Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Baka Ni Bulih Tinduk ti Chukup?

Baka Ni Bulih Tinduk ti Chukup?

Enti peresa nuan enda mujur ba Matematik, nuan ngumbai diri enda tentu belajar. Enti nuan enda tentu pandai ba sukan, nuan ngumbai diri kurang latih. Tang kala nuan berati, kati nuan chukup tinduk? Uji perundingka tu:

 Nama kebuah nuan patut chukup tinduk?

Nitihka pansik, mayuh nembiak begunaka enam ngagai lapan jam sehari kena tinduk. Nama kebuah tinduk nya amat beguna?

  • Tinduk ngasuh nuan ulih berunding. Bisi orang madahka, tinduk nya sempama “pemakai ke untak.” Enti nuan chukup tinduk, nuan jampat agi nemu utai ke dipelajarka nuan ba sekula, aktif agi ba sukan, sereta nemu mutarka sesiti penanggul.

  • Tinduk ngasuh emosi enggau asai ati nuan manah agi. Orang ke enda chukup tinduk jampat ringat, tusah ati, stress, sereta udu bisi penanggul enggau orang bukai.

  • Tinduk ngasuh nuan bejimat agi maya deriba. Nitihka pansik ba Amerika Serikat, mandingka orang ke deriba ti beumur 40-59 enggau nembiak ti beumur 16-24, “nyauka dua kali ganda mayuh agi eksiden lebuh deriba ketegal ngantuk.”

  • Tinduk manah ke pengerai. Nuan begunaka tinduk ngambi darah ba tubuh nuan manah agi sereta ulih meri pengering. Tinduk ti chukup mega ulih ngurangka obesiti, diabetes, sereta stroke.

Sempana talipun binching ke patut dicas ngambi ulih dikena, nuan mega begunaka tinduk ti chukup, ngambi ulih ngereja mayuh utai enggau manah

 Nama kebuah nuan tusah tinduk?

Taja pan mayuh nembiak nemu guna tinduk, tang sida tetap tusah tinduk. Chunto, seiku nembiak ke beumur 16 taun ti benama Elaine madahka:

“Cikgu nanya kami sekelas, pukul berapa kami tinduk malam. Mayuh ari kami nyaut, dalam urung pukul 2 pagi. Ke bukai madah, dalam urung pukul 5 pagi. Semina seiku aja nembiak madah pukul 9.30 malam.”

Nama kebuah nuan enda ulih tinduk?

Kelalu mayuh kaban. “Aku selalu laun tinduk laban aku suah amat pansut begulai enggau bala kaban.”—Pamela.

Jadual ti kelalu kisuk. “Aku rindu tinduk. Tang, ketegal kelalu kisuk, aku enda chukup tinduk.”—Ana.

Teknologi. “Aku enda chukup tinduk ketegal talipun binching aku. Maya ba peninduk, tusah amat ga enti enda meda talipun dulu.”—Anisa.

 Baka ni bulih tinduk ti chukup?

  • Perundingka pemanah iya bulih tinduk ti chukup. Bup Kudus madah, “Manah agi ngembuan mimit aja utai tang enda irau ati, ari ke seruran bebendar gawa ngena jari dua piak, nguji nangkap ribut.” (Pengajar 4:6) Tinduk nya utai ti amat diguna. Enti nuan enda chukup tinduk, nuan enda ulih ngereja mayuh utai nyentukka ngereja utai ti dikedekaka nuan!

  • Pansik kebuah nuan enda chukup tinduk. Kati nuan rindu begulai enggau bala kaban nuan nyentukka jauh malam? Kati kereja rumah nuan kelalu mayuh? Kati nuan kelalu rindu main talipun binching sebedau tinduk? Tauka, kati talipun binching nuan ngachau maya nuan baru berengkah deka tinduk?

Uji perundingka: Pengudah nuan nemu diri kurang tinduk, nuan begunaka mayuh chara deka mutarka nya. Tang nadai meh guna. Jaku Dalam 21:5 madah, “Bejimat lebuh nuan ngaga pelan, nya baru nuan deka bulih mayuh utai.”

Amat, tiap iku orang bisi chara sida empu ngambika ulih tinduk. Bisi orang madah, sida deka tinduk jenak malam hari enti sida bisi tinduk siang. Tang, bisi mega tusah tinduk malam enti sida udah tinduk siang. Nya alai, giga meh chara ti ngena ba nuan empu. Ba baruh tu bisi sekeda chara ke ulih nulung nuan.

  • Anang ngereja pengawa ti kelalu berat. Enti nuan enda ngereja utai enggau kelalu berat sebedau tinduk, nuan ulih senang agi tinduk.

    “Kitai patut nembuka semua pengawa ba rumah sereta utai bukai sebedau tinduk. Nya alai, kitai enda ibuh irau sebedau tinduk.”—Maria.

  • Ngatur jadual. Anang nejuka penanggul nekul nuan. Atur meh jadual nuan ngambika chukup tinduk.

    “Tiap malam aku begunaka lapan jam kena tinduk. Nya kebuah aku patut dani tumu sereta tinduk enggau jampat.”—Vincent.

  • Nguji tinduk sereta dani ba jam ti sama Bala pakar meransang kitai tinduk sereta dani ba jam ti sama. Enggau chara nya, tubuh kitai deka nyadi biasa enggau atur jam ke ditentuka kitai. Uji kereja tu dalam sebulan, lalu nuan deka ngasaika pemanah iya.

    “Enti nuan tinduk ba jam ti sama ninting malam, ba pagi siti nuan ulih ngasaika nuan ulih berunding enggau manah agi. Tu ngujungka nuan ulih ngereja pengawa nuan enggau mujur.”—Jared.

  • Nemu natak awak begulai enggau orang bukai. Bup Kudus ngasuh kitai “nemu nagang diri.” Tu nyengkaum pengawa ke digaga kitai maya kitai begulai enggau orang bukai.—1 Timoti 3:2, 11.

    “Aku nguji natak awak ke dikena begulai enggau orang bukai lebuh malam hari. Enti nya enda ditagang, jam tinduk aku tentu kena kachau!”—Rebecca.

  • Tejuka talipun binching nuan mega “tinduk”! Manah sejam sebedau tinduk, anang main internet tauka ngirim mesej ngagai bala kaban nuan. Indah, bala pakar mega madahka, penampak ke datai ari talipun binching, TV, tauka tablet ulih ngasuh nuan tusah agi deka tinduk.

    “Orang endang dekaka nuan seruran senang digiga. Tang, ngambika ulih tinduk, nuan patut ngetu meda talipun binching sebedau tinduk.”—Julissa.