Terus ngagai penerang

Saksi-Saksi Jehovah

Pilih bansa jaku Iban

Patut Aku Badu Sekula?

Patut Aku Badu Sekula?

Tu sekeda utai ke patut diperundingka nuan

Ni naka takat seiku-seiku orang ulih badu sekula nitihka atur ba endur nuan?

Kati nuan udah datai ba takat nya? Enti nuan enda bedulika jaku lalau Bup Kudus ti madah “Nunduk ngagai perintah ti megai menua” lalu nuan badu sebedau takat nya, tu nunjukka nuan badu tumu.—Rome 13:1.

Kati nuan udah ngulihka juluk ati ba pelajar nuan? Nama juluk ati ti dikedekaka nuan ba pelajar nuan? Enda nemu? Nuan patut nemu! Enti enda, nuan sempama penumpang kerita api ti enda nemu kini ke penunga diri. Berandau meh enggau apai indai nuan begian ba baruh tu ke betajuk “ Juluk Ati Aku ba Pelajar.” Enti nuan badu sekula sebedau datai ba pemutus ke digaga nuan enggau apai indai nuan pasal sekula, tu nunjukka nuan badu tumu.

Ngetu ari sekula nya baka nuan ke terejun ari kerita api sebedau nuan datai ba endur ke dituju

Nama kebuah nuan bisi asai ka badu? Engka laban nuan ka nyukung kita sebilik ba belanja tauka enggau pengawa voluntir. Bisi mega kebuah iya engka nuan deka nyeliahka diri ari peresa tauka ngereja pengawa sekula lalu tu kebuah ti berundingka diri empu. Nuan engka tusah deka nemu, sekalika juluk ati nuan nya manah tauka enda. Enti nuan badu sekula ketegal deka rari ari penanggul, nuan tusah deka mansang.

Badu sekula tumu nya baka nuan ke terejun ari kerita api sebedau nuan datai ba jalai ke dituju nuan. Kerita api nya engka enda bangat nyamai ditepan, sereta orang ke sama enggau nuan nepan nya engka enda manah enggau begulai, tang enti nuan terejun ari kerita api, nuan tentu enda datai ba jalai ke dituju nuan lalu ulih ngemediska diri empu. Baka nya mega, enti nuan ngetu sekula, nuan deka tusah bulih kereja. Gaji ke diulih nuan mega engka mit agi ari ke patut dibanding enggau enti nuan ulih nembuka sekula.

 Ari ke ngetu, sabar meh napi penanggul nuan ba sekula. Enggau chara nya, nuan deka betan nyediaka diri napi utai ti sama maya nuan udah berengkah bekereja ila.

Juluk Ati Aku ba Pelajar

Pemandai ke diulih nuan ba sekula nya ulih nulung nuan ngiga pengawa ti nyukung nuan nyediaka belanja ba diri sebilik sereta nuan empu. (2 Tesalonika 3:10, 12) Kati nuan udah nentuka ni bagi kereja kedeka nuan sereta baka ni nuan ngatur awak diri empu ngambika ulih nyediaka diri? Ngambika ulih nulung nuan milih jalai ti betul, saut tanya ba baruh:

  • Nama pengelandik aku? (Chunto, baka ni chara nuan begulai enggau orang bukai? Kati nuan rindu ngereja pengawa ke mayuh agi ngena jari tauka ngaduka siti-siti utai? Kati nuan ulih beratika siti-siti penanggul sereta mutarka nya?)

  • Nama pengawa ti ulih ngasuh aku ngena pengering?

  • Nama kereja ke bisi ba endur aku diau?

  • Nama kursus ti ulih diambi aku ngambika ulih nyediaka diri ba kereja?

  • Nama pelajar ke diambi aku ngambika ulih nulung aku bulih juluk ati diri enggau manah agi?

Kingatka, juluk ati nuan ulih diulih ari pelajar ke dipelajarka nuan. Nya kebuah anang nyadi pelajar ti tusah deka napi sekeda utai—iya ke “nepan kerita api” tang belalai ari semua tanggungjawap.