Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Nama Kebuah Patut Macha Bup Kudus?—Begian 1: Belajar Mayuh Agi Pasal Bup Kudus Nuan

Nama Kebuah Patut Macha Bup Kudus?—Begian 1: Belajar Mayuh Agi Pasal Bup Kudus Nuan

“Aku kala nguji macha Bup Kudus, tang aku ngasaika Bup Kudus nya tusah laban kelalu tebal!”

Kati nuan mega ngasaika utai ti sama? Enti au, topik tu ulih nulung nuan!

 Nama kebuah patut macha Bup Kudus?

Kati nuan ngasaika macha Bup Kudus nya boring? Enti au, anang irau, kami ulih meretika asai ati nya. Nuan engka ngasaika Bup Kudus nya ngembuan mayuh lambar, tulis ti mit, lalu nadai gambar. Nya kebuah, nuan ulih ngasaika rindu agi meda tv tauka video ari ke macha Bup Kudus!

Tang, uji perundingka tu: Enti nuan tetemuka peti reta karun ti besai, endaka nuan deka muka lalu meda utai ba dalam nya?

Bup Kudus nya baka peti reta karun. Bup Kudus ngembuan mayuh utai ti berega ti ulih nulung nuan dalam . . .

  • Ngaga pemutus ti manah

  • Ngembuan kaul ti manah enggau apai indai

  • Bulih bakih ti bendar

  • Mutarka penanggul dalam pengidup

Taja pan Bup Kudus nya bup ti udah lama, tang penemu ke bisi dalam Bup Kudus agi ulih dikena kitai nyentukka seharitu. Tu ketegal ‘semua Bup Kudus endang bepun ari Petara.’ (2 Timoti 3:16) Amat, lalau ke datai ari Bup Kudus nya bepun ari Petara empu, ti Pun semua utai ke manah.

Bup Kudus nya sempama peti reta karun ti ngembuan penemu ti berega

 Nama chara ti manah lebuh macha Bup Kudus?

Siti chara nya, macha ari pun nyentukka ujung. Enggau chara tu, nuan ulih nemu nama utai ke deka dipadahka dalam Bup Kudus. Baka ni chara nuan ngereja nya? Perundingka dua iti chunto ba baruh tu:

  •  Nuan ulih macha semua 66 iti bup dalam Bup Kudus, berengkah ari bup Pemungkal nyentukka ngagai Pemandang.

  •  Nuan ulih macha Bup Kudus nitihka ripih utai ti nyadi.

Chara kedua nuan macha Bup Kudus, iya nya milih cherita ti bisi kaul enggau penanggul ke benung ditapi nuan. Chunto:

  • Kati nuan deka bulih bakih ti ulih dipechayaka? Bacha cherita pasal Jonathan enggau David. (1 Samuel, bagi 18-20) Peratika, nama pemanah David ti ngasuh Jonathan rindu amat bebakih enggau iya.

  • Kati nuan deka bebendar nulak penguji? Bacha cherita pasal Josep enggau baka ni chara iya nulak penguji. (Pemungkal, bagi 39) Peratika ari ni Josep bulih pengering kena iya nulak penguji.

  • Baka ni sampi ulih nulung nuan mutarka penanggul? Bacha meh pasal Nehemia. (Nehemiah, bagi 2) Giga meh bukti ti nunjukka sampi Nehemia amat ulih nulung iya.

Chara: Lebuh nuan macha Bup Kudus, tentuka nuan milih endur ti sunyi ngambika nuan enda limpang ari utai ti dibacha nuan.

Chara ketiga iya nya, milih siti cherita. Bacha lalu perundingka baka ni penerang nya nulung nuan. Pengudah macha, tanya meh diri empu baka:

  •  Nama kebuah Jehovah dekaka utai tu ditulis dalam Bup Kudus?

  •  Nama utai ke ulih dipelajarka aku pasal pemanah Jehovah?

  •  Baka ni aku ngena ajar tu dalam pengidup?

Chara: Tetapka juluk ati! Gaga meh jadual ngambika nuan ulih macha Bup Kudus sekalika ngena Bup Kudus nuan empu tauka nengah online. Udah nya, tuliska haribulan kemaya nuan deka berengkah macha Bup Kudus lalu tuliska mega haribulan nuan abis macha.