Terus ngagai penerang

Saksi-Saksi Jehovah

Pilih bansa jaku Iban

TURKMENISTAN

Dijil Ketegal Pengarap Sida

Dijil Ketegal Pengarap Sida

Ari taun 2017 ngagai pun taun 2019, menua Turkmenistan ngukum jil 13 iku nembiak lelaki Saksi-Saksi Jehovah ke enggai enggau pengawa soldadu ketegal nitihka pengarap sida. * Sida dipechara ba baruh Artikel 219(1) ari Undang-Undang Jenayah ketegal ‘nadai kebuah ari undang-undang ke ngasuh diri enda ulih enggau pengawa nyadi soldadu.’ Kot menua nya nulak semua apil ke dianjung ketegal pechara nya. Dua iku Saksi Jehovah ari 13 iku ke ditangkap nya udah dilepaska pengudah dijil sepengelama satu taun. 11 iku ke bukai agi ba rumah jil Seydi (LB-E/12).

Ba taun 2018, bisi kira 40 iku nembiak lelaki Saksi-Saksi Jehovah ke dikangau sama enggau pengawa nyadi soldadu. Lalu tu engka deka ngujungka mayuh agi Saksi-Saksi Jehovah diukum jil ba taun 2019 ketegal enggai enggau pengawa nyadi soldadu ketegal nitihka pengarap.

Bahram Hemdemov Dilepaska

Kena 13 Februari 2019, Bahram Hemdemov, ke beumur 55 taun sereta ngembuan empat iku anak, dilepaska ari jil Seydi pengudah tembu diukum jil. Iya ditangkap kena 14 Mac 2015 lebuh polis ba Turkmenabad enggau ngenyit ngabas siti pengawa sembah ba rumah iya empu. Pengawa nya endang enda ngachau orang bukai. Kot Menua Lebap ngukum jil Hemdemov sepengelama empat taun. Lalu, pengerai iya majak enda manah ketegal utai jai ke nyadi ba rumah jil Seydi. Lebuh Hemdemov dijil, iya majak dikelaungka ari bulih pengampun ke diatur presiden beberapa kali dalam setaun. Kena 15 Ogos 2016, Hemdemov nganjung kes iya ngagai Komiti Hak Mensia ari PBB (CCPR), lalu kes nya agi benung ditasat.

Basa ngagai Hak Bibas Pengarap, Pengasai Ati Sereta Utai ti Dipechaya Agi Benung Diputarka

Ba taun 2015 enggau 2016, CCPR ngeluarka 10 iti pemutus ti nyukung bala Saksi Jehovah ke lelaki ti udah diukum jil enggau chara ti enda lurus laban enggai nyadi soldadu ketegal pengarap. Naka ke diatu, sida Saksi Jehovah tu ngembuan 7 iti agi kes ngelaban Turkmenistan ke empai diberi pemutus ba CCPR.

Nitihka siti riput kena April 2012, CCPR ngasuh perintah ba Turkmenistan “nentuka undang-undang enggau pengawa ke bekaul enggau ngerejister gerempung pengarap bebasaka hak seiku-seiku orang ke bibas ngereja pengawa pengarap sida baka ke udah disediaka ba baruh International Covenant on Civil and Political Rights.” Saksi-Saksi Jehovah nguji ngerejister gerempung sida ba taun 2008, tang piak perintah enggai ngerejister sida.

Bisi Peluang Ngemanahka Agi?

Saksi-Saksi Jehovah beterima kasih laban perintah ba Turkmenistan kala ngelepaska orang ke diukum jil ketegal deka mutarka ukum-ukum ti enda lurus. * Taja pia, ketegal bisi pemutus baru tu ke enda lurus, menua Turkmenistan sekali agi enggai mending ngagai utai ke diasuh kot entarabansa ke ngasuh perintah bebasaka hak sida ke enggai nyadi soldadu ketegal pengarap. Saksi-Saksi Jehovah nganti pemutus ti manah ari perintah ngagai pemutus ke diberi CCPR. Pemutus nya nyengkaum bebasaka semua hak mensia, kelebih agi hak bibas bejalaika pengarap, pengasai ati, sereta utai ti dipechaya

Tusun Timpuh

  1. 14 Mac 2019

    11 iku Saksi-Saksi Jehovah benung dijil.

  2. 13 Februari 2019

    Bahram Hemdemov dilepaska ari jil sepengudah empat taun diukum ketegal ngereja pengawa nitihka pengarap iya.

  3. 29 Januari 2019

    Kerven Kakabayev dilepaska ari jil sepengudah setaun diukum ketegal enggai nyadi soldadu laban nitihka pengarap.

  4. 7 Januari 2019

    Azamatjan Narkuliyev diukum jil sepengelama setaun ketegal enggai enggau pengawa nyadi soldadu laban nitihka pengarap.

  5. 19 Disember 2018

    Eziz Atabayev diukum jil sepengelama dua taun ketegal enggai enggau pengawa nyadi soldadu laban nitihka pengarap.

  6. December 17, 2018

    Arslan Begenjov dilepaska ari jil sepengudah setaun diukum ketegal enggai nyadi soldadu laban nitihka pengarap.

  7. 28 November 2018

    Gurbangylych Muhammetgulyyev diukum jil sepengelama setaun laban enggai nyadi soldadu ketegal pengarap.

  8. September 2018

    Ketegal Presiden bisi ngatur pengawa “ngampun” kena 24 September, pegawai ba jil madahka ngagai Kerven Kakabayev, Mekan Annayev, enggau Veniamin Genjiyev, sida deka diberi “ampun” lalu dilepaska. Taja pan nama sida bisi ba lis orang ke diampun ke dipandangka ngagai orang mayuh, sida tu enda dilepaska seretai enggau 1,722 iku ke bukai kena 25 September.

  9. 28 Ogos 2018

    Serdar Atayev diukum jil sepengelama satu taun laban enggai nyadi soldadu ketegal pengarap.

  10. 27 Ogos 2018

    Sokhbet Agamyradov diukum jil sepengelama satu taun laban enggai nyadi soldadu ketegal pengarap.

  11. 13 Ogos 2018

    Ruslan Artykmuradov diukum jil sepengelama satu taun laban enggai nyadi soldadu ketegal pengarap.

  12. 9 Ogos 2018

    Isa Sayayev diukum jil sepengelama satu taun laban enggai nyadi soldadu ketegal pengarap.

  13. 17 Julai 2018

    Veniamin Genjiyev enggau Maksat Jumadurdiyev diukum jil sepengelama satu taun laban enggai nyadi soldadu ketegal pengarap.

  14. 11 Julai 2018

    Ihlosbek Rozmetov diukum jil sepengelama satu taun laban enggai nyadi soldadu ketegal pengarap.

  15. 26 Jun 2018

    Mekan Annayev diukum jil sepengelama dua taun laban enggai nyadi soldadu ketegal pengarap.

  16. 29 Januari 2018

    Kerven Kakabayev diukum jil sepengelama satu taun laban enggai nyadi soldadu ketegal pengarap.

  17. 17 Januari 2018

    Arslan Begenjov diukum jil sepengelama satu taun laban enggai nyadi soldadu ketegal pengarap.

  18. 12 Mei 2017

    Piak ti bekuasa menua Turkmenistan ngelepaska Mansur Masharipov, ke ditan berengkah ari maya iya ditangkap kena 30 Jun 2016.

  19. 18 Ogos 2016

    Mansur Masharipov diukum jil sepengelama satu taun ketegal bukti ti pelesu ke digaga kena nuduh iya.

  20. Julai 2016

    CCPR ngeluarka enam iti pemutus ti manah ke nyukung pemutus Saksi-Saksi Jehovah ke udah diukum jil laban enggai nyadi soldadu ketegal pengarap.

  21. 14 Disember 2015

    CCPR ngeluarka pemutus ti manah bekaul enggau tiga iku Saksi Jehovah ke diukum jil laban enggai nyadi soldadu ketegal pengarap. Siti agi pemutus ti manah nya dikeluarka kena 19 Mei 2015.

  22. 19 Mei 2015

    Bahram Hemdemov diukum jil sepengelama empat taun ketegal ngereja pengawa ke bekaul enggau pengarap. Iya ditangkap lalu ditan dua bulan sebedau iya diukum.

  23. Februari/Mac 2015

    Dua iku Saksi Jehovah ke dijil laban enggai nyadi soldadu ketegal pengarap, dilepaska. CCPR ngeluarka pemutus ti manah ke bekaul enggau seiku Saksi ke benung dipechara laban iya enggai nyadi soldadu ketegal pengarap.

  24. 18 November 2014

    2 iku Saksi Jehovah dijil laban enggai nyadi soldadu ketegal pengarap.

  25. 22 Oktober 2014

    Presiden menua Turkmenistan meri ampun ngagai lapan iku Saksi Jehovah lalu ngelepaska sida.

  26. 30 September 2014

    Semilan iku Saksi Jehovah diukum jil. Tujuh iku ari sida nya diukum jil laban enggai nyadi soldadu ketegal pengarap. Dua iku ke bukai nya diukum jil ketegal dipechara enggau bukti ti pelesu ke digaga ngagai pengawa pengarap sida.

  27. 2 September 2014

    Piak ti bekuasa menua Turkmenistan ngelepaska Bibi Rahmanova lalu ngubah ukum jil iya ari empat taun ngagai ukum siti ke bepanggai ba syarat.

  28. 18 Ogos 2014

    Bibi Rahmanova diukum jil sepengelama empat taun ketegal bukti ti pelesu ke digaga kena becharaka iya.

  29. 25 Julai 2014

    Tujuh iku Saksi Jehovah benung dijil. Lima iku ari sida nya diukum jil laban enggai nyadi soldadu ketegal pengarap. Dua iku ke bukai nya diukum jil ketegal dipechara enggau bukti ti pelesu ke digaga ngagai pengawa pengarap sida.

  30. 6 April 2014

    Bisi 26 iku Saksi Jehovah ditan lalu 13 iku ari sida ditangkap tang nadai bukti ke nunjukka jenayah ke udah digaga sida. 13 iku Saksi nya diukum mayar denda.

  31. November 2013

    Semilan iku Saksi Jehovah agi benung dijil. Lapan iku ari sida nya diukum jil laban enggai nyadi soldadu ketegal pengarap. Siku ke bukai nya diukum jil ketegal dipechara enggau bukti ti pelesu ke digaga ngagai pengawa pengarap iya.

  32. 29 Ogos 2013

    Tiga iku Saksi Jehovah nganjung kes ngagai CCPR ngelaban Turkmenistan laban menua nya enda bebasaka hak sida ke enggai nyadi soldadu ketegal pengarap.

  33. 1 Mei 2013

    Dua iku Saksi Jehovah nganjung kes ngagai CCPR ngelaban Turkmenistan laban menua nya enda bebasaka hak sida ke enggai nyadi soldadu ketegal pengarap.

  34. 24 Januari 2013

    30 iku pegawai polis enggau ngenyit datai ke rumah Navruz Nasyrlayev beberapa minggu pengudah CCPR berandau enggau perintah ba Turkmenistan. Piak polis terus malu sida sebilik enggau orang ke bisi datai ba rumah nya.

  35. 7 September 2012

    10 iku Saksi Jehovah nganjung kes ngagai CCPR ngelaban menua Turkmenistan laban menya nya enda bebasaka hak sida ke enggai nyadi soldadu ketegal pengarap. Navruz Nasyrlayev ke nguluka kes nya.

  36. 21 Ogos 2008

    Saksi-Saksi Jehovah nguji ngerejister gerempung sida ba menua Turkmenistan.

^ per. 2 Seiku ari nembiak lelaki tu udah dilepaska ba bulan Disember 2018 pengudah tembu ukum jil iya.

^ per. 10 Peda artikel “Turkmenistan Releases Jehovah’s Witnesses Imprisoned for Their Faith” enggau “Mother Released From Prison in Turkmenistan” dalam jaku English.