Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Baka Ni Aku Ulih Ngetu ari Majak Tusah Ati?

Baka Ni Aku Ulih Ngetu ari Majak Tusah Ati?

“Enti bisi orang bukai tusah ati, aku tentu jejampat nulung sereta meransang sida. Tang, kesuah iya nadai orang nemu, maya aku tama bilik, aku nyabak kediri.”—Kellie.

“Lebuh aku tusah ati, aku enggai betemu enggau orang. Chunto iya, maya aku dibai bemain, aku meri mayuh kebuah. Indah, diri sebilik aku pan enda nemu aku benung tusah ati. Sida ngumbai aku nadai ngawa.”—Rick.

Kati nuan kala ngasaika utai ti diasaika Kellie enggau Rick? Enti au, anang ngumbai diri nyelai ari orang bukai. Nadai orang ba dunya tu ulih mengkang gaga ati. Indah, orang ke tetap ati ti dipadahka dalam Bup Kudus, enda ngira lelaki tauka indu pan kala ngasaika tusah ati.—1 Samuel 1:6-8; Masmur 35:14.

Kekadang nuan nemu kebuah nuan tusah ati, tang kekadang nuan mega enda nemu. “Kekadang kitai ulih berasai tusah amat ati taja pan nadai utai ti bangat balat nyadi,” ku Anna ke beumur 19 taun. “Asai ati nya ulih datai barang maya, taja pan kitai nadai penanggul. Amat nyelai, tang tu amat nyadi!”

Enda ngira nama utai ke ngasuh nuan tusah ati, baka ni nuan ulih ngetuka iya? Uji meh beberapa chara tu:

  1. Berandau. Lebuh Jop napi mayuh penusah ti pemadu pedis dalam pengidup iya, iya madahka, “Pendingka pemalat putap aku.”—Jop 10:1.

    Kellie: Pengudah berandau enggau seseiku orang, aku berasai nyamai agi. Bisi orang nemu asai ati aku. Nya sempama bisi orang ngasurka aku tali lalu narit aku pansut ari lubang ti dalam. Aku ulih selamat!

  2. Tuliska. Lebuh nuan berasai tusah amat ati, tuliska meh asai ati nuan nya. Maya David tusah ati, iya pan nulis nya ba bup Masmur pasal penusah ati iya. (Masmur 6:6) Pengudah nuan nulis penusah ati diri, nuan ulih berunding enggau manah agi.—Jaku Dalam 3:21.

    Heather: Maya aku nulis asai ati diri, aku ulih nemu nama utai ke ngasuh aku tusah amat ati. Lebuh kitai mansutka asai ati diri lalu nemu kebuah iya, kitai deka berasai nyamai agi.

  3. Besampi. Dalam Bup Kudus ngajar, enti nuan madahka penusah ati ba sampi, ‘pemaik Petara, ti ngelui peragam mensia, deka nyaga ati enggau runding kita.’—Pilipi 4:6, 7.

    Esther: Suba, aku enda nemu nama kebuah aku majak tusah ati. Nadai saut pasal utai tu. Nya alai, aku terus besampi ngagai Jehovah. Tu nulung aku gaga agi ati. Tusah ga enti majak tusah ati, tang enda nemu kebuah baka nya. Diatu, aku udah ulih mutarka penanggul tu. Sampi nya amat beguna! Nya alai, anang enggai besampi.

    Ari bantu, nuan ulih ngetu ari majak tusah ati

    Buah penemu: Lebuh nuan besampi, uji neladan chara sampi pemasmur ke ditulis ba Masmur 139:23, 24. Uji pansutka asai ati nuan ngagai Jehovah, lalu minta Iya nulung nuan ngiga kebuah nuan tusah ati.

Kelimpah ari nya, nuan mega bisi iring ke bukai ti ulih dikeandalka. Iya nya, Bup Kudus. Enti nuan macha cherita dalam Bup Kudus, mayuh penemu ti ulih diteladan nuan. Nya ulih nulung nuan berasai baik agi.—Masmur1:1-3.

Enti enda ngetu-ngetu tusah ati

Ku Ryan, “Kekadang aku enggai angkat ari peninduk aku laban aku nemu seharitu aku tentu napi siti da hari ti nadai reti.” Iya bisi penyakit depression ketegal enda bepengerai ba tubuh. Mayuh nembiak bisi penyakit tu. Nitihka pansik, sebedau mansang besai, dalam urung seiku ari empat iku nembiak bisi penyakit depression ti enda sama, sekalika nya balat tauka enda entu balat.

Nama tanda penyakit depression? Kesuah iya, orang ke bisi penyakit tu bisi asai ati ti enda tentu lalu ulah sida mega ulih berubah enggau jampat. Enda entu deka begulai enggau orang bukai, lembau ngereja nama-nama pengawa, chara makai tauka tinduk ti enda manah, ngasaika diri enda beguna, tauka berasai besalah enggau nadai kebuah.

Amat, nyauka semua orang bisi ngasaika siti tauka dua iti ari tanda ba atas. Tang, enti tanda nya enda ngetu-ngetu chunto iya, dalam beberapa minggu, nuan patut minta apai indai nguluka nuan betemu enggau lutur. Enggau chara nya, nuan ulih nemu sekalika asai ati nuan nya ketegal bisi penanggul ba pengerai tauka ukai.

Enti penanggul nuan nya ketegal pengerai, anang meh malu. Mayuh orang ulih gerai pengudah sida tetemuka chara berubat ti betul. Enda ngira nuan tusah ati ketegal penyakit depression tauka ukai, kingatka meh jaku ba Masmur 34:18, ‘Jehovah diau semak orang ke tusah ati lalu ngidupka sida ke nadai agi pengadang.’