Terus ngagai penerang

TANYA ARI BALA NEMBIAK

Bekaban Aja tauka Dating?—Begian 2: Kati Ulah Aku Ngasaka Ati Orang?

Bekaban Aja tauka Dating?—Begian 2: Kati Ulah Aku Ngasaka Ati Orang?

Nuan selalu ninga lebuh kaban nuan bejaku. Lalu empai lama ti udah, nuan selalu bejaku enggau seiku ari kaban nuan. Penanggul iya, kaban nuan nya enda sama penempa. Nuan berunding, ‘Kami semina bekaban aja,’ lalu nuan mega ngasaika iya pan baka nya. Kati nya amat?

 Utai ke ulih nyadi

Nadai salah bisi kaban indu tauka lelaki. Tang, baka enti nuan kelalu rapat enggau seiku ari kaban nuan nya? Enti nya nyadi, kaban nuan nya engka saru penemu ngumbai seduai benung besulu.

Kati nya endang sigi utai kedeka nuan? Enti ukai, uji perundingka nama kebuah utai tu tau nyadi?

  • Nuan kelalu mayuh awak enggau iya.

    “Amat, nuan enda ulih nyaga ati seseiku orang. Tang, anang meh ngasuh kaban nuan asa ati, lalu madahka seduai semina bekaban aja, tang nuan selalu betalipun sereta bejaku enggau iya. Nya baka ke manjah api ngena minyak tanah.”—Sierra.

  • Nuan baka ke meri pengadang ngagai iya.

    “Ukai aku dulu nganjung mesej, aku semina malas tiap kali iya nganjung mesej. Udah nya, tusah aku deka madahka diri semina ngumbai iya kaban biasa.”—Richard.

  • Nuan meransang iya bisi minat ngagai nuan.

    “Bisi orang rindu meransang orang bukai bisi minat ngagai sida. Sida semina ngasaka ati orang bukai, tang nadai ati deka besulu. Aku suah meda utai tu nyadi, nya tentu ngasuh orang telih ba ati.”—Tamara.

Batang ajar: Ketegal suah berandau sereta kelalu ngayanka pengibuh, ulih ngasuh orang nya ngumbai nuan bisi ati ngagai iya.

 Kebuah nuan patut berunding panjai

  • Nya ulih ngasuh ati telih.

    Bup Kudus madah: “Lebuh nuan nadai agi pengadang, ati nuan tusah.” (Jaku Dalam 13:12) Enti bisi orang ngayanka pengibuh ti spesial ngagai nuan, nama utai ke dikearapka nuan ari iya?

    “Kekadang, orang rindu meri janji pelesu. Tu sempama siku ikan ke udah makai umpan tang enda ditangkap, tang enda mega dilepaska. Tu mega ulih nyadi ba pengidup mensia. Enti nuan nadai ati deka besulu, tang nuan majak ngaga janji pelesu ngagai seseiku orang, nuan ulih ngasuh ati orang nya telih.”—Jessica.

  • Nuan ulih ngenyaika nama diri empu.

    Bup Kudus madah: “Anang semina berundingka diri empu aja, tang berunding mega ke orang bukai.” (Pilipi 2:4) Nama runding nuan pasal orang ke semina berundingka diri empu aja? Nama kebuah kitai ngumbai ulah ke baka tu, ulih ngenyaika nama iya empu?

    “Aku enda rinduka nembiak lelaki ke semina deka bemain aja ba pengerindu. Ulah iya nya nunjukka iya enda ulih dipechaya dudi hari. Orang ke baka nya mega amat sumbung, sereta berundingka diri empu aja, laban iya rindu ngemelika orang bukai ngambika iya tampak rita.”—Julia.

Batang ajar: Orang ke semina ngasaka ati orang bukai, tang nadai ati deka besulu, ukai aja ulih ngasuh ati orang bukai telih, pia mega ulih ngenyaika nama iya empu.

 Utai ke ulih digaga nuan

  • Jaku lalau ba Bup Kudus madahka kitai patut ngumbai orang bukai nya baka kaban belayan kitai empu. (1 Timoti 5:1, 2) Enti nuan nitihka prinsip tu, nuan ulih nyaga kaul nuan enggau kaban indu sereta kaban lelaki nuan.

    “Enti aku udah kawin, aku tentu enda main pengerindu enggau laki orang. Ketegal aku bedau belaki, aku patut belajar ari diatu chara begulai enggau lelaki bukai.”—Leah.

  • Bup Kudus madah, “Mayuh agi jaku disebut, mayuh agi penyalah.” (Jaku Dalam 10:19) Prinsip tu mega ulih dikena nuan maya berandau enggau orang bukai, tauka maya nuan nganjung mesej.

    “Enti nuan nadai ati deka besulu, nuan enda patut nganjung mesej ngagai seiku indu ninting hari.”—Brian.

  • Bup Kudus madah, “Tang penemu-dalam ti datai ari atas nya, lumur satu, tuchi.” (James 3:17) Gaya beberap nya ulih dikenataika enggau chara ti tuchi, tang nya mega siti ari gaya ke tau nyadika bukti nuan bisi ati ngagai seseiku orang.

    “Maya berandau, aku selalu ngayanka diri senang enggau begulai. Taja pia, aku tetap netapka tatak sereta nakat takah kami.”—Maria.

Batang ajar: Peresa meh ulah nuan maya begulai enggau kaban lelaki tauka kaban indu. “Enda senang bulih kaban ti manah, nya alai anang meh ngerusak kaul nuan ketegal ulah nuan ti ngasuh asa ati,” ku seiku nembiak indu ke benama Jennifer.

 Chara

  •  Dingaka orang bukai. Enti orang nanya, “Kati seduai benung besulu?” Tu nunjukka seduai udah kelalu rapat enggau pangan diri.

  •  Begulai enggau chara ti sama ngagai semua orang, lalu anang kelalu meri mayuh awak ngagai seiku aja ari sida.

  • Bejimat maya nganjung mesej. Bejimat mega enggau leka jaku dalam mesej nuan, ni penyuah seduai bemesej, lalu kemaya nuan nganjung mesej. “Nama kebuah nganjung mesej ngagai kaban indu tauka kaban lelaki maya malam hari?” ku seiku nembiak indu ke benama Alyssa.