Terus ngagai penerang

Saksi-Saksi Jehovah

Pilih bansa jaku Iban

AZERBAIJAN

Dijil Ketegal Pengarap Sida

Dijil Ketegal Pengarap Sida

Azerbaijan majak ngukum Saksi-Saksi Jehovah ke bejalaika pengarap sida. Kot ngumbai sida ngereja penyalah ketegal begempuru nyembah petara sida, nusui utai ke dipechaya sida ngagai orang, sereta enggai nyadi soldadu. Kesuah nya, bala hakim ngasuh sida mayar denda ti besai sereta dijil.

Dua Iku Indu Dijil Ketegal Bekunsi Utai ke Dipechaya Sida

Kena 17 Disember 2015, dua iku Saksi-Saksi Jehovah iya nya, Irina Zakharchenko enggau Valida Jabrayilova, berengkah dipechara ba Kot Nengeri Pirallahi di Baku. Zakharchenko enggau Jabrayilova ditan kenyau ari 17 Februari 2015, tang enda dipechara. Seduai iya dikumbai besalah ketegal nadai “minta pemendar” lebuh nyadung litaricha ke bekaul enggau pengarap.

Seduai iya ditan sepengelama sepuluh bulan sebedau dipechara. Lalu tu balat ngachau pengerai tubuh enggau emosi seduai iya. Taja pia, lebuh keterubah iya seduai iya dipechara ba kot, hakim nulak semua peminta ke digaga luyar ti ngarika seduai iya lalu enda ngemendarka seduai iya ditan ba rumah diri empu. Kes seduai dipechara baru kena 7 Januari 2016.

Azerbaijan Enda Nitihka Atur

Kena Mei 2011, riput European Commission against Racism and Intolerance (ECRI) ari Kunsil Eropah suah ngansak perintah Azerbaijan ngambika “undang-undang dipejalaika . . . kena masa hak bibas milih pengarap baka ke ditetapka Kunsil Eropah ke ngemataka Hak Mensia.” Ba taun 2012, Venice Commission ari Kunsil Eropah ngeluarka penerang ti silik kena ngubah Undang-Undang Azerbaijan Pasal Hak Bibas Milih Pengarap. Iya madahka: “Undang–undang nya ngembuan sekeda atur ti terit ke ngelanggar standard entarabansa. . . . Atur tu nyengkaum utai baka pemesai kuasa undang-undang nya; orang ke tau nerima hak bibas nentuka jalai pengarap enggau pengasai ati; ngerejister, baka atur kediri empu tauka nyual reta ke diempu raban pengarap nya; hak kena nulak pengawa nyadi soldadu ketegal pengasai ati; isu ke bekaul enggau pengawa bekunsika penemu pengarap enggau orang bukai; ngeluarka tauka nyadung litaricha pasal pengarap. Semua atur tu patut diaduka baru.”

Azerbaijan mega enggai bebasaka pemutus sida ke enggai nyadi soldadu ketegal pengasai ati. Lebuh minta nyereta Kunsil Eropah ba taun 1996, Azerbaijan besemaya deka (1) nitihka atur pasal meri pengawa sivil ti bukai pengudah dua taun nyereta kunsil nya, (2) ngelepaska semua sida ke dijil ti enggai nyadi soldadu ketegal pengasai ati, enggau (3) ngemendarka sida ke enggai nyadi soldadu milih pengawa sivil ti bukai. Lebih ari 13 taun pengudah nyadi raban Kunsil Eropah, Azerbaijan agi bedau sereta enda nitihka atur nya.

Riput ari ECRI nya mega madahka: “ECRI ngansak perintah Azerbaijan enggau lengkas ngaga atur bekaul enggau pengawa sivil ti bukai ke sejalai enggau standard Eropah. . . . [ECRI] sekali agi enggau bebendar nangkan perintah Azerbaijan ngambika enda nawa tauka ngejil sida ke enggai nyadi soldadu. Tang meri sida peluang ngereja pengawa sivil ti bukai ke sejalai enggau pengasai ati sida.

Kati Azerbaijan Deka Nunjukka Iya Ngemendarka Pengawa Bibas Bejalaika Pengarap?

Kena 25 Jun 2015, U.S. Helsinki Commission mantaika pengirau bekaul enggau “pengawa ke majak nekan pengarap ke bisi mimit raban—kelebih agi Saksi-Saksi Jehovah—ba Azerbaijan.” Chairman U.S. Helsinki Commission, Chris Smith madahka, “Perintah suah ngumbai diri ngelindung hak bibas bejalaika pengarap. Tang kebendar iya, sida udah ngejil mayuh orang ketegal bejalaika pengarap sida. Aku minta perintah Azerbaijan ngelepaska Zacharchenko seduai Jabrayilova enggau lengkas.”

Saksi-Saksi Jehovah di serata dunya mantaika pengirau sida ngagai utai ke nyadi ba Irina Zakharchenko enggau Valida Jabrayilova. Komiti Hak Mensia PBB minta Zakharchenko ditan ba rumah, tang kot enggai nitihka peminta nya. Zakharchenko enggau Jabrayilova sereta sida sebilik enggau bala bakih minta perintah Azerbaijan ngelepaska seduai iya lalu muai semua dawa enggau lengkas.

Tusun Timpuh

  1. 17 Disember 2015

    Kot Nengeri Pirallahi ba Baku nulak peminta kena ngelepaska Irina Zakharchenko enggau Valida Jabrayilova ari jil. Kes seduai iya dipechara baru kena 7 Januari 2016.

  2. 4 September 2015

    Kot Nengeri Sabail ba Baku ngemanjaika timpuh Irina Zakharchenko enggau Valida Jabrayilova dijil sebedau dipechara nyentuk ngagai 17 Disember 2015, lalu seduai iya dijil sepengelama sepuluh bulan.

  3. 7 Mei 2015, enggau 4 Julai 2015

    Kot Nengeri Sabail ba Baku ngemanjaika timpuh Irina Zakharchenko enggau Valida Jabrayilova dijil sebedau dipechara.

  4. 17 Februari 2015

    Kot Nengeri Sabail ba Baku ngasuh Irina Zakharchenko enggau Valida Jabrayilova dijil enggau lengkas sepengelama tiga bulan lalu enda ibuh dipechara, ketegal enda minta pemendar lebuh nyadung litaricha ke bekaul enggau pengarap.

  5. 12 Mac 2013

    Kamran Mirzayev, seiku ari Saksi-Saksi Jehovah, ke dikumbai besalah lalu diukum jil sepengelama semilan bulan laban enggai nyadi soldadu. Udah nya, lebuh iya diukum jil, iya nerima siti atur ampun lalu iya dilepaska tumu.

  6. 25 September 2012

    Fakhraddin Mirzayev, seiku ari Saksi-Saksi Jehovah, ke dikumbai besalah lalu diukum jil sepengelama setaun laban enggai nyadi soldadu.

  7. 8 September 2010

    Farid Mammadov, seiku ari Saksi-Saksi Jehovah, ke dikumbai besalah lalu diukum jil sepengelama semilan bulan laban enggai nyadi soldadu.

  8. 19 Ogos 2009

    Mushfig Mammedov ditangkap baru laban enggai nyadi soldadu. Iya ditan sebedau dipechara, lalu diasuh mayar denda lebuh didawa kali kedua.

  9. 7 Mac 2008

    Bala luyar ke ngarika Mushfig Mammedov enggau Samir Huseynov nganjung apil ngagai Kot Hak Mensia Eropah ketegal perintah Azerbaijan nawa seduai iya ngereja penyalah laban enggai nyadi soldadu.

  10. 4 Oktober 2007

    Samir Huseynov, seiku ari Saksi-Saksi Jehovah, dikumbai besalah lalu diukum jil sepengelama sepuluh bulan laban enggai nyadi soldadu.

  11. 2006

    Mushfig Mammedov, seiku ari Saksi-Saksi Jehovah, ditan sebedau dipechara, didawa laban enggai nyadi soldadu, lalu iya diberi awak sepengelama enam bulan. Dalam timpuh nya, enti iya ngereja penyalah, nya baru iya tau dijil.