Twende kovidio oini

Twende komurya

Ovahongonone vaJehova

Toorora eraka Otjiherero

Horera kotjari tjaJehova

Horera kotjari tjaJehova

“Muhona, Muhona, ongu ri Ndjambi ngu ri omunaunyaṋutima nomunatjari.”​—EKS. 34:6.

OMAIMBURIRO: 142, 12

1. Jehova we ritjiukisa vi ku Moses, nu ongwaye tje ri otjiṋa otjinanḓengu?

OTJIKANDO tjimwe, Mukuru we ritjiukisa ku Moses mokumuraera ena Re novikaṋena vye tjiva. Jehova atja tjiukisa omasa poo ounongo we, posi yokutja ovikaṋena ovitenga mbya tamuna vya ri ounyaṋutima notjari tje. (Lesa Eksodus 34:5-7.) Moses aa vanga okutjiwa kutja Jehova tjiri me mu vatere. Kunao, Jehova wa tamuna ovikaṋena mbi mavi raisa kutja eye tjiri u vanga okuvatera ovakarere ve. (Eks. 33:13) Katjiṋa otjiyanḓiparise nao okutjiwa kutja Jehova tjiri u rikendera ku eṱe? Orupa ndwi maru yandja ombango kotjikaṋena hi, otjari. Okukara notjari ku heya okuṱondjenda nomauzeu wa varwe nokuvanga okuvevatera.

2, 3. (a) Otjikeṋa tji tji raisa kutja okukara notjari otjiṋa tji twa utwa na tjo? (b) Ongwaye imbi Ombeibela mbi i honga ohunga notjari tji mavi sokukunana ombango?

2 Ovandu va ungurwa kosaneno yaMukuru. Kunao, mena rokutja Jehova omunatjari, oupupu kovandu nangarire mbe ha tjiwa Jehova okuraisa otjari nokurikendera ku varwe. (Gen. 1:27) MOmbeibela mu novihorera ovingi vyovandu mba raisa otjari. Okutara kotjihorera, indu Salomo tjaa sokukonḓonona kutja omukazendu  uṋe ngu ri ina yokanatje ku ka ri nomuinyo, eye we ve rora mokuningira kutja okanatje inga ku ke nomuinyo ke kondwe pokati. Omukazendu ngwi ngwa ri ina omuinimuini wokanatje ngo, wa ṱotjari nokanatje ke, nu e riheke kutja ombara i ṱokukeyandja komukazendu ingwi owarwe. (1 Ozomb. 3:23-27) Otjihorera tjarwe, otjomuatje waFarao omukazona. Indu omuatje waFarao tja muna Moses, eye wa muna kutja oko okanatje kOvaheberi, nu aa ke sokuṱa. Posi yokutja wa “ṱondjenda na ko,” nu e ripura kutja me ke kurisa kutja ke rire okanatje ke.—Eks. 2:5, 6.

3 Ongwaye epu ohunga notjari tji mari sokukunana ombango? Mena rokutja Ombeibela i ku tunduuza kutja u horore ku Jehova. (Ef. 5:1) Nandarire kutja twa memwa otjovandu mbe sokuraisa otjari, mena rokutja kaweṱe ohomonena, potuingi tu ripurira ku eṱe oveni uriri. Povikando tjiva ku rira ouzeu okutya kutja matu sokuvatera ovandu varwe, poo matu sokuyandja ombango ku eṱe oveni uriri. Otjikeṋa tji matji ku vatere okukurisa onḓero yoye mu varwe nokutjita kutja i karerere? Rutenga ngatu konḓonone kutja Jehova novandu varwe, va raisa vi otjari. Okuzambo tu tare kutja matu yenene vi okuhorera kotjari tjaMukuru, nokutja ongwaye tje ri otjiṋa otjiwa okutjita nao.

JEHOVA ONGU RI OTJIHORERA OTJISEMBASEMBA TJOTJARI

4. (a) Ongwaye Jehova tja hinda ovaengeli koSodom? (b) Matu rihongere ko tjike kehungi ohunga neṱunḓu raLot?

4 Ombeibela i novihorera ovingi mbi raisa otjari tjaJehova. Okutara kotjihorera, ripurira ku imbi mbya tjita ku Lot. Lot wa ri omurumendu omusemba ngwa “munine ouzeu” mena rourunde wovandu vaSodom na Gomora. Ovandu mbo kava ri nondengero ku Mukuru, nu Eye wa tya kutja owo ve sokuṱa. (2 Petr. 2:7, 8) Mukuru wa hinda ovaengeli okukaraera Lot kutja, Sodom na Gomora mavi yandekwa nokutja owo mave sokupita mu vyo. Ombeibela i tja: “Nungwari Lot wa ivaiva. Muhona arire tja ṱotjari na ye; novarumendu mba arire tji ve ve kambura pomaoko, eye nomukazendu we novasuko ve, notji ve ve pitisa motjihuro, nave ve esa.” (Gen. 19:16) Tjimuna Jehova tjaa tjiwa nawa ouzeu Lot ma ri, eṱe matu yenene okukara nongamburiro kutja eye wina u tjiwa omauzeu ngu tu muna.—Jes. 63:7-9; Jak. 5:11; 2 Petr. 2:9.

5. Embo raMukuru ri tu honga vi okuraisa otjari?

5 Jehova karaisire otjari uriri, nungwari wina wa honga ovakarere ve okuraisa otjari. Ripura ohunga netwako rimwe nda yandjerwe kOvaisrael. Indu omundu tjaa ri nondjo yotjimariva, omundu ka yazema ko otjimariva aa yenene okukambura ombanda yomundu ngo, otjomakwizikiro wokutja omundu ngo ma kotora ovimariva mbya yazema. (Lesa Eksodus 22:26, 27.) Omundu ngu hina otjari mape ya aha vanga okuyarura ombanda ndjo, posi yokutja Jehova wa honga ovakarere ve okuraisa otjari. Omurari ku kwa zikamena etwako ndi mau tu hongo tjike? Mau tu hongo kutja atu roro okuyandja etambo kovihepwa vyovakambure ovakwetu. Tjinangara matu yenene okuvatera omukambure omukwetu ngu ri mouzeu, matu sokutjita nao.—Kol. 3:12; Jak. 2:15, 16; lesa 1 Johanes 3:17.

6. Matu rihongere ko tjike kotjari Jehova tja raisa kOvaisrael, nangarire kutja aa ve tjiti ouvi?

6 Jehova wa raisa otjari kotjiwaṋa tje Israel, nangarire indu tji va katuka komurungu we. Ombeibela i tja: “Muhona, Ndjambi wooihe mukururume, wa kara pokuhinda ovatumwa kutja ve ve ronge, orondu Eye iya vanga okuyama otjiwaṋa tje mOndjuwo ye ondjapuke.” (2 Ekuruh. 36:15) Momuano otjingewo, eṱe matu sokukara notjari na imba mbe ha tjiwa Jehova, posi yokutja mbu mape ya  ave ritanaura nave rire omapanga we. Jehova kavanga kutja omundu ngamwa auhe ma yandekwe mombanguriro ndji mai ya. (2 Petr. 3:9) Okutja ngunda Mukuru e hiya yandeka ovarunde, matu sokukondja okuraera ovandu ohunga nombuze ye yorusuvero.

7, 8. Ongwaye eṱunḓu rimwe tjaa ri munu kutja Jehova we ve raisira otjari?

7 Kundino, ovakarere vaJehova ovengi ve muna otjari tje. Okutara kotjihorera, mozombura nḓa 1990 moBosnia, omihoko tjiva aa vi rwisasana nokuzepasana. Meṱunḓu rimwe ngo mwa ri omuatje omuzandu wozombura 12 wena Milan. Milan, nomuangu we, novanene ve, nOvahongonone vaJehova varwe va ri mombesi okuza koBosnia okuyenda koSerbia. Owo aa ve i komaworonganeno omanene, ovanene vaMilan kaa ve sokukapapitisiwa. Pomukoka omukonde wehi, ovasorondate va muna kutja eṱunḓu raMilan oromuhoko warwe, nave ve herura mombesi. Okuzambo ave yandjere ovakambure imbo varwe mba ri mombesi okukayenda komurungu nouyenda wawo. Ovasorondate va ṱizira eṱunḓu ndi mbo oure womayuva yevari. Tjimanga omusorondate ngwaa hongorere otjiungura mbo wa tonena omusorondate warwe ngwa ri notjihako tjokombanda ongoze, ne mu pura kutja ovandu mba nge ve tjite vi. Eṱunḓu ndi ra kuramene mbo nu aa ri yenene okuzuva indu omusorondate ingwi owarwe tja zira kutja, “Ve pitisa uriri nu u ve yahe!”

8 Ovasorondate ngunda amave hungire, pe ya ovandu vevari nave i keṱunḓu ndi. Owo ve ve hokorisa kutja owo wina Ovahongonone vaJehova, nokutja va zuu movakambure mba ri mombesi ohunga noviṋa mbya tjitwa ku wo. Ovahongonone vevari mba va raera ku Milan nomuangu we kutja ngave karonde mohauto, orondu ovasorondate kave nokutara ozombapira zovanatje. Okuzambo ovakambure mba va raera ovanene vaMilan kutja ngave yende munda imbwi owarwe womberoo, nu ve kahakaenene ngo. Milan wa urumine tjinene nga tjee hari ama tjiwa kutja nga yore poo nga rire. Ovanene vaMilan va pura kutja, “Mape ya tjiri ave tu yandjere okuyenda uriri?” Posi yokutja otja tjaa ve kayenda, aa pe munika tjimuna ovasorondate kavena pu ve ve muna. Milan nomuangu we va kahakaena ku novanene vawo munda mbwina womukoka omukonde wehi, nu va ya komaworonganeno omanene. Owo va ri nongamburiro yomasa kutja Jehova wa zira ozongumbiro zawo! Tu tjiwa nawa okuza mOmbeibela kutja kaaruhe Jehova tje yama ovakarere momuano otja imbo. (Oviung. 7:58-60) Posi yokutja ohunga nongaro ndji, Milan wa tja: “Ku ami aa pe munika tjimuna ovaengeli va pata omeho wovasorondate nu Jehova e tu yama.”—Eps. 97:10.

9. Jesus wa raisa ongaro iṋe kotjimbumba tjovandu mbaave mu kongorere? (Tara kotjiperendero pomautiro worupa ndwi.)

9 Jesus wa raisa otjihorera otjiwa tjotjari. Eye wa ṱondjenda novandu mena rokutja va ‘kurungisirwe nu va ningisire ondjenda tjimuna ozonḓu nḓe hi nomurise.’ Neye hapo wa tjita vi? ‘Eye wa uta okuvehonga oviṋa ovingi.’ (Mat. 9:36; lesa Markus 6:34.) Nungwari Ovafarisei kava ri notjari, nu kaave vanga okuvatera ovandu. (Mat. 12:9-14; 23:4; Joh. 7:49) Ove hapo u nonḓero onene yokuvatera ovandu nokuvehonga ohunga na Jehova tjimuna Jesus?

10, 11. Hapo matu hepa okuraisa otjari mozongaro azehe? Kahurura.

10 Ihi katji nokuheya kutja matu sokuraisa otjari mozongaro azehe. Okutara kotjihorera, Ombara Saul mape ya aa nangarasi ma raisa otjari indu tje ha zepere Agag, ombara yOvaamalek, ngwa ri omunavita wovakarere vaMukuru. Saul wina kena pa zepa ovinamuinyo  avihe vyOvaamalek. Posi yokutja Jehova wa raera Saul kutja nga zepe Ovaamalek avehe novinamuinyo vyawo avihe. Mena rokutja Saul ka raisire onḓuviro, Jehova ke mu yandjerere kutja ma rire ombara rukwao. (1 Sam. 15:3, 9, 15) Jehova Omupangure omusemba. Eye u yenena okutjiwa mbi ri momutima womundu, nu u tjiwa kutja oruṋe omundu tje ha sokuraisirwa otjari. (Omiimbo 2:17; Esek. 5:11) Moruyaveze ropopezu Jehova ma pangura avehe mbe ha puratene ku ye. (2 Tes. 1:6-10) Moruveze ndo Jehova ke nokuraisa otjari kovarunde. Posi yokutja, eye tji ma yandeke ovarunde ma raisa otjari ku imba ovasemba eye mbu ma yama.

11 Kunao, katjiungura tjetu okupangura kutja ovandu veṋe mbu mave sokuhupa poo okuyandekwa. Nungwari, matu sokukondja pu matu yenene nai okuvatera ovandu. Omomiano viṋe mu matu yenene okuraisa otjari ku varwe? Ngatu tare komiano tjiva.

MATU YENENE VI OKURAISA OTJARI?

12. Mo yenene vi okuraisa otjari momuano mbu u tjinda varwe?

12 Rira omundu ngu vatera ovandu aruhe. Jehova u undjira ko kutja Ovakriste ve raise otjari ku varwe na kovakambure ovakwao. (Joh. 13:34, 35; 1 Petr. 3:8) Embo ndi otjari wina ri heya “okumuna ouzeu pamwe.” Omundu ngu raisa otjari u kondja okuvatera imba mbe nouzeu. Okutja matu sokupaha omiano vyokuvatera varwe, ngahino mokuveningira kutja tu ve vatere noviungura ponganda, poo okuvevatera okukaranda oviṋa mbi mave hepa.—Mat. 7:12.

Raisa otjari mokuvatera varwe (Tara koparagrafa 12)

13. Ovakarere vaMukuru ve tjita vi tji kwa tjitwa oumba?

13 Kara norupa moviungura vyokuyandja ombatero tji kwa tjitwa oumba. Tji matu munu ovandu amave munu ouzeu mena roumba mbwa tjitwa, matu sokukara nonḓero yokuvevatera. Ovakarere vaJehova ve tjiukwa otjovandu mbe vatera varwe tji kwa tjitwa oumba. (1 Petr. 2:17) Okutara kotjihorera, omukazendu omukambure Omujapan wa turire moruveze ndwa nyonenwe i omanyinganyingiro wehi, nomanyinganyingiro wehi mokuvare (tsunami) nga tjitwa mombura ndji 2011. Eye wa tja, tjiri wa “yanḓiparisiwa nokuhuhumiṋwa” indu tja muna ovakambure ovakwao mbe ya koJapan okuza  komahi pekepeke okuyekuṱuna ozondjuwo nOmatuwo wOmerikotameneno. Nu komurungu wa tja: “Ovitjitwa mbi vye ndji honga kutja Jehova tjiri u rikendera ku eṱe. Nu Ovahongonone vaJehova ve rikendera kovakambure ovakwao. Nokutja ovakambure ovakwetu mouye auhe wina ve tu kumbira.”

14. Mo yenene vi okuvatera ovavere novakurundu?

14 Vatera ovavere novakurundu. Indu tji matu munu ovandu mbe kondja nouvere poo noukurundu, tu ṱotjari na wo. Tu zera kutja omauzeu otja ingo ye yande, opu tu zokukumba kutja Ouhona waMukuru u ye. Nungwari ngunda oruveze ndwo aru hiye ya, katu nomuano warwe pendje nokukondja pu matu yenene okuvatera ovavere novakurundu. Omutjange umwe wa tjanga kutja, eyuva rimwe ina ngwa ri omukurundu nu ngwa ri nomutjise omupandjarise wourizemburuka nozondunge (Alzheimer), we riṱunda mozombanda. Nu ngunda ama kondjo okurikohorora, pa kongora omundu pomuvero. Ya ri ovakazendu vevari Ovahongonone vaJehova mbaa ve mu varura aruhe. Owo ve mu ningira kutja ve mu vatere. Nu eye wa tja: “Otjiṱise tjohoṋi, posiya ii ndji vatereye.” Ovakazendu ovakambure mba ve mu vatera. Owo wina ve mu tjitira otee okuzambo ave haama puna ye okuserekarera. Omuatje omuzandu womukazendu ngwi wa ri nondangi tjinene, nu wa tja, Ovahongonone vaJehova ovandu “mbe tjita otja pu ve honga.” Hapo otjari tjoye kovavere novakurundu tji ku hinga okutjita atjihe tji mo yenene kutja u ve vatere?—Fil. 2:3, 4.

15. Otjiungura tjetu tjokuzuvarisa tji vatera vi varwe?

15 Vatera ovandu okutjiwa Jehova. Omuano omusemba mu matu yenene okuvatera ovandu, omokuvehonga ohunga na Mukuru nOuhona we. Omuano warwe, omokuvevatera okumuna kutja ongwaye okukara nonḓuviro komirari vyaJehova tje ri otjiṋa otjiwa ku wo. (Jes. 48:17, 18) Otjiungura tjokuzuvarisa omuano omuwa wokuyozika Jehova nokuraisa otjari ku varwe. Nu hapo mo yenene okuungura ovingi motjiungura tjokuzuvarisa?—1 Tim. 2:3, 4.

OKUKARA NOTJARI OMBATERO KOVE WINA!

16. Tji matu raisa otjari tu muna mo ouwa waye?

16 Ozonongo mouveruke wourizemburuka ze tja, okuraisa otjari ku yenena okukupa ouveruke ouwa, nu ku tjita kutja u kare noupanga ouwa kuna varwe. Tji mo vatere imba mbe muna ouzeu, u kara nondjoroka onyingi, u harera ko omaundjiro, ko rimunu ourike tjinene, nu ko kara nomeripura omavi tjinene. Okuraisa otjari tjiri ku eta ouwa kove omuini. (Ef. 4:31, 32) Orusuvero tji maru tu hingi okuvatera varwe, tu kara nomeritjiviro omawa womomutima, orondu tu tjiwa kutja matu tjiti Jehova mbye vanga kutja tu tjite. Otjari matji tu vatere kutja tu rire ovanene ovasemba, omapanga omasemba morukupo, nomapanga omasemba ku varwe. Nu wina ovandu mbe raisa otjari aruhe ku varwe, potuingi ve hakahana okuvaterwa tji mave hepa ombatero.—Lesa Mateus 5:7; Lukas 6:38.

17. Ongwaye tji mo sokuraisa otjari?

17 Nandarire kutja okuraisa ouwa ku eta ouwa ku eṱe oveni, epu enenenene ndi matu sokuraisira otjari, omena rokutja tu vanga okuhorera ku Jehova nokuyandja ohiviro ku ye. Eye Eemundu omutenga ngwa raisa orusuvero notjari. (Omiano 14:31) Eye we tupa otjihorera otjisembasemba. Kunao, ngatu kondje pu matu yenene okuhorera ku Mukuru mokuraisa otjari. Tji twa tjiti nao, matu tumbuka popezu novakambure ovakwetu natu kara noupanga ouwa kuna ovandu varwe.—Gal. 6:10; 1 Joh. 4:16.