Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Bekaban Aja tauka Dating?—Begian 1: Kati Aku Semina Saru Penemu?

Bekaban Aja tauka Dating?—Begian 1: Kati Aku Semina Saru Penemu?

Nuan bisi ati ke iya, lalu nuan mega ngasaika iya pan bisi ati ngagai nuan. Seduai selalu begulai, sms, lalu sekeda ari sms ke diterima nuan ari iya endang amat romantik.

Nya alai, nuan deka nemu nama kaul seduai, lalu nentu sekalika seduai bisi ati ke pangan diri. Tang, iya madahka, “Aku enggau nuan semina bekaban aja.”

 Kati asai ati nuan

“Aku berasai pedis ati ngagai iya sereta diri empu! Ninting hari kami nganjung sms ngagai pangan diri, lalu iya nunjukka diri bisi minat ngagai aku. Nya kebuah aku pan bisi ati ngagai iya.”—Jasmine.

“Aku enggau seiku indu begulai enggau kaban kami ke benung dating. Kekadang, kami pan ngasaika diri baka ke dating. Kami selalu berandau nengah sms. Aku berasai asa amat ati lebuh iya madahka, kami semina kaban aja, lalu ngelamatu iya endang sigi udah bisi sulu.—Richard.

“Seiku nembiak lelaki selalu nganjung sms ngagai aku. Kekadang kami duai sama bela nganjung sms ke romantik ngagai pangan diri. Tang, lebuh aku madahka asai ati aku ngagai iya, iya ketawa lalu madah, ‘Aku bedau sedia deka dating enggau sapa-sapa diatu!’ Aku enda ngetu-ngetu nyabak.”—Tamara.

Batang ajar: Enti nuan ngasaika diri bisi kaul ti spesial enggau seseiku orang, tang udah nya baru nuan nemu diri semina lebuh ngapa, nuan tentu berasai pedis ati, malu, sereta dikemulaka. Seiku nembiak ke benama Steven madah, “Aku berasai tusah amat ati sereta asa lebuh utai tu nyadi. Aku tusah deka pechayaka orang bukai.”

 Nama kebuah utai tu nyadi

Nengah sms enggau media sosial, nuan senang amat bisi ati ngagai seseiku orang ke nadai ati ngagai nuan. Peratika utai ke kala nyadi ngagai beberapa iku nembiak.

“Bisi orang nganjung sms ngagai nuan ketegal sida nadai pengawa. Tang, nuan ngumbai iya ka ke nuan. Enti iya nganjung sms ngagai nuan ninting hari, nuan engka ngumbai seduai bisi kaul ti spesial.”—Jennifer.

“Seiku engka bisi ati deka bedating, tang seiku da agi semina deka ngiga kaban endur berandau, ngambi iya ngasaika diri bisi mayuh peminat.”—James.

“Sms ke senang aja baka, ‘selamat malam’ pan engka udah dikumbai romantik, taja pan sms nya biasa aja.”—Hailey.

“Enti seseiku orang nganjung sms gambar tuchum (emoji), nya engka mai reti iya semina deka nunjukka basa, tauka pan ulih dikumbai iya bisi ati ngagai nuan. Tang, kekadang orang ke nerima sms nya, terus ngumbai nuan bisi ati ngagai iya.”—Alicia.

Batang ajar: Anang meh terus ngumbai orang bisi ati ngagai nuan ketegal iya ibuhka nuan.

Enda sesenang bejaku, enda pia? Amat! Bup Kudus madah, “Sapa nemu ati mensia? Nadai utai ti nemu agi ngakal ari ati mensia.” (Jeremiah 17:9) Ati nuan ulih ngasuh nuan nirika siti ‘taman pengerindu’, tang udah nya anchur luluh pengudah nuan nemu diri semina asa aja.

 Nama patut digaga nuan

  • Anang kelalu nitihka ati. Uji perundingka enggau dalam pasal kaul seduai. Tanya diri empu, “Kati aku bisi bukti ti chukup kena nunjukka chara iya begulai enggau aku lebih spesial dibanding enggau orang bukai?” Anang meh nejuka asai ati nguasa “chara kita berunding.”—Rome 12:1, 2.

  • Berunding enggau manah. Perundingka baru, “Kati aku bisi bukti kena nunjukka iya amat bisi ati ngagai aku?” Anang beguai nyimpulka, enti nuan bisi ati ngagai orang nya, iya pan bisi ati ngagai nuan.

  • Sabar. Seagi iya bedau madahka diri deka dating enggau nuan, anang meh kelalu andal, laban nya engka ulih ngasuh nuan asa ati.

  • Anang kelalu lama belalaika asai ati diri. Bup Kudus madah, bisi “maya enda bemunyi.” (Pengajar 3:7) Enti nuan deka nemu sekalika iya bisi ati tauka enda ngagai nuan, tanya meh iya. Seiku nembiak indu ke benama Valerie madah, “Enti iya madahka diri nadai ati ngagai nuan, nya jauh manah agi ari nuan ke nganti lama, tang penudi iya nuan ke pedis ati, pengudah nuan nemu iya nadai ati ke nuan.”

Batang ajar: Nitihka Jaku Dalam 4:23 madahka, “Bejimat lebuh nuan berunding” tauka jaga meh ati nuan. Enti nuan bisi ati ngagai seseiku orang, peresa meh dulu, sekali iya bisi ati ngagai nuan tauka enda. Enti nuan kelalu nitihka asai ati sebedau nemu semua utai, nya sempama nanam utai tumbuh ba atas batu.

Enti nuan nemu orang nya amat bisi ati ngagai nuan, lalu nuan pan udah chukup penemu sereta sedia deka dating, nya baru nuan ulih mutuska, sekali deka neruska kaul seduai nya tauka enda. Ingat meh, tikah deka tan belama enti laki bini bisi juluk ati ti sama ba pengarap, sereta enda belalaika nama-nama utai ari pangan diri. (1 Korint 7:39) Endang amat, pengudah kawin, seduai ulih terus nyadi kaban ti rapat.—Jaku Dalam 5:18.