Terus ngagai penerang

Saksi-Saksi Jehovah

Pilih bansa jaku Iban

Peta ti nunjukka ba senentang Kivu Utara enggau Ituri, iya nya endur ke pemadu mayuh orang kena rampit penyakit Ebola. Seiku anak mit indu benung masu jari iya ba endur orang nuchi jari di Beni maya gempuru besai dipejalaika.

2 Mei 2019
REPUBLIK DEMOKRATIK CONGO

Penyakit Ebola udah Ngelekai ngagai Republik Demokratik Congo

Penyakit Ebola udah Ngelekai ngagai Republik Demokratik Congo

Kelimpah ari penanggul ba politik, Republik Demokratik Congo mega diserang penyakit Ebola kenyau ari bulan Ogos 2018. Nitihka riput, lebih ari 1,088 kes penyakit Ebola nyadi ba Kivu Utara enggau ba Ituri. Penyakit tu udah nabanka 665 iku nyawa. Pia mega, kitai berasai tusah amat ati laban bisi ari bala menyadi Kristian kitai nyadi mansa penyakit tu. Pampang opis ba Congo (Kinshasa) madahka riput pasal Saksi-Saksi Jehovah ke nyadi mansa penyakit tu, lalu ngujungka sida lesi, ba entara sepuluh iku orang ke besai tuai sereta dua iku anak mit. Bisi seiku menyadi lelaki ke bukai mega kena rampit, tang iya diatu udah ulih gerai baru.

Pengudah bulih pemendar ari Komiti Ngatur, pampang opis ba Congo (Kinshasa) ngaga siti video sereta cheramah ti spesial pasal chara nyaga diri ari penyakit nya. Video nya mandangka chara ti amat beguna, baka chara masang perengka ke endur nuchi jari. Semua eklisia ba endur nya udah masang endur nuchi jari baka ke diasuh dalam video nya. Asil iya, penyakit nya kurang agi ngelekai ngagai mayuh endur. Dua iti opis pengerai ba endur nya, nulis surat ngagai pampang opis, lalu beterima kasih ngagai kerejasama ke diberi Saksi-Saksi Jehovah sepemanjai penyakit Ebola nya nyadi.—Matthew 5:16.

Ba mayuh kawasan bandar, bala menyadi kitai enda diasuh pansut ari rumah pengelama beminggu. Ngambika penyakit nya ulih ditagang ari ngelekai, pampang opis nunda gempuru besai ba 12 iti endur. Taja pia, pampang opis tetap ngatur ngambika pengawa gempuru besai nya dirikut lalu ulih dimainka ba beberapa iti Palan Gempuru, ngambika bala menyadi kitai tetap bulih utai ke diguna sida ba pengarap.

Aram semua kitai sama besampika bala menyadi ba Republik Demokratik Congo. Awakka pengadang ke dipadah dalam Bup Kudus pasal jemah ila ti nadai agi penyakit, ulih ngeringka semua kitai.—Isaiah 33:24.