Terus ngagai penerang

Dua belas iku menyadi lelaki ke nulak pengawa soldadu kena 2012, begulai enggau luyar sida (gambar tengah) kena Januari 2019

9 DISEMBER 2019
ARMENIA

Nitihka Pemutus ari ECHR, Armenia Besalah Ketegal Ngejil 22 Iku Menyadi Lelaki ke Enggai Nyadi Soldadu

Nitihka Pemutus ari ECHR, Armenia Besalah Ketegal Ngejil 22 Iku Menyadi Lelaki ke Enggai Nyadi Soldadu

Kena 5 Disember 2019, Kot Eropah ke Bekaul enggau Hak Mensia mutuska kes Saksi-Saksi Jehovah menang. Semua hakim ba kot nya ngumbai Armenia besalah, laban sida ngejil 22 iku Saksi Jehovah ke enggai nyadi soldadu. Perintah Armenia mega dipinta mayar ganti rugi kira-kira lebih ari 242,000 euro. Ari semua pemutus ECHR ke bekaul enggau menyadi kitai, bedau kala bisi ganti rugi sebesai tu.

Kena taun 2012, bala menyadi tu dituduh besalah ketegal enggai nyadi soldadu tauka pengawa ke dikumbai semina latih ke rayat ba menua tang ukai soldadu (ACS). Sida tetap nulak pengawa tu, taja pan nya semina latih aja, laban sida agi ngasaika nya bisi kaul enggau pengawa soldadu. Nya kebuah, 20 iku ari sida dijil. Sida dilepaska kena taun 2013, maya pemerintah Armenia nyediaka latih ti nadai kaul enggau pengawa soldadu. Kenyau ari nya, bala menyadi lelaki kitai enda dijil agi.

Kena taun 2017, ari bantu ECHR, Saksi Jehovah menang ba kes Adyan and Others v. Armenia. Bepelasarka kes nya meh ECHR ngaga pemutus kena 5 Disember tu tadi. Ku ECHR, pemerintah Armenia udah nemu kes tu sama enggau kes ke sebedau tu. Nya alai, sida patut udah nemu chara mutarka kes tu enggau manah. Taja pan bala menyadi kitai udah bebendar deka mutarka kes tu enggau manah pengelama setaun ti udah, tang pemerintah Armenia tetap deka ngejil sida. Ketegal nya meh ECHR nulung bala menyadi lelaki kitai.

Kenyau ari 2013, pemerintah Armenia endang udah ngaku, orang ke enggai nyadi soldadu enda ibuh diukum. Kitai amat gaga ati laban bala menyadi kitai ke lelaki, agi mengkang tetap ati taja pan sida dijil, sereta dikumbai penjenayah. Dalam timpuh tujuh taun tu, latih ke disediaka pemerintah Armenia nyadi teladan ke menua bukai. Tang pemutus ari ECHR kena 5 Disember tu tadi, madahka pemerintah Armenia udah ngelanggar ukum entara bansa ti udah digaga kena taun 2012.

Ari pemutus tu, kitai nemu ECHR enda kakang ati ngukum sereta minta ganti rugi ti tinggi, ngagai menua ke ngelanggar ukum entara bansa pasal hak mensia. Kitai amat beterima kasih ngagai Jehovah, laban Iya udah ngasuh kes bala menyadi kitai ba Armenia menang. Arapka pemutus tu muka jalai ngagai bala menyadi kitai ba menua bukai, ke engggai nyadi soldadu. Pia mega, arapka bisi latih tang nadai bekaul enggau soldadu bisi disediaka ba menua Azerbaijan, Korea Selatan, Turki, enggau Turkmenistan.