Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Nama Kebuah Aku Nadai Bakih?

Nama Kebuah Aku Nadai Bakih?

Lebuh nuan online, nuan meda gambar parti ke empai lama ti udah. Semua bala bakih nuan bisi dia, lalu sida baka ke gaga amat ati. Tang bisi utai lenyau. Bisi seiku orang nadai—iya nya nuan!

Nuan engka berunding, ‘Nama kebuah aku enda dibai?’

Asai ati ti deka nemu, nyadi enda nyamai. Nuan ngasaika diri dikelaungka! Sida ngumbai diri bakih nuan, tang ke bendar iya nya bula aja. Udah nya, nuan berengkah berasai puang, lalu nuan berunding, ‘Nama kebuah aku nadai bakih?’

 Kuis asai ati ti puang

Betul tauka salah

  1. Enti nuan bisi mayuh bakih, nuan enda kala berasai puang.

  2. Enti nuan kisuk ba pengawa sosial, nuan enda berasai puang.

  3. Enti nuan nganjung mayuh sms, nuan enda berasai puang.

  4. Enti nuan nulung orang bukai, nuan enda kala berasai puang.

Semua saut ngagai empat iti utai tu salah.

Nama kebuah?

 Utai ti bendar pasal kaul ti rapat enggau asai ati ti puang

  • Ngembuan mayuh bakih nya bedau tentu ulih nyeliahka nuan ari berasai puang.

    “Aku kiruhka bala bakih aku, tang kekadang aku ngasaika sida enda kiruhka aku baka aku ke kiruhka sida. Nuan deka berasai puang enti nuan ngasaika bala bakih nuan enda rindu sereta beguna nuan baka chara nuan ngaga sida.”​—Anne.

  • Enggau ba pengawa sosial nya enda tentu ulih nyeliahka nuan ari berasai puang.

    “Bisi orang deka ngiga mayuh bakih baka ke ngumpul ayam. Tang ngembuan mayuh bakih enda ulih ngasuh nuan berasai dikerinduka. Enti nuan nadai ngembuan kaul ti manah, bakih ba online nya nadai reti ba nuan baka ayam ti nadai nyawa.”​—Elaine.

  • Enti nuan nganjung sms, ukai reti iya nuan ulih ngetu berasai puang.

    “Kekadang lebuh nuan berasai puang, nuan suah meresa talipun binching laban nuan deka nemu sekalika bisi entara bakih nuan nganjung sms ngagai nuan. Lalu lebuh nuan udah berasai puang tang nuan ngasaika nadai orang ngiga nuan, nya ulih ngasuh asai ati ti puang nya balat agi.”​—Serena.

  • Nulung orang bukai mega bedau tentu ulih muai asai ati ti puang.

    “Aku selalu ngayanka pengerah jari ngagai bala bakih aku, tang aku berati sida enda kala ngaga aku baka chara aku ngaga sida. Aku enda nesal ati gerah jari enggau sida, tang aku alit ati laban sida enda malas pemanah aku.”​—Richard.

Isi: Asai ati ti puang nya bepanggai ba chara berunding. “Nya datai ari runding siku-siku orang, ukai ari utai bukai,” ku seiku indu ke agi biak benama Jeanette.

Nama patut digaga nuan enti nuan ngasaika diri nadai bakih sereta berasai puang?

 Baka ni chara ngelaban asai ati ti puang

Pechaya diri.

“Asai ati ti puang ulih ngachau pengelikun. Tusah deka ngiga bakih enti kitai ngasaika kitai enda layak nyadi bakih orang bukai.”​—Jeanette.

Bup Kudus madah: “Rinduka pangan diri baka kita ke rinduka diri empu.” (Galatia 5:14) Enti deka bulih kaul ti manah, kitai patut rinduka diri empu, tang anang berundingka diri empu.​—Galatia 6:3, 4.

Seliahka asai ati ti kelalu kasihka diri empu.

“Asai ati ti puang nya baka tanah luchak. Enti kitai majak mejal diri pansut, nya ngenusahka agi kitai deka pansut. Enti kitai kelalu kasihka diri empu, mimit agi orang deka bebakih enggau kitai. Asil iya, kitai majak berasai puang.”​—Erin.

Bup Kudus madah: “Pengerindu enda berundingka diri empu”. (1 Korint 13:4, 5) Ke bendar iya, enti kitai kelalu berundingka diri empu, kitai pedis deka berunding pasal orang bukai. Tu ngujungka, bala bakih kitai enda rindu. (2 Korint 12:15) Aram kitai mutarka nya: Enti pemujur nuan nya diukur nitihka ulah orang bukai ngagai nuan, nuan tentu enda mujur! Nya alai, leka jaku baka “Nadai orang ngiga aku” tauka “Nadai orang mai aku” baka ke nepu pengelantang nuan ba jari orang bukai.

Anang sengapa milih bakih.

“Orang ke puang semina deka diperatika, lalu sida enda peduli sapa ke meratika sida. Sida semina deka ngasaika diri diguna. Tang bisi nya semina bepura aja kiruhka kitai, udah nya ngambi ulih aja. Laban sida pan puang.”​—Brianne.

Bup Kudus madah: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bebakih enggau orang ke beli, nuan deka rusak.” (Jaku Dalam 13:20) Orang ke benung lapar deka makai sebarang utai. Baka nya mega, orang ke benung ngiga bakih deka milih sebarang orang nyadika bakih. Nyentukka sida mega senang dikemulaka; sida ngasaika kaul ti baka nya ukai utai ti salah lalu sida enda ngarapka utai ti sempurna.

Penutup: Tiap iku orang kala ngasaika asai ati ti puang; mina ke enda sebaka. Taja pan asai ati ti puang ulih ngasuh kitai deka ngenyauhka diri, tang ke bendar iya nya semina asai ati aja. Asai ati nya bekaul enggau utai ke diperundingka kitai, lalu kitai mega ulih mutarka runding kitai.

Anang ngarapka kelalu mayuh utai ari orang bukai. “Ukai semua orang ulih nyadi bakih kitai belama iya,” ku Jeanette, “tang kitai deka tetemuka orang ti bebendar kiruhka kitai. Nya aja meh ke diguna kitai. Nya ulih nulung kitai enda kelalu berasai puang.”

Begunaka tulung? Bacha “ Mutarka Asai Ati ti Takut Pasal Kaul ti Rapat.” Mega download PDF “Napi Asai Ati ti Sunyi.”