Terus ngagai penerang

Saksi-Saksi Jehovah

Pilih bansa jaku Iban

Gambar menua Beira Mozambik ke udah kena penusah Ribut Taufan Idai

27 MAC 2019
BERITA BA SERATA DUNYA

Ribut Taufan Idai Mangka Begian Tenggara Afrika

Ribut Taufan Idai Mangka Begian Tenggara Afrika

Kena Hari Empat, 14 Mac 2019, Ribut Taufan Idai mangkaka menua Mozambik. Udah nya, ribut tu terus mangkaka menua Malawi enggau Zimbabwe. Tu siti ari ribut ti pemadu balat ke kala nyadi ba Hemisfera Selatan. Ketegal ribut tu, mayuh jalai enggau bengunan balat rusak. Tu mega ngujungka lebih ari 2.6 juta iku orang kena penusah tu. Nitihka riput ke diatu, penusah tu bisi nabanka lebih ari 200 iku nyawa. Kitai mega tusah ati, laban ba Mozambik bisi dua iku menyadi indu kitai, sereta dua iku anak mit ke bedau dibaptisa udah bebadi ba penusah tu. Pia mega, ba Zimbabwe, seiku menyadi lelaki ke beumur 14 taun udah bebadi ketegal rumah iya ditabanka tanah tusur.

Palan Gempuru Inhamízua ba Mozambik ke balat rusak ketegal Ribut Taufan Idai

Pampang opis ba Mozambik bisi mansutka riput ti madahka, sekeda ari rumah menyadi kitai enggau Palan Gempuru bisi rusak. Ba Zimbabwe, pampang opis madahka bisi 15 iti rumah menyadi kitai enggau dua iti Palan Gempuru mega rusak ketegal penusah tu. Ba Malawi, pampang opis madahka bisi 764 iti rumah menyadi kitai rusak abis, lalu 201 iti rumah menyadi enggau 2 iti Palan Gempuru bisi rusak. Penyampau 6 iti Komiti Tulung Pengerusak Alam iya nya, 2 iti ari Mozambik lalu 4 iti ari Malawi, udah ditumbuhka kena mantu ba penusah tu.

Dan kayu ti besai dikena ngenanka atap rumah dua iku menyadi Kristian ba Malawi ketegal dinding rumah seduai iya udah rusak.

Kitai berasai sinu ngenang pemerinsa bala menyadi Kristian ke kena penusah tu. Aram meh kitai besampi ngambika semua bala menyadi ke kena penusah tu, terus bepanggai ba Jehovah ngambika meri sida ati ti lantang.—Rome 15:13.