Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Kati Orang tu Ulih Nyadi Kaling Pengidup Aku?

Kati Orang tu Ulih Nyadi Kaling Pengidup Aku?

Kati nuan udah tetemuka seiku orang ke ulih nyadi kaling pengidup? Enti au, baka ni nuan nemu iya orang ti pemadu manah nyadi kaling pengidup nuan?

Anang semina meda kualiti ke ulih dipeda aja. Ukai reti iya indu ti pemadu bajik ulih dipechaya. Pia mega, ukai reti iya lelaki ti pemadu sigat beresi ba moral. Nuan patut ngiga seiku orang ke ulih begulai sereta ngembuan juluk ati ti sama.—Pemungkal 2:18; Matthew 19:4-6.

Ngelala Iya enggau Dalam

Enti nuan bisi ati ngagai seseiku orang, peratika meh orang nya enggau dalam. Anang kelalu nitihka ati nuan. Pia mega, bejimat enggau utai ti diperatika nuan. Anang semina meda utai kedeka nuan aja. Nya kebuah, anang meh beguai, kelala meh orang nya enggau dalam dulu.

Mayuh ari orang ke besulu, enda entu ngelala sulu sida enggau dalam. Sida semina meda utai ke sama ba entara seduai iya aja. Chunto: “Kami sama-sama rinduka musik.” “Kami rinduka main ti sama.” “Kami ulih begulai enggau pangan diri!” Tang, nuan patut ngelala iya enggau dalam. Nuan patut ngelala sapa iya ti bendar. (1 Peter 3:4; Epesus 3:16) Ari ke majak beratika utai ti sama pasal seduai, uji beratika mega nama ulih nyadi lebuh seduai enda sepenemu.

Chunto, perundingka sekeda utai tu:

  • Baka ni iya mutarka penanggul? Kati iya bebendar deka orang bukai nitihka chara iya? Enti orang enggai nitih, iya ringat lalu mansutka jaku ti kasar? (Galatia 5:19, 20; Kolosi 3:8) Kati iya baruh ati deka berubah enti utai nya ulih meri pemaik sereta enda ngelanggar prinsip Bup Kudus?—James 3:17.

  • Kati iya kelalu nagang nuan? Kati iya enda rindu meda nuan bekaban enggau orang bukai, tauka kelalu balat chemburu? Kati iya selalu deka nuan madahka semua pengawa nuan ngagai iya? Nicole madahka, “Aku kala ninga pasal orang ke besulu, suah belaya ketegal seiku ari seduai iya dekaka seiku da agi madahka semua pengawa iya. Tu siti tanda ti enda manah.”—1 Korint 13:4.

  • Nama runding orang bukai pasal iya? Nuan patut nanya orang ke udah lama ngelala iya. Chunto, bala menyadi ke tegap dalam pengarap ba eklisia. Enggau chara nya, nuan nemu mayuh agi pasal iya.—Kereja Rasul 16:1, 2.