu ari berunding pasal seks.

“Nyauka semua program TV meransang orang ngereja pengawa seks sebedau kawin, lalu nunjukka pengawa nya baka ke nadai penusah. Nuan senang agi berunding pasal seks enti nuan suah ninga orang madah nya, OK.”—Ruth.

“Ba endur gawa, orang selalu berandau pasal seks. Ketegal kelalu deka nemu nama randau sida, nya ngujungka pengingin aku pasal seks majak balat. Mayuh orang ngumbai seks ti enda bemoral nya utai ti biasa, nya kebuah tusah ba aku ngumbai nya salah.”—Nicole.

“Maya nuan meda gambar ba media sosial, nuan engka enda ingat patut bejimat enggau gambar ke enda menuku. Tang, lebuh nuan meda, taja siti aja gambar ke enda menuku, gambar nya terus lekat ba runding nuan ba awak ti panjai.”—Maria.

Nya kebuah nuan mega setuju enggau jaku rasul Paul. Iya nulis, “Lebuh aku deka ngereja utai ti badas, aku lalu milih penyai.”—Rome 7:21.

Anang nejuka runding ti salah besarang ba runding nuan

 Utai ke ulih digaga nuan

Berunding pasal utai bukai. Uji limpangka runding nuan ngagai utai bukai, baka hobi, sukan, sesais, tauka sebarang pengawa ke bukai. Seiku nembiak indu ke benama Valerie madah, “Macha Bup Kudus nulung aku.” Iya nambah, “Bup Kudus ngembuan runding Petara. Lebuh nuan berundingka jaku Petara, nuan enda ulih berundingka utai bukai.”

Kekadang, kitai endang bisi runding pasal seks. Tang, nuan empu ulih milih sekalika nuan deka betatika runding nya tauka enda. Pemutus nya tepulai ngagai nuan empu.

“Lebuh aku berengkah berunding pasal seks, aku mejal diri berunding pasal utai bukai. Aku mega mansik kebuah aku bisi runding ti salah nya. Enti lagu tauka gambar ke dipeda aku ba perengka elektronik nyadi kebuah, aku deka madamka nya.”—Helena.

Prinsip Bup Kudus: “Perundingka utai ti bendar, ti manah, ti lurus, ti tuchi, ti badas, ti nelap, ti pemadu menyana, ti tau dipuji.”—Pilipi 4:8.

Milih kaban ti betul. Enti kaban nuan majak berandau pasal seks, tentu nuan tusah deka berunding pasal utai ti manah.

“Lebuh aku agi nembiak, aku enda ulih nagang runding diri ketegal bekaban enggau orang ke salah. Enti orang ke ngelingi nuan meransang nuan berunding pasal utai ti salah, nya sempama nanjah minyak ngagai api.”—Sarah.

Prinsip Bup Kudus: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.”—Jaku Dalam 13:20.

Seliahka pemerindang ti enda manah. Nyauka semua pemerindang ba dunya bisi bekaul enggau seks. “Musik jampat tama ati aku,” ku Nicole. “Musik ulih ngemansangka pengingin seks ti salah nyentukka aku tusah deka nagang diri.”

“Aku berengkah meda cherita wayang sereta cherita TV ke bisi kaul enggau seks. Enda memukai, aku majak berunding pasal seks. Aku ngasaika runding ke baka nya datai ari cherita wayang enggau cherita TV ke dipeda aku. Pengudah aku ngetu meda cherita wayang enggau cherita TV ke baka nya, aku jarang agi berunding pasal seks. Enti nuan milih pemerindang enggau bejimat, nuan ulih ngembuan runding ti tuchi.”—Joanne.

Prinsip Bup Kudus: “Tang pengawa bambai, enggau semua ulah ti kamah, tauka pengamu enda patut nyadi ba bala kita.”—Epesus 5:3.

Batang ajar: Bisi orang ngasaika diri, sida enda patut, enda ulih nagang pengingin seks sida. Tang Bup Kudus nerangka, runding nya salah. Laban, Bup Kudus ngajar, kitai ulih nagang runding diri.

Prinsip Bup Kudus: “Ngelakka runding enggau ati kita diubah nyadi baru.”—Epesus 4:23.

^ per. 16 Nemu nagang diri mega beguna ngagai orang ke udah kawin. Nya kebuah, nuan patut belajar ngemansangka ulah tu kenyau ari nuan bedau kawin.