Terus ngagai penerang

TANYA ARI BALA NEMBIAK

Baka Ni Aku Ulih Begulai enggau Apai Indai Aku?

Baka Ni Aku Ulih Begulai enggau Apai Indai Aku?

 Kuis

  • Nuan selalu enda sepenemu enggau sapa?

    • Apai

    • Indai

  • Ni penyuah nuan enda sepenemu enggau apai indai?

    • Jarang

    • Kekadang

    • Suah

  • Enti kita bekelakar, kesuah iya nama nyadi?

    • Kesuah iya enda lama, udah nya begulai baru.

    • Kesuah iya patut lama belaya, nya baru ulih begulai baru.

    • Panjai belaya tang penanggul nya tetap enda ulih diputarka.

Enti nuan enda ulih begulai enggau apai indai, nuan engka berunding, sida ke patut ngemanahka kaul kita sebilik. Tang, artikel tu deka berandauka utai ke ulih digaga nuan ngambi enda selalu belaya ketegal enda sepenemu. Pia mega, taja pan bisi laya, tang laya nya enda kelalu besai. Keterubah, uji perundingka . . .

 Nama kebuah nuan enggau apai indai enda sepenemu

  • Chara berunding. Seraya nuan mansang besai, nuan berengkah berunding pasal utai ke berat agi dibandingka maya nuan agi mit. Nuan berengkah bisi penemu diri empu, lalu kekadang penemu nuan nya enda sebaka enggau apai indai. Taja pia, Bup Kudus madah, “Bebasaka apai enggau indai kita.”—Pemansut 20:12.

  • Fakta ba pengidup: Nuan patut chukup penemu-dalam sereta bebendar enda ngayanka ulah ti kasar taja pan ba maya ti enda sepenemu.

    Nuan deka bibas ngereja utai. Maya nuan mansang besai, apai indai pan deka meri nuan peluang bibas ngereja mayuh utai. Tang, sida engka enda ngemendarka nuan bibas lebih ari ke patut tauka penyampat kedeka nuan. Nya siti ari kebuah kita belaya. Tang Bup Kudus ngelalau, “Kita ke anak, ngasika apai indai kita.”—Epesus 6:1.

    Fakta ba pengidup: Kesuah iya, pemayuh peluang bibas ke diberi apai indai bepanggai ba chara nuan ngena peluang nya enggau manah.

 Utai ke ulih digaga nuan

  • Kemeratka utai ti ulih digaga nuan. Ari ke nyalahka apai indai, pikirka utai ti ulih digaga nuan ngambika kita enda belaya. “Kekadang, laya nyadi ukai ketegal utai ke disebut apai indai, tang chara nuan bejaku enggau sida,” ku seiku nembiak ke benama Jeffrey. “Enti nuan bejaku enggau nelap, penanggul nya jampat agi diputarka.”

    Bup Kudus madah, “Enti ulih, seagi-agi utai nya bepanggai ba kita, diau bebaik enggau semua orang.”—Rome 12:18.

  • Dingaka dulu utai ku apai indai nuan. “Tu pemadu tusah ba aku,” ku Samantha ke beumur 17 taun. “Tang, iya ke amat, enti apai indai meda nuan ningaka sida, sida mega deka ningaka nuan.”

    Bup Kudus madah, “Jampat mending, lubah mansutka jaku.”—James 1:19.

    Enda sepenemu nya sempama api. Enti enda diputarka, ulih ngemedis

  • Seati. Mutarka penanggul nya baka pekit tenis. Apai indai nya tim nuan, ukai munsuh nuan. Kita ngelaban utai ti sama, iya nya penanggul ke patut diputarka. “Maya bisi penanggul, apai indai dekaka utai ti pemadu manah ngagai anak sida. Pia mega anak, sida dekaka utai ti pemadu manah ke diri empu,” ku seiku nembiak ke benama Adam. “Reti iya, tuju sida sama.”

    Bup Kudus madah, “Ngereja utai ti mai pemaik, enggau utai ti tau ngeringka pangan diri.”—Rome 14:19.

  • Nguji ngasaika utai ti diasaika apai indai nuan. “Apai indai aku mega bisi penanggul ke tusah diputarka sida, sama baka aku. Maya aku ingatka utai tu, nya nulung aku sabar agi,” ku seiku nembiak ke benama Sarah. Nembiak ke benama Carla meri chara ti manah agi. Ku iya, “Aku nguji nyemaka diri nyadi apai indai. Baka ni asai iya nyadi apai indai, enti aku ngemesaika anak lalu napi penanggul ti sama? Nama chara ti manah ke patut digaga aku?”

    Bup Kudus madah, “Anang semina berundingka diri empu aja, tang berunding mega ke orang bukai.”—Pilipi 2:4.

  • Ngasika apai indai. Bup Kudus ngelalau, nya meh utai ke patut dikereja nuan. (Kolosi 3:20) Semua utai senang agi diputarka enti nuan ngasi. “Aku enda kelalu stress enti aku ngasika apai indai,” ku seiku nembiak indu ke benama Karen. “Sida udah meri mayuh utai ngagai aku. Tu aja meh chara aku malas budi sida.” Ngasika apai indai chara ti pemadu manah ngambi ulih begulai!

    Bup Kudus madah, “Api padam enti nadai kayu.”—Jaku Dalam 26:20.

Chara. Enti nuan ngasaika diri tusah deka mansutka asai ati, uji tuliska asai ati nuan nya dalam siti keretas tauka nengah mesej. “AKu ngereja nya maya aku ngasaika diri tusah deka nagang diri,” ku seiku nembiak ke benama Alyssa. “Nya nulung aku mansutka asai ati, tang enda ibuh nyerauh tauka nyebut utai ti ngasuh aku nesal.”