Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Kati Aku Udah Besedia Pindah Rumah Lalu Ngidupka Diri?

Kati Aku Udah Besedia Pindah Rumah Lalu Ngidupka Diri?

Pindah rumah lalu ngidupka diri nya baka ke ngerinduka ati. Tang, taja pia nya mega engka ulih ngasuh nuan takut. Baka ni nuan udah nemu diri sekalika udah besedia pindah rumah lalu ngidupka diri?

 Nama kebuah nuan deka pindah

Taja pan bisi mayuh kebuah nuan deka pindah, tang sekeda ari kebuah nya ukai pemutus ti betul. Chunto, seiku nembiak lelaki ke benama Mario ngaku, “Aku deka pindah laban aku deka rari ari tanggungjawap ba rumah.”

Iya ke bendar, nuan kurang agi bibas enti nuan pindah lalu ngidupka diri. Onya ke beumur 18 taun madah, “Enti nuan pindah, nuan empu patut nyaga rumah, nyediaka pemakai kediri empu, mayar bil, lalu nadai apai indai enggau nuan mutarka semua pekara nya.”

Reti iya: Enti nuan deka nemu sekalika nuan udah besedia pindah tauka enda, nuan patut mansik dulu kebuah nuan ngereja nya.

 Kati nuan nemu ngatur belanja

Jesus madah: “Laban sapa ari bala kita ke deka ngaga sebuah menara, enda dulu ngira ungkus utai nya, ngambika iya nemu sekalika iya bisi duit kena nembuka pengawa nya?” (Luke 14:28) Kati nuan ulih “ngira ungkus” sebedau nuan pindah? Peresa meh pasal diri empu nitihka lis ba baruh:

KATI NUAN NEMU CHARA NGATUR BELANJA?

Bup Kudus madah: ‘Duit meri pengelikun.’—Pengajar 7:12.

  • Kati nuan ngasaika diri tusah nyimpan duit?

  • Kati nuan enda ulih nagang diri bebelanja?

  • Kati nuan suah minjau duit ari orang bukai?

Enti nuan nyaut au ngagai barang tiga iti tanya ba atas, nuan deka napi penanggul ti besai enti nuan pindah!

“Menyadi lelaki aku pindah rumah maya iya beumur 19 taun. Dalam setaun aja, duit simpan iya abis, kerita iya ditarit bank, lalu iya mega enda ulih minjau duit ari bank laban nya iya udah blacklist. Tu ngujungka, iya deka pulai baru ngagai rumah kami.”—Danielle.

Nama utai ke ulih dikereja nuan diatu: Tanya meh apai indai nuan penyampau belanja ke dikena sida dalam sebulan. Nama bil ke patut dibayar, lalu baka ni sida nyediaka duit ti chukup kena mayar utang nya? Kati sida ngatur belanja?

Reti iya: Belajar meh ari apai indai chara ngatur belanja lebuh nuan agi begulai enggau sida. Tu nulung nuan nyediaka diri chara ngatur belanja enggau betul lebuh nuan ngidupka diri.

KATI NUAN BISI DISIPLIN DIRI?

Bup Kudus madah, “Laban genap iku kita enda tau enda mai ma diri empu.”—Galatia 6:5.

  • Kati nuan enda berumban nembuka sesiti pengawa?

  • Kati apai indai nuan patut ngingatka nuan belama pasal pengawa nuan ba rumah?

  • Kati nuan selalu laun pulai ke rumah ari jam ke udah ditetapka?

Enti nuan nyaut au ngagai barang tiga iti tanya ba atas, nuan deka ngasaika diri tusah agi megai tanggungjawap ngidupka diri.

“Enti nuan diau kediri, bisi sekeda utai ke enda dikerinduka nuan agi patut dikereja. Nadai orang ngingatka nuan. Nuan patut lebih agi bedisiplin ngatur jam ngereja semua utai nya.”—Jessica.

Nama utai ke ulih dikereja nuan diatu: Dalam timpuh sebulan, kereja meh enggau naka pemayuh pengawa ba rumah. Chunto, nuan ulih meresi rumah lalu nadai tulung ari orang bukai, nuchi gari diri empu, meli pemakai, berapi, enggau nuchi pinggai mangkuk pengudah makai. Enggau chara tu, nuan nemu nama reti tanggungjawap ke patut dipejalaika nuan lebuh nuan idup kediri.

Reti iya: Enti nuan deka ngidupka diri, belajar dulu meh nyadi orang ke bisi disiplin.

Pindah rumah tang enda nyedika diri nya baka nuan ke terejun ari bilun tang bedau belajar chara ngena payung terejun

KATI NUAN ULIH NAGANG ASAI ATI DIRI EMPU?

Bup Kudus madah, “Buai semua utai nya ari kita, baka: pengeringat, ati ti ngeransi, ati ti bedendam, ati ti seruran deka bejakuka orang.”—Kolosi 3:8.

  • Kati nuan tusah deka begulai enggau orang bukai?

  • Kati nuan tusah deka nagang pengeringat diri?

  • Kati nuan selalu mejal orang bukai nitihka chara nuan?

Enti nuan nyaut au ngagai barang tiga iti tanya ba atas, nuan deka napi penanggul enti diau begulai enggau orang bukai, nyengkaum kaling pengidup nuan empu jemah ila.

“Pengelemi aku pansut maya aku diau begulai enggau orang bukai. Aku nemu diri enda patut ngarapka orang bukai sabar enggau aku belama lebuh aku ngayanka pengeringat diri ketegal stress. Aku patut milih chara ti manah agi lebuh napi stres aku.”—Helena.

Nama utai ke ulih dikereja nuan diatu: Belajar meh ngemansangka pemaik ba apai indai sereta enggau bala menyadi nuan ke bukai. Enti nuan ulih nerima pengelemi orang ke diau begulai enggau nuan ngena chara ti manah, nuan ulih ngereja utai ti sama lebuh nuan begulai enggau orang bukai jemah ila.

Reti iya: Idup kediri ukai reti iya nuan ulih rari ari tanggungjawap ba rumah. Tang, nuan patut nyediaka diri ngulihka peneleba sereta pengelandik ke diguna. Giga meh lalau ari orang ke kala diau kediri. Tanya meh sida, enti sida bisi peluang milih, nama pemutus ke digaga sida? Ngulihka lalau ari orang ke kala ngasaika peneleba nya siti chara ti manah sebedau nuan ngaga sebarang pemutus!