Terus ngagai penerang

Saksi-Saksi Jehovah

Pilih bansa jaku Iban

Menyadi Abraham Lincoln, seiku ari Komiti Pampang Opis ba Micronesia, ngeluarka Bup Kudus Salin Dunya Baru Jaku Gerika dalam bansa jaku Marshallese

24 MEI 2019
MICRONESIA

Ngeluarka Bup Kudus Kristian Jaku Gerika dalam Bansa Jaku Marshallese

Ngeluarka Bup Kudus Kristian Jaku Gerika dalam Bansa Jaku Marshallese

Kena 19 Mei 2019, Saksi-Saksi Jehovah ngeluarka Bup Kudus Salin Dunya Baru Jaku Gerika dalam bansa jaku Marshallese. Pengawa ti spesial tu dipejalaika ba The University of the South Pacific di Majuro, Pulau Marshall. Pengawa tu mega dipandangka terus ngagai Palan Gempuru ba Pulau Ebeye, penyauh 440 kilometer ari Majuro.

Bisi 339 iku orang datai ba pengawa ti spesial tu, nyengkaum 151 iku Saksi-Saksi Jehovah ke gawa ba eklisia di Pulau Marshall. Bup Kudus tu tentu amat beguna dikena bala menyadi ba gempuru, belajarka Bup Kudus kediri empu, sereta ba pengawa nginjil sida. Bup Kudus tu mega amat beguna ngagai 325 iku Saksi Jehovah ke gawa ba endur Amerika Serikat ke ngena bansa jaku Marshallese. Ba dia, dijangka bisi 61,000 iku orang ngena bansa jaku Marshallese.

Seiku menyadi lelaki ke enggau ba projek nyalin tu madah, “Bup Kudus Salin Dunya Baru Jaku Gerika tu, salin ti keterubah dalam bansa jaku Marshallese ke ngena jaku ti senang dimereti, lalu nepuka baru nama Petara Jehovah baka Bup Kudus ti asal. Tu meh salin ti ulih dikeandalka bala menyadi, ke ulih nulung sida majak rinduka Jehovah.”

Kitai mega sama gaga ati meda salin Bup Kudus ke baru, dalam bansa jaku Marshallese udah dikeluarka. Jehovah endang merekat pengawa nyalin Bup Kudus ngagai mayuh bansa jaku ba serata dunya.—Masmur 49:1, 2.