Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Nama Chara ti Manah Kena Aku Madahka Atur Ari Apai Indai nya Ngena Tauka Enda?

Nama Chara ti Manah Kena Aku Madahka Atur Ari Apai Indai nya Ngena Tauka Enda?

“Maya aku beumur 15 taun, atur ari apai indai nya ngena ba aku. Tang diatu aku udah 19 taun, lalu aku ngasaika diri patut diberi mayuh agi awak kediri empu.”—Sylvia.

Kati nuan ngasaika jaku Sylvia nya amat? Enti au, topik tu ulih nulung nuan chara ti manah madahka atur ari apai indai nya ngena tauka enda.

 Utai ke patut ditemu nuan

Sebedau nuan berandau enggau apai indai pasal atur sida, perundingka dulu beberapa iti utai tu:

  • Idup tentu charut enti nadai atur. Gambarka jalai alun ti mayuh kerita. Nama ulih nyadi enti nadai atur ba jalai alun, nadai tanda jalai, nadai api isyarat, tauka takat pengelaju kerita ke ulih dibai? Tentu charut enda pia? Atur ke disediaka ba rumah baka atur ba jalai alun ti ulih nyaga pengelikun kitai.

  • Atur ngayanka pengerindu apai indai ngagai nuan. Enti sida nadai meri atur, nya nunjukka sida enda pedulika nuan. Kati nuan dekaka apai indai ke baka tu?

NEMU NUAN? Apai indai mega patut nitihka atur! Bacha meh Pemungkal 2:24; Ulang Adat 6:6, 7; Epesus 6:4; enggau 1 Timoti 5:8.

Tang, baka ni enti nuan agi ngasaika atur ari apai indai nuan nya enda ngena?

 Utai ke patut digaga nuan

Berunding panjai dulu sebedau berandau enggau sida. Enti nuan selalu enda ngasika jaku apai indai, nuan enda patut minta sida ngurangka atur nya. Tang, peda meh topik, “Baka Ni Aku Ngasuh Apai Indai Pechayaka Aku?

Enti nuan selalu ngasika sida, sediaka enggau manah utai ke deka disebut nuan. Pengudah nuan nyediaka utai ke deka disebut, baru meh nuan nemu sekalika utai ke deka dipinta nuan nya patut tauka enda. Udah nya, pinta meh awak ti chun ngagai apai indai nuan ngambika kita ulih berandau ba endur ti manah sereta senang agi deka mansutka asai ati. Maya nuan berandau enggau sida, kingatka pekara tu:

Bebasaka sida. Bup Kudus madahka, “jaku ti kasar ngasuh orang ringat.” (Jaku Dalam 15:1) Enti nuan belaya enggau apai indai tauka ngumbai sida bepilih mata, tentu meh randau kita enda mujur.

“Lebuh aku bebasaka apai indai aku, sida mega bebasaka aku. Senang agi mutarka sesiti penanggul enti semua orang ngayanka basa.”—Bianca, 19.

Dingaka penemu sida. Bup Kudus ngelalau kitai, “jampat mending, lubah mansutka jaku.” (James 1:19) Kingatka meh, nuan berandau enggau apai indai nuan ukai meri cheramah ngagai sida.

“Seraya kitai mansang besai, kitai ngumbai diri pandai agi ari apai indai, tang nya runding ti salah. Kitai patut ningaka lalau sereta iring ari sida.”—Devan, 20.

Enda berundingka diri empu. Asaika meh penemu apai indai nuan. Titihka lalau ari Bup Kudus tu: “Anang semina berundingka diri empu aja, tang berunding mega ke orang bukai.”—Pilipi 2:4.

Ni bagi chara ba ditu, chara ti manah madahka pasal atur ari apai indai nuan?

“Suba, aku meda apai indai baka munsuh, ukai kaban aku. Tang baru diatu aku nemu, sida benung sereta bebendar deka nyadi apai indai ti manah baka aku ke benung sereta bebendar deka nyadi orang ke besai tuai ke ulih megai mayuh agi tanggungjawap. Sida rindu sereta ibuhka aku.”—Josua, 21.

Beri meh penemu ti manah. Chunto, nuan deka enggau gathering, tang nuan patut deriba pengelama sejam ngagai endur nya, lalu apai indai nuan enda ngemendarka. Tanya meh sida kebuahkati sida enggai meda nuan deriba jauh, tauka irau pasal enggau sapa nuan begulai?

  • Enti sida irau meda nuan deriba jauh, tanya meh sida sekalika sida ngemendarka seiku da agi kaban nuan enggau, maya nuan deriba.

  • Enti sida irau pasal enggau sapa nuan begulai, padah ngagai sida sapa ke datai enggau sapa ke nyaga kita sepemanjai gathering nya.

Ingat meh, nuan patut bejaku enggau chara ti nelap lalu ningaka penemu apai indai nuan enggau sabar. Ayanka diri bebasaka sida nengah jaku sereta ulah nuan. (Epesus 6:2, 3) Kati sida ngubah chara sida ngaga atur? Engka au, engka enda. Enda ngira nama pemutus apai indai nuan . . .

Terima meh pemutus apai indai nuan. Tu amat beguna, ngambika dudi hari apai indai nuan ulih ngubah chara sida ngaga atur. Tang, enti nuan enda bebasaka atur sida lalu belaya enggau sida, sida tusah deka ngubah atur ke udah ditetapka sida.