Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Kati Patut Kami Putus? (Begian 1)

Kati Patut Kami Putus? (Begian 1)

Ba sekeda pekara, putus nya patut. Aram kitai beratika utai ti diasaika Jill. Iya madahka, “Keterubah, aku gaga laban sulu lelaki aku selalu irau pasal aku. Iya deka nemu aku ba dini, aku ngereja nama enggau sapa. Tang nyau kelama, iya semina dekaka aku begulai enggau iya aja. Nyentukka iya pan chemburu meda aku begulai enggau bala diri sebilik, kelebih agi apai aku. Pengudah kami putus, aku berasai nyamai agi!”

Sarah mega ngasaika utai ti sama. Iya ngasaika John, iya nya sulu lelaki iya, rindu nyindir, mejal orang bukai nitihka chara iya, sereta enda bebasaka orang bukai. Iya madah, “Bisi sekali, iya laun pengelama tiga jam! Lebuh iya datai ba rumah aku, iya enda bedulika indai aku ke mukaka iya pintu. Udah nya iya terus madah, ‘Aram mupuk, kita udah laun.’ Ari ke nyebut, ‘Aku udah laun,’ iya madahka, ‘Kita udah laun.’ Iya patut minta ampun lalu nerangka kebuah iya laun. Tang, utai ti pemadu beguna nya, iya patut bebasaka indai aku!”

Endang amat, taja pan bisi orang ulih ngasuh kitai asa, ukai reti iya kitai patut terus mutuska kaul nya. (Masmur 130:3) Lebuh Sarah ngasaika John selalu ngembuan ulah ti enda manah, iya ngaga pemutus deka mutuska kaul seduai iya.

Baka ni enti nuan ngasaika sulu lelaki tauka sulu indu nuan enda ulih nyadi laki tauka bini ti manah? Enti tu nyadi, anang enda betatika asai ati nuan! Taja pan tusah, tang manah agi putus ari ke ngenatka diri. Jaku Dalam 22:3 madahka, “Orang ke nemu berunding deka meda penusah datai, lalu belalai.”

Putus ba pengerindu ukai utai ti senang. Tang kingatka, tikah nya utai ti patut ditanka kitai seumur idup. Manah agi kitai ngasaika penusah ati ke enda lama ari ke merinsa seumur idup!