Terus ngagai penerang

TANYA ARI BALA NEMBIAK

Kati Ngena Jaku Jai nya Endang Amat Salah?

Kati Ngena Jaku Jai nya Endang Amat Salah?

“Aku udah biasa ninga orang bejaku jai. Nya kebuah nya pan biasa ba aku. Aku nadai penanggul enggau nya.”—Christopher, 17.

“Suba aku selalu bejaku jai. Senang amat ulah nya nyadi biasa, tang tusah amat deka ngetuka nya.”—Rebecca, 19.

 Kuis

  • Kati asai ati nuan lebuh ninga orang bukai bejaku jai?

    • Nadai nama-nama. Ba aku, nya enda jai.

    • Mimit berasai enda nyamai, tang enda ngawa meh.

    • Aku enda rindu, lalu aku enda tan ninga nya.

  • Ni penyuah nuan bejaku jai?

    • Enda kala

    • Kekadang

    • Suah

  • Ba penemu nuan, kati ulah tu manah tauka enda?

    • Manah

    • Enda

 Nama kebuah tu salah

Ba nuan, kati bejaku jai nya salah? Nuan engka nyaut, ‘Enda ga. Mayuh agi utai jai ke bukai ti patut diperundingka kitai. Lalu ulah bejaku jai nya udah biasa!’ Kati nya amat?

Iya ke bendar, mayuh orang enda rindu ngena jaku jai. Sida bisi kebuah ti manah ke enda kala diperundingka nuan. Ngambika chunto:

  • Bejaku jai ulih nemu sapa nuan. Orang ulih nemu sapa nuan ari jaku ke dikena nuan. Enti nuan ngena jaku ti kamah, nuan nunjukka diri enda pedulika asai ati orang bukai. Kati nuan amat baka nya?

    Bup Kudus madah, “Utai ti pansut ari nyawa, datai ari ati.”—Matthew 15:18.

    Bejaku jai sempama asap ti kamah. Anang ketegal nya, nuan lenyau semua orang ke ngelingi nuan.

  • Bejaku jai ulih ngasuh orang bukai enda manah runding pasal nuan. Bup Cuss Control madah, “Chara kitai bejaku nentuka sapa kaban kitai, kati diri sebilik sereta orang ke sama gawa deka begulai enggau kitai, ni pemanah kaul kitai enggau orang bukai, kati ulah kitai ulih ngachau orang, kati kitai ulih bulih kereja tauka niki pangkat, sereta baka ni orang ke enda dikelala begulai enggau kitai.” Bup nya nambahka, “Perundingka, enti nuan enda bejaku jai, nuan engka ulih ngemanahka kaul nuan enggau orang bukai.”

    Bup Kudus madah, “Buai semua dengki, tebiat ngeransi, pengeringat, jaku laya.”—Epesus 4:31.

  • Bejaku jai enda selawa baka ke diperundingka nuan. Ba bup How Rude! Dr. Alex Packer madah, “Orang ke selalu bejaku jai nya ngasuh ati begedi.” Iya mega madah, bejaku jai enda ngasuh orang nya tampak pandai, cheregas tauka manah. Iya madah agi, jaku jai ke baka nya ulih ngachau chara orang bukai berunding.

    Bup Kudus madah, “Anang mansutka jaku ti jai.”—Epesus 4:29.

 Utai ke ulih digaga nuan

  • Tetapka juluk ati. Uji enda bejaku jai pengelama sebulan tauka kurang. Nuan ulih nulis pemansang nuan ba kalinder. Tang, ngambika ulah nya ulih diteruska, nuan patut ngereja beberapa iti utai. Chunto iya:

  • Seliahka pemerindang ti ngisi runding nuan enggau utai ti jai. Bup Kudus madah, “Orang ke jai ngerusak moral ti menyana.” (1 Korint 15:33) “Orang ke jai” ukai semina dituju ngagai mensia. Tu nyengkaum pemerindang baka filem, video game, enggau lagu. Kenneth ke beumur 17 taun madah, “Enti nuan rinduka siti lagu, chukup senang nuan nitihka lagu nya taja pan bisi jaku jai dalam lagu nya.”

  • Nemu berunding. Sekeda orang bejaku jai kena nunjukka diri baka orang ke besai tuai. Nya penemu ti salah. Nitihka ajar Bup Kudus, orang ke besai tuai nemu ni bagi betul salah dalam sesiti utai. (Hebrew 5:14) Sida enda ngena jaku jai ngambi diterima orang bukai.

Jaku ti kamah semina ngerusak runding nuan sereta orang ke ninga nya. Ba dunya tu udah mayuh orang bejaku jai. “Anang nunda ulah sida,” ku Cuss Control. “Jaga meh chara nuan bejaku ngambi penanggul tu enda majak nyadi. Nuan deka ngasai manah agi lalu orang bukai pan rindu begulai enggau nuan.”