Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Baka Ni Aku Ulih Nagang Pengeringat?

Baka Ni Aku Ulih Nagang Pengeringat?

 Kuis

  • Ni penyuah nuan berasai ringat?

    • jarang

    • kekadang

    • ninting hari

  • Ni pemalat nuan ringat?

    • nyilu kuku

    • angat

    • gesak

  • Nuan selalu ringat ngagai sapa?

    • apai indai

    • diri menyadi

    • kaban

Enti nuan ngasaika diri patut nagang pengeringat, artikel tu ulih nulung nuan! Keterubah, peratika kebuah kitai mengkang nelap, taja pan bisi orang ngasuh kitai ringat.

 Nama kebuah beguna

Pengerai nuan. Jaku Dalam 14:30 madah, “Ati ti lantang, ngasuh tubuh nuan bepengerai.” Nitihka riput ari Journal of Medicine and Life, “pengeringat siti ari kebuah penyakit jantung nyadi.”

Kaban nuan. Bup Kudus madah, “Anang bepangan enggau orang ke lengkar sereta mangah,”—Jaku Dalam 22:24. Nya alai, anang iran enti nuan ngasaika orang bukai deka nyeliahka diri ari nuan, seagi nuan enda ulih nagang pengeringat. Munyi ku seiku nembiak indu ke benama Jasmine, “Enti nuan enda belajar nagang pengeringat diri, nuan tusah deka bulih kaban ti rapat.”

Pemanah rita nuan. “Enti nuan suah ringat, tu deka ditemu mayuh orang, lalu sida pan bisi runding ti enda manah pasal nuan,” ku Ethan ke beumur 17 taun. Tanya diri empu, “Kati aku tampak rita enggau ulah ti nelap sereta rindu bebaik, tauka orang ke senang meletup baka bom?” Bup Kudus madah, “Enti nuan enda jampat ringat, reti nya nuan orang ke bepenemu-dalam, tang enti nuan jampat ringat, nuan semina mandangka pemeli diri.”—Jaku Dalam 14:29.

Nadai orang deka begulai enggau orang ke jampat ringat

 Utai ke ulih digaga nuan

Peratika ayat Bup Kudus sereta penemu ba baruh. Udah nya, tanya diri empu enggau sekeda tanya ke diberi.

  • Jaku Dalam 29:22: “Orang ke lengkar nyungkak orang balat belaya, sereta ngaga pengachau.”

    “Maya aku agi nembiak, aku tusah nagang pengeringat. Bala kaban belayan mua ke apai aku mega baka nya. Nya kebuah, aku ngumbai nya endang sigi udah purih kami. Amat tusah deka nagang pengeringat!”—Kerri.

    Kati aku jampat ringat? Kati ulih aku ngumbai ulah ti manah ke dikemisika aku, nya datai ari pengawa badas ke dikereja aku, lalu ulah ti enda manah dari ari purih kami sebilik?

  • Jaku Dalam 15:1: “Saut ti nelap ngasuh orang badu agi ringat, tang jaku ti kasar ngasuh orang ringat.”

    “Chara iya, belajar nagang pengeringat diri. Enti nuan nguji ngemansangka ulah ti nelap sereta beberatka pekara ti badas, nuan enda jampat ringat.”—Daryl.

    Enti bisi orang ngasuh aku ringat, ni bagi ulah ke patut diayanka aku dulu? Nama kebuah nya beguna?

  • Jaku Dalam 26:20: “Api padam enti nadai kayu.”

    “Enti aku nyaut enggau nelap, aku ulih ngenyelapka ati orang nya. Asil iya, kami ulih berandau enggau chara ti manah.”—Jasmine.

    Kati ulah tauka leka jaku ke dipansutka aku ngasuh utai nya diputarka enggau chara ti manah?

  • Jaku Dalam 22:3: “Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya.”

    “Kekadang, aku patut rari ke bukai enda lama, lalu berunding pasal utai ke nyadi. Pengudah aku berasai nyamai agi, nya baru aku mutarka iya.”—Gary.

    Ni maya ti ngena endur nuan rari ke bukai, lebuh nuan ngasaika pekara tu ulih ngujungka laya? Lalu baka ni chara ti manah, ngambika orang nya enda ngumbai nuan enda bebasaka iya?

  • James 3:2: “Semua kitai bela ngereja mayuh macham penyalah.”

    “Enti kitai ngereja penyalah, kitai ukai semina berasai besalah aja. Tang, kitai patut belajar ari penyalah nya. Nya sempama baka, enti kitai terap, kitai patut angkat baru lalu enggai terap agi ba maya bukai.”—Kerri.

Chara: Tetapka juluk ati. Uji tagang pengeringat nuan dalam sesiti timpuh, abis nadai dalam sebulan. Lalu tuliska pemansang ti udah digaga nuan.