Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Kati Aku Udah Besedia Bisi Sulu?

Kati Aku Udah Besedia Bisi Sulu?

 Nama reti besulu?

  • Enti seiku lelaki selalu pansut enggau seiku indu, kati seduai iya benung besulu?

  • Nuan bisi ati ngagai seseiku orang, lalu iya pan bisi ati ngagai nuan. Ninting hari, seduai sama bebalas mesej tauka betalipun ngagai pangan diri. Kati seduai benung besulu?

  • Tiap kali betemu enggau bala kaban, nuan semina bejaku enggau seseiku lelaki tauka seseiku indu aja. Lalu mayuh ngena awak enggau iya. Kati seduai benung besulu?

Nuan engka jampat nyaut tanya ti keterubah. Tang nuan engka bisi kakang deka nyaut tanya kedua enggau ketiga. Nama reti besulu?

Besulu reti iya, nuan ngena mayuh awak tauka beberatka seiku orang aja, lalu orang nya pan sama.

Nyadi, saut ngagai tiga iti tanya nya, au. Enti nuan bisi ati ngagai seiku lelaki tauka seiku indu, enda ngira ba mua mayuh tauka belalai, lalu suah betemu tauka begigaka pangan diri, nya nunjukka seduai benung besulu.

 Nama tuju bisi sulu?

Tuju besulu nya ukai utai ti enda manah. Nya nulung seiku lelaki tauka indu nentuka diri besedia deka kawin tauka enda.

Tang ukai semua nembiak serambau nuan ngembuan runding ti betul pasal pekara tu. Sida engka nadai berunding pasal kawin, tang semina rindu ngena awak sida begulai enggau seseiku indu tauka lelaki. Bisi mega berunding, enti ngembuan sulu, nya baka siti pingat ti ulih diayanka ngagai mayuh orang lalu nunjukka sida pama agi ari orang bukai.

Enti nuan besulu enggau seseiku orang, tu bisi kaul enggau ati iya. Nya kebuah, tentuka nuan bisi tuju ti betul.—Luke 6:31.

Enti nuan besulu tang nadai ati deka kawin, nuan baka seiku anak mit ti main enggau ayam, lalu muai ayam ti lama nya pengudah bulih ayam ti baru

Pikirka: Kati nuan rindu enti bisi orang enda bebasaka asai ati nuan? Iya semina ngumbai nuan sempama ayam anak mit ke ulih dipegai enda lama aja. Pengudah leju, ulih dibuai baka nya aja? Enti nuan enggai digaga baka nya, sama mega enggau orang bukai! Bup Kudus bisi madahka, pengerindu enda “jai jaku enggau orang bukai.”—1 Korint 13:4, 5.

Seiku nembiak indu ke benama Chelsea madah, “Kekadang aku ngasaika besulu nya semina main-main aja. Tang enti seiku ari orang nya udah amat bisi ati ke seiku da agi, nya ukai main-main agi.”

Chara: Kena nuan nemu diri udah besedia bisi sulu tauka kawin, bacha meh 2 Peter 1:5-7 lalu pilih siti ari kualiti ti patut dikemansangka nuan. Pengudah sebulan, peratika kati nuan bisi ngaga pemansang tauka enda.

Ni maya umur ti chun bisi sulu?

  •   Ba runding nuan, berapa umur kitai patut bisi sulu?

  •  Uji tanya apai indai nuan pasal utai tu.

Saut nuan enggau apai indai engka enda sama. Enti pia, tu nunjukka nuan udah ngaga pemutus ti betul. Laban nuan sanggup nganti nyentukka maya ti chun, lalu ngelala diri empu enggau dalam agi sebedau berengkah bisi sulu.

Danielle, seiku nembiak indu ke beumur 17 taun milih chara ti sama. Iya madahka, “Dua taun ti udah, kualiti kedeka aku ari orang ke deka nyadi laki aku, enda sama enggau kualiti kedeka aku diatu. Iya ke amat, diatu pan aku agi kakang pasal pemutus tu. Pengudah aku ngembuan runding sereta asai ati ti sama dalam beberapa taun, baru meh aku deka berunding pasal besulu.”

Siti da agi kebuah nuan patut nganti pasal besulu. Bup Kudus madah, lebuh nuan agi nembiak, nuan bisi pengingin seks sereta asai ati ti romantik ke tusah deka ditagang. (1 Korint 7:36) Enti nuan berumban bisi sulu lebuh agi nembiak, tu ulih meransang pengingin seks ti enda ulih ditagang lalu ngujungka pengawa ti enda bemoral.

Engka sekeda ari orang ke serambau nuan ngumbai pengawa tu enda salah. Mayuh ari sida rindu ngereja pengawa ti enda bemoral. Tang nuan patut bebendar ngelaban runding ke baka nya! (Rome 2:2) Bup Kudus madahka, “Seliahka ulah ti kamah.” (1 Korint 6:18) Enti nuan nganti lalu bisi sulu pengudah nuan ngelui ari maya pengingin agi biak, nuan ulih nyeliahka diri ari mayuh penusah.—Pengajar 11:10.

Nama kebuah aku patut enda beguai bisi sulu?

 Kala nuan ditekan ngaga siti peresa tang nadai kala belajar pasal pelajar nya? Tu meh asai iya enti nuan ditekan bisi sulu tang nuan bedau besedia. Nya enda patut! Nuan begunaka awak belajarka sesiti pelajar, ngambi nuan ulih nyaut maya tanya nya pansut ba peresa.

Sama mega enggau besulu.

Besulu ukai utai ti mit aja. Nya alai, sebedau nuan bisi ati ngagai sesapa, nuan begunaka awak belajarka utai nya. Berengkah ari chara ngembuan kaul ti manah.

Enggau chara nya, dudi hari, lebuh nuan betemu enggau seiku sulu ti chun, nuan udah besedia ngembuan kaul ti teguh. Iya ke amat, tikah ti mujur ketegal bisi kaul ti rapat entara dua iku orang.

Enti nuan sanggup nganti, ukai reti iya nuan nadai pengelantang ba ati. Tang, nuan tentu bulih mayuh agi pengelantang “kala agi biak.” (Pengajar 11:9) Nuan mega bisi mayuh awak nyediaka diri sebedau bisi sulu lalu ngemanahka agi kualiti, ba nuan empu sereta negapka pengarap nuan.—Sabak Kenang 3:27.

Pia mega, nuan agi ulih bekaban enggau semua orang enda ngira lelaki tauka indu. Nama chara iya? Begulai enggau seraban orang lalu tentuka bisi orang ke udah besai tuai enggau kita. Seiku nembiak indu ke benama Tammy madah, “Aku ngasaika tu chara ti manah. Manah agi ngembuan mayuh kaban.” Monica mega setuju enggau Tammy. Iya madahka, “Begulai dalam siti raban nya siti chara ti manah ngambika kitai ulih ngelala pangan diri ti ngembuan mayuh macham kualiti.”

Tang, enti nuan kelalu beberatka seiku orang aja, tu ulih ngujungka nuan senang agi asa ati. Nya kebuah, anang beguai. Kena meh maya nuan agi biak belajarka chara ngemansang sereta ngetanka sesiti kaul. Dudi hari, enti nuan deka bisi sulu, nuan udah ngelala sapa diri empu lalu nemu nama utai kedeka nuan ari seseiku orang ti deka nyadi kaling pengidup nuan.