Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Kuasa Ari Roh ti Jai—Kati Nya Manah tauka Ulih Ngemediska Nuan?

Kuasa Ari Roh ti Jai—Kati Nya Manah tauka Ulih Ngemediska Nuan?

Nama runding nuan?

  • Kati zodiak, papan Ouija, tauka orang ke ngembuan kuasa roh ti jai nya manah tauka ulih ngemedis nuan?

  • Kati cherita pasal roh ti jai nya semina madahka pasal perang entara kuasa ti manah enggau kuasa ti jai aja? Tauka, kati cherita nya manah ke kitai?

Artikel tu deka berandauka pasal, nama kebuah cherita pasal roh ti jai nya baka ke manah, tang iya ke amat nya ulih ngemedis lalu baka ni nuan ulih bejimat.

 Nama kebuah pengawa bemanang nya baka ke manah?

Ba dunya pemerindang, selalu mandangka filem, cherita TV, main video, tauka bup ti madahka pasal kuasa ari roh ti jai. Ketegal tu, mayuh bala nembiak rindu pasal astrologi, roh ti jai, puntianak, enggau kuasa magik. Nama kebuah? Ba baruh tu bisi nerangka kebuah iya:

  • Deka nemu: Deka nemu sekalika kuasa ari roh ti jai nya amat-amat bisi

  • Irau: Deka nemu pasal nama utai ke ulih nyadi

  • Rindu: Ulih bejaku enggau orang ke dikesayauka ti udah mati

Ukai semua kebuah nya salah. Chunto, enda salah enti kitai bisi runding pasal nama utai ke deka nyadi jemah ila, tauka lelengauka orang ke dikesayauka ti udah mati. Tang nuan patut bejimat.

 Nama kebuah nuan patut bejimat?

Bup Kudus nangkan kitai pasal pengawa bemanang:

‘Anang nyerahka anak kita lalu nunu sida ba alta nyadika piring. Lalu anang betilitka nasit, tauka beburung, tauka bedukun, tauka bemanang, tauka bekenaka pengaruh, tauka betanya ngagai antu, tauka betanya ngagai semengat orang ke udah mati. Laban Jehovah Petara kita begedika orang ke ngereja utai ti jai baka nya. Nya kebuah Iya muru mayuh bengkah bansa ari mua kita.’—Ulang Adat 18:10-12.

Nama kebuah ajar ari Bup Kudus enda rinduka pengawa bemanang?

  • Pengawa bemanang bisi kaul enggau roh ti jai. Bup Kudus bisi ngajar kitai pasal sekeda melikat ke udah ngelaban Petara lalu nyadi munsuh Iya. (Pemungkal 6:2; Jude 6) Melikat-melikat ke jai tu dikumbai roh ti jai. Sida rindu nesatka orang nengah bala manang, tukang tilik nasit, orang ke nemu beburung sereta dukun. Enti kitai enggau pengawa bemanang, tu nunjukka kitai benung nyukung pengawa roh ti jai nya.

  • Pengawa bemanang ngasuh orang pechaya, mensia ulih nemu pasal jemah ila. Tang semina Petara ke ulih nyebut, “Kenyau ari pun kelia, Aku udah madahka utai ti deka nyadi. Dulu kelia Aku udah madahka utai ti deka nyadi.”—Isaiah 46:10; James 4:13, 14.

  • Pengawa bemanang mega ngasuh mayuh orang pechaya, sida ulih bejaku enggau orang ke udah mati. Tang, dalam Bup Kudus bisi madahka, ‘orang ke mati nadai nemu utai. Ba pendam nadai pengawa, nadai runding, nadai penemu, nadai penemu-dalam.’—Pengajar 9:5, 10, NW.

Nya kebuah, Saksi-Saksi Jehovah nyeliahka semua utai ke bisi kaul enggau pengawa bemanang. Sida mega enda meda tauka macha cherita pasal zombie, puntianak, tauka semua pengawa ke bisi kaul enggau roh ti jai. “Aku enggai meda sebarang utai ke bisi kaul enggau pengawa bemanang,” ku seiku nembiak indu ke benama Maria. *

Baka seiku orang jai ke nguji nipu nuan, roh ti jai mega ulih pepura nyadi orang ke dikesayauka nuan ti udah mati

 Utai ke ulih digaga nuan

  • Bebendar meh deka ‘ngintu ati diri beresi di mua Petara’ lalu nyeliahka pengawa tauka pemerindang ke bisi kaul enggau pengawa bemanang.—Kereja Rasul 24:16.

  • Buai meh semua utai ke bisi kaul enggau pengawa bemanang. Bacha Kereja Rasul 19:19, 20, lalu peratika teladan orang Kristian kelia.

Kingatka: Lebuh nuan nyeliahka diri ari pengawa sereta pemerindang ke bisi kaul enggau roh ti jai, nuan nunjukka diri deka nyukung Jehovah. Tu tentu ngagaka ati Iya!—Jaku Dalam 27:11.

^ per. 24 Tang, ukai reti iya semua cherita fantasi bisi kaul enggau pengawa bemanang. Orang Kristian ulih mansik asai ati sida empu ke dilatih enggau prinsip ba Bup Kudus, kena nyaga diri ari pengawa tauka pemerindang ke bisi ngembuan pengawa bemanang.—2 Korint 6:17; Hebrew 5:14.