Terus ngagai penerang

Saksi-Saksi Jehovah

Pilih bansa jaku Iban

Ulih dipeda bisi pemansang ba kelas belajarka Bup Kudus di rumah jil ba Barranquilla.

26 APRIL 2019
COLOMBIA

Saksi-Saksi Jehovah ba Colombia Nerima Setipikit Terima Kasih Ketegal Ngajar Bup Kudus ngagai Orang ke Dijil

Saksi-Saksi Jehovah ba Colombia Nerima Setipikit Terima Kasih Ketegal Ngajar Bup Kudus ngagai Orang ke Dijil

Setipikit ke diberi Lembaga Pendidikan Paulo Freire kena ngayanka terima kasih ngagai pengawa Saksi-Saksi Jehovah ke ngajar Bup Kudus ba rumah jil di nengeri Valledupar.

Saksi-Saksi Jehovah ba Colombia udah ngajar Bup Kudus enggau pechuma ngagai orang ke dijil pengelama 20 taun. Kena 30 November 2018, Lembaga Pendidikan Paulo Freire, meri setipikit terima kasih ngagai Saksi-Saksi Jehovah laban udah ngajar orang ke dijil Bup Kudus ba nengeri Valledupar. Ke diatu, bisi 50 iku orang ke dijil ba rumah jil nya nitihka kelas belajarka Bup Kudus.

Ba serata Colombia, Saksi-Saksi Jehovah udah ngatur kelas belajarka Bup Kudus ba 65 iti rumah jil, lalu bisi 782 iku pemelajar Bup Kudus. Berengkah ari taun 1996 nyentukka diatu, bisi 60 iku orang ke dijil ngaga pemansang dataika sida dibaptisa.

Néver Antonio Cavadía enggau bini iya, Lety Cavadía. Menyadi Néver belajarka Bup Kudus maya iya agi dijil. Diatu, iya seiku ari tuai gempuru

Néver Antonio Cavadía seiku ari orang ke belajarka Bup Kudus ba rumah jil, nyentukka iya dibaptisa kena taun 1998. Kena taun 2007, iya pansut ari rumah jil ba Valledupar. Iya bulih mayuh penguntung ari belajarka Bup Kudus. Iya madah, “Sepemanjai aku ba rumah jil, aku ulih ngaga pemutus enggau manah laban aku belajarka Bup Kudus. Aku mega deka ngaga ubah ti besai ba pengidup aku, lalu enggai ngalahka diri.”

Saksi-Saksi Jehovah ba serata dunya berasai gaga nulung orang ke dijil. Tu sejalai enggau peneka Petara iya nya, “ke dekaka semua mensia diselamatka, lalu nemu penemu pasal pemendar.”—1 Timoti 2:4.