Terus ngagai penerang

Saksi-Saksi Jehovah

Pilih bansa jaku Iban

TANYA ARI BALA NEMBIAK

Baka Ni Aku Nulak Penguji?

Baka Ni Aku Nulak Penguji?

Rasul Paul nulis: “Lebuh aku deka ngereja utai ti badas, aku lalu milih penyai.” (Rome 7:21) Kala nuan ngasaika utai baka tu? Artikel tu ulih nulung nuan nulak penguji ari pengingin ti salah.

 Utai ti patut ditemu nuan

Penguji ari orang ke serambau pedis diseliahka. Iya ke amat, dalam Bup Kudus endang udah nulis, “orang ke jai ngerusak moral ti menyana.” (1 Korint 15:33) Bekaban enggau orang ke salah sereta media sosial ti enda manah ulih ngasuh pengingin kitai ti salah tusah agi ditagang. Nya engka ulih meransang kitai ngereja “mayuh penyalah.”—Pemansut 23:2.

“Ngambika bulih mayuh kaban, tu ngujungka kitai ngereja utai ke didekaka sida.”—Jeremy.

Perundingka: Nama kebuah kitai tusah agi nulak penguji enti kitai kelalu pedulika jaku orang bukai?—Jaku Dalam 29:25.

Batang ajar: Anang nejuka bala kaban ngelimpangka runding nuan ari ngereja utai ti betul.

 Nama patut digaga nuan

Patut ngembuan runding diri empu. Enti nuan nadai runding diri empu, nuan sempama baka anak patung ke nitihka chara orang bukai. Manah agi enti nuan nitihka lalau Bup Kudus tu: ‘Tang uji dulu semua utai. Bepegai teguh ba utai ti badas.’ Enti nuan nemu tauka bisi runding diri empu, nuan tentu enda senang dilimpangka sereta senang agi nulak penguji.

Perundingka: Nama kebuah nuan pechaya Perintah Petara nya manah?

“Selalu iya, enti aku bisi runding diri empu sereta enda senang dilimpangka, sida deka agi bebasaka aku.”—Kimberly.

Teladan ari Bup Kudus: Daniel. Engka kenyau ari biak, Daniel endang sigi udah “mutuska runding” deka ningaka pesan Petara.—Daniel 1:8.

Enti nuan nadai runding diri empu, nuan baka anak patung ke nitihka chara orang bukai

Nemu pengelemi diri. Nitihka ku Bup Kudus, nembiak bisi “pengingin nembiak.” (2 Timoti 2:22) Pengingin tu tusah ditagang kelebih agi maya nuan agi biak. Tu ukai semina bekaul enggau pengingin ba seks, tang tu mega nyengkaum pengingin deka mayuh kaban sereta bibas ari atur ke diberi apai indai taja pan nuan agi begunaka jaga ari sida.

Perundingka: Nitihka ku Bup Kudus, “kitai diuji pengingin kitai empu, ti ngumpan lalu manjuk kitai.” (James 1:14) Nama pengingin ti salah ke tusah ditulak nuan?

“Anang nipu diri empu. Nuan patut nemu nama penguji ke tusah ba nuan. Nuan patut belajar nulak penguji nya, lalu tuliska chara ke dikingatka nuan. Enggau chara tu, maya penguji nya datai, nuan udah nemu chara nulak iya.”—Sylvia.

Teladan ari Bup Kudus: David. Iya kala ngereja penyalah ketegal ningaka jaku orang bukai sereta pengingin iya empu ti salah. Tang iya belajar ari penyalah diri lalu bebendar ngubah diri. Iya besampi ngagai Petara Jehovah, “Gaga ati aku tuchi, . . . lalu simpan roh ti baru sereta taluk, dalam aku.”—Masmur 51:10.

Anang jampat ngalahka diri. Bup Kudus bisi madah, “Anang alah laban penyai, tang alahka penyai ngena pemadas.” (Rome 12:21) Reti iya, nuan empu patut milih sekalika nuan deka alah laban penguji tauka ngelaban penguji nya.

Perundingka: Baka ni nuan enda jampat ngalahka diri lebuh bisi penguji ngereja utai ti salah?

“Kekadang aku berunding, enti aku alah laban penguji, kati aku ulih gaga ati? Ulih, tang enda lama aja. Udah nya, kati asai ati aku? Tentu balat tusah ati. Nya alai, kati aku patut jampat ngalahka diri laban penguji?”—Sophia.

Teladan ari Bup Kudus: Paul. Iya kala madahka diri bisi pengingin ti salah. Tang, iya ulih ngelaban nya. Iya nulis, “Aku mandam tubuh aku lalu ngaga iya nyadi ulun.”—1 Korint 9:27.

Batang ajar: Enti bisi penguji, nuan empu patut ngaga pemutus. Anang jampat ngalahka diri.

Ingat meh, penguji nya enda lama. Melissa ke beumur 20 taun madahka, “Maya aku agi ba sekul pom, penguji ke ditapi aku maya nya amat tusah. Tang diatu, penguji nya nadai asai agi.” Iya madahka, “Ari tu aku nemu, penguji ke diasaika aku diatu nya deka lenyau. Dudi hari, aku tentu gaga ati laban ulih nulak penguji ke diasaika aku diatu.”