Twende kovidio oini

Twende komurya

Ovahongonone vaJehova

Toorora eraka Otjiherero

Raisa ‘orusuvero rwouatjiri, movitjitwa’

Raisa ‘orusuvero rwouatjiri, movitjitwa’

“Orusuvero rwetu aru rire omambo nokuhungira porwakwo; ngaru rire orusuvero rwouatjiri, nu ngaru riraise oruini movitjitwa.”—1 JOH. 3:18.

OMAIMBURIRO: 3, 50

1. Orusuvero orunenenene orondwi ndu ri vi, nu ongwaye tji pe ri nao? (Tara kotjiperendero pomautiro.)

ORUSUVERO ndwa zikamena komirari omisemba (a·gaʹpe), otjiyandjewa tji tji za ku Jehova. (1 Joh. 4:7) Orusuvero otja indwi oorusuvero orunenenene. Orwo tjinene ru munika indu tji u ripurira ku varwe nokutjita ouwa ku wo. Otja komakonḓononeno yemwe nga tjitwa, orusuvero ndwi a·gaʹpe “ru yenena okumunikwa movitjitwa.” Tji matu raisa orusuvero poo varwe tji mave tu raisire orusuvero, tu kara nondjoroka mehupo retu nu tu kara nomuhunga.

2, 3. Jehova wa raisa vi orusuvero orunene kovandu?

2 Jehova wa raisa orusuvero kovandu nangarire ngunda e hiya mema Adam na Eva. Eye wa ungura ehi kutja ri rire omaturiro wovandu omakarerere, nu ri rire oruveze rwondjoroka ku wo. Otjiṋa tji tje mu hinga okutjita nao, kamena rokutja eye u muna mo ouwa, nungwari omena rokutja u vanga okutuvatera. Eye wa raisa orusuvero kovanatje ve kombanda yehi, mokuvepa omaundjiro wokuhupa nga aruhe mOparadisa ndje ve rongerisira.

3 Adam na Eva tji va za nokupirukira Jehova, eye we ve raisira orusuvero orunene. Eye wa tya okukutura ovanatje vawo, orondu wa ri nongamburiro kutja tjiva mape ya ave toorere ko omikambo  korusuvero rwe ndwi. (Gen. 3:15; 1 Joh. 4:10) Nu okuza koruveze indu Jehova tja kwizika Omuyame ngu me ya, Eye aa vara ombunguhiro ndji otjotjiṋa tji tja tjitwa rukuru. Okuzambo, ozombura ape 4 000 kombunda yanao, Jehova wa tjita ombunguhiro onene mokuyandja Omuna we omukwatwaerike kutja ma ṱire ovandu. (Joh. 3:16) Tjiri tu nondangi tjinene korusuvero orunene ndwi, Jehova ndwe tu raisira!

4. Otjikeṋa tji matji raisa kutja ovandu ovahahomonena mave yenene okuraisa orusuvero ku varwe?

4 Eṱe wina tu yenena okuraisa orusuvero otja indo, mena rokutja twa ungurwa kosaneno ya Mukuru. Ouvi mbu twa rumata kovanene vetu u tjita kutja ku rire ouzeu okuraisa orusuvero ndwi, posi yokutja matu yenene. Abel wa raisa orusuvero ku Mukuru, mokutjita ombunguhiro yoviṋa ovisembasemba eye mbya ri na vyo. (Gen. 4:3, 4) Noa wa raisa orusuvero orunene ku varwe, mokutjivisa ombuze ya Mukuru ku wo oure wozombura ozengi, nangarire kutja kaave puratene. (2 Petr. 2:5) Indu Mukuru tja ningira Abraham okupunguha omuzandu we Isak, Abraham wa raisa orusuvero orunene ku Mukuru na tjiti otja pe mu rakiza. (Jak. 2:21) Okutja matu sokuhorera kovarumendu ovaṱakame mba, natu raisa orusuvero nandarire kutja tuna omauzeu.

ORUSUVERO RWOUATJIRI NA INDWI RWOVIZEZE

5. Omomiano viṋe mu matu yenene okuraisa orusuvero rwouatjiri?

5 Ombeibela i kahurura kutja orusuvero rwouatjiri, karu ‘rire omambo nokuhungira porwakwo; nungwari ru rira orusuvero rwouatjiri, nu ndu riraisa oruini movitjitwa.’ (1 Joh. 3:18) Nu hapo ihi matji hee kutja onavi okuraera varwe kutja twe ve suvera? Kako katjiperi! (1 Tes. 4:18) Matji hee kutja, katu sokuhungira uriri kutja mbe ku suvera. Nungwari tji tu ri mozongaro nḓu maze hepa kutja tu vatere, matu sokuvatera. Okutara kotjihorera, indu omukambure omukwetu tji ma hepa ozombanda poo ovikurya, okumuzerira ouwa uriri kaku nakuvatera. (Jak. 2:15, 16) Momuano otjingewo, tji twa suvera Jehova novandu, kamaatu kumbu uriri kutja Jehova “a tume ovaungure ve kawonge omakondero we,” nungwari eṱe oveni matu kara norupa orunene motjiungura tjokuzuvarisa.—Mat. 9:38.

6, 7. (a) ‘Orusuvero ndu hinotjavivi’ orondwi ndu ri vi? (b) Yandja ovihorera tjiva vyorusuvero ndu notjavivi poo rwovizeze.

6 Omuapostele Johanes wa tjanga kutja orusuvero maru sokurira ‘rwouatjiri, nu ndu riraisa oruini movitjitwa.’ Kunao, orusuvero rwetu maru sokukara “nokuhinotjavivi” poo maru sokurira “orusemba.” (Rom. 12:9; 2 Kor. 6:6) Ihi matji hee kutja kamaatu yenene okutjita aayo tu norusuvero rwouatjiri, ngunda atu hina ro oparukaze, tjimuna omundu tje hwikika otjimaskera okurihoreka. Mape ya atu ripura kutja, ‘Hapo orusuvero ndu notjavivi okuru ri?’ Kamaape ya. Orondu orwo karusuvero oparukaze.

7 Ngatu tare kovihorera tjiva vyorusuvero ndu notjavivi poo rwovizeze. Motjikunino tja Eden, Satan wa tjita tjimuna aa vanga okuvatera Eva, posi yokutja ovitjitwa vye vya raisa ovineya nokutja aa vanga ouwa ku ye omuini uriri. (Gen. 3:4, 5) Momayuva wa David, Ahitofel wa pangasana ku nombara nondando yokuvanga okumutjita ovineya uriri. Eye wa tjita ombara ovineya indu tja muna kutja ma yenene okumuna mo ouwa. (2 Sam. 15:31) Kundino wina, ovandu mba isa okurikotamena ku Jehova na varwe mbe kondja okueta ohaṋi mombongo, ve ungurisa “omambo omawa” okupopa varwe nokurimunikisa aayo ve ve suvera, ngunda ondando yawo tjiri ai ri okuvanga okueta ouwa ku wo oveni uriri.—Rom. 16:17, 18.

8. Epuriro riṋe ndi matu sokuripura oveni?

8 Orusuvero ndu hi nouatjiri karusuvero oruwa oparukaze, orondu orwo karusuvero Mukuru  ndwe vanga kutja tu raise. Mape ya atu wovisa ovandu mokuveraisira orusuvero ndu hi nouatjiri, posi yokutja kamaatu yenene okuwovisa Jehova. Jesus wina wa tja imba mbe raisa orusuvero ndwi ‘mave imbirahiwa.’ (Mat. 24:51) Otjiperi kutja ovakarere va Jehova kamaave vanga okuraisa orusuvero rwotjavivi. Posi yokutja ripura omuini kutja, ‘Hapo mbi raisa orusuvero rwouatjiri, poo ngahino ru hingwa i omunenetima novineya?’ Ngatu konḓonone omiano 9 mu matu yenene okuraisa orusuvero rwouatjiri “nokuhinotjavivi.”

OKURAISA ‘ORUSUVERO RWOUATJIRI, MOVITJITWA’

9. Orusuvero rwouatjiri maru tu hingi okutjita vi?

9 Kara nohange okuvatera varwe, nandarire kutja ko nakumunika. Tu sokukara nonḓero yokuraisa orusuvero kovakambure ovakwetu “mohamunika.” (Lesa Mateus 6:1-4.) Ananias na Safira kave tjitire nao. Mena rokutja aave vanga okumunika ku varwe, owo va tjita aayo va yandja ovimariva ovingi, pu pe heri nao. Nowo tjiri va muna omberero onene mena rotjavivi tji va raisa. (Oviung. 5:1-10) Posi yokutja, tji twa suvera ovakambure ovakwetu tjiri, matu tjaterwa okuvevatera nokuhina okuvanga kutja varwe ve tjiwe. Okutara kotjihorera, ovarumendu ovakambure mbe vatera Orutu Orunane okurongerisa ovikurya vyombepo, ve tjita nao mohamunika. Kave kondjo okuraisa kutja owo ombe vatera okurongerisa ovikurya mbyo, nu kave kondjo okuviraisa ku varwe.

10. Matu yenene vi okutenga po okuraisa ondjozikiro ku varwe?

10 Aruhe tenga po okuyozika ovakweṋu. (Lesa Ovaroma 12:10.) Jesus we tu raisira otjihorera otjiwa tjokuyozika varwe, mokuungura oviungura mbyaavi varwa nonḓengu yokehi. (Joh. 13:3-5, 12-15) Kutja tu yenene okuyozika ovakwetu momuano mbwi, matu hepa okukondja nomasa kutja tu rire overisusuparise. Nangarire ovaapostele kaave yenene okuzuva nawa kutja ongwaye Jesus tja tjita nao, ngandu tji va pewa ombepo ondjapuke. (Joh. 13:7) Matu yenene okuyozika varwe, indu tji tu hina okurivara otjovandu ovasemba tjinene pu wo, ngahino mena rokutja twa muna omahongero wokombanda, tu novimariva ovingi, poo twa pewa omerizirira motjiungura tja Jehova. (Rom. 12:3) Nu katu sokuṱeruru varwe tji mave tangwa, nangarire kutja matu munu kutja eṱe wina matu hepa ondjozikiro otjingeyo, poo mena rokutja twa ri norupa motjiungura ho. Nungwari tu sokuyoroka puna wo.

11. Ongwaye tji matu sokukara nouatjiri tji matu tanga varwe?

11 Tanga ovakambure ovakweṋu okuza komutima. Matu sokuungurisa oruveze aruhe ndu twa munu okutangasana, orondu omambo otja ingo “omawa nomatunge.” (Ef. 4:29) Posi yokutja matu sokukara nouatjiri. Nu katu sokutanga omundu ouposyo mena rokuvanga okuritjatisa ku ye, poo okutira okumupa omaronga ngu ma hepa. (Omiano 29:5) Okutanga omundu okuzambo okemuhungira kongotwe, ku raisa otjavivi poo ovizeze. Omuapostele Paulus wa nakaura ongaro ndjo, nu e tupe otjihorera otjiwa tjokuraisa orusuvero rwouatjiri ku varwe mokuvetanga. Otjotjihorera, eye wa tanga Ovakriste moKorinte kongaro ndji va raisa. (1 Kor. 11:2) Posi yokutja indu tji va raisa ongaro mu ve hina okuhepa okutangwa, eye we ve kahururira nawa kutja ongwaye tje hina okuvetanga.—1 Kor. 11:20-22.

Tji matu vatere ovakambure ovakwetu mbe nouhepe tu raisa kutja twe ve suvera (Tara koparagrafa 12)

12. Matu yenene vi okuraisa orusuvero rwouatjiri tji matu sekirisa varwe?

12 Rira omundu ngu sekirisa varwe. Jehova u tu rakiza kutja ngatu rire ozondjandje kovakambure ovakwetu. (Lesa 1 Johanes 3:17.) Posi yokutja matu sokuvitjita nondando ombwa, nu aha rire mena rokuvanga okumuna mo ouwa. Ripura omuini kutja, ‘Hapo mbi sekirisa omapanga wandje uriri? Mbi sekirisa  imba ovatumbe uriri, poo mbu mave yenene okundjivatera? Poo mbi paha omiano vyokuraisa otjari kovakambure ovakwetu nangarire kutja hina ku ve tjiwa nawa, poo kave notjiṋa okundjipa?’ (Luk. 14:12-14) Indu omukambure omukweṋu tje nouzeu mena rokuhina okurirongerisa nawa, poo tje ha posire ondangi kouwa mbu we mu raisire, mo tjiti vi? Mozongaro otja inḓo matu sokuṱakamisa eronga ndi: “Sekirisasaneye nokuhinomaunaunino.” (1 Petr. 4:9) Tji wa ṱakamisa eronga ndi, mo munu enyando ndi za mokuyandja nondando osemba.—Oviung. 20:35.

13. (a) Oruṋe tje rira ouzeu okuvatera imba ovingundi? (b) Omomiano viṋe mu matu yenene okuvatera imba ovingundi?

13 Vatera imba ovingundi. Erakiza rOmbeibela ndi tja ngatu ‘vatere ovingundi nu ngatu kare nomuretima novandu avehe,’ ri tu vatera okurikonḓonona kutja tu norusuvero rwouatjiri poo indee. (1 Tes. 5:14) Nangarire kutja ovengi mbe ri ovingundi nai, ve kakara nomasa mongamburiro kombunda, varwe ve hepa kutja tu kayende komurungu okuvevatera nomuretima. Ihi tji kamburira mo okuhaṋasana omapu omananḓengu okuza mOmbeibela kuna wo, okuveningira kutja tu ungure pamwe motjiungura tjokuzuvarisa, poo okutwapo oruveze rwokupuratena ku wo. Nu wina, moruveze rokuripura kutja omukambure omukwetu u “nomasa” poo “otjingundi” mongamburiro, matu sokuyakura kutja atuhe tu nomasa moviṋa tjiva, nu oweṱe ovingundi mu vyarwe. Nangarire omuapostele Paulus wa yakura oungundipare we omuini. (2 Kor. 12:9, 10) Kunao, atuhe matu yenene okumuna ombatero kovakambure ovakwetu.

14. Matu sokukondja tjinene pu pe ṱa pi, okuṱiza ohange kuna ovakambure ovakwetu?

14 Paha ohange. Matu sokukondja nomasa okuṱiza ohange kuna ovakambure ovakwetu, nangarire kutja matu munu kutja katu zuvasanene, poo twa tumbwa navi. (Lesa Ovaroma 12:17, 18.) Okuningira ondjesiro ku yenena okuisapo ombepo ombi, posi yokutja i sokuza komutima. Okutara kotjihorera, moruveze rokutja, “Hina ku tjiwa kutja ongwaye tji mo fula nao, posiya ndji isira,” mo yenene okuyakura kutja ove wina u nondjo, nu otja, “Arikana ndji isira kutja mbe ku hihamisa.” Ohange otjiṋa otjinanḓengu tjinene morukupo. Ovakupasane kave sokuraisa kutja va suverasana tji ve ri mokati kovandu uriri, okuzambo ave hihamisasana mokuhina okuhungira kumwe, nokuhungirasana omambo omahazendu, poo nokutonasana tji ve ri ku wo oveni.

15. Matu yenene vi okuraisa kutja tjiri twa isire ovakwetu mbe tu hihamisa?

15 Isirasaneye. Omundu ngu isira, ke ripurire kouvi womundu ngwe mu hihamisa, nu ka ṱiza ongore. Indu tji matu ‘zarasana norusuvero, nokukondja okuṱakamisa oruwano ndu tu pewa i Ombepo ya Ndjambi ndji tu waneka kumwe,’ matu yenene okuisira imba mbe tu hihamisa ave hina okutjiwa. (Ef. 4:2, 3) Tji matu vanga okuisirasana tjiri, matu sokutjevera omeripura wetu  kutja atu ha “zemburuka ouvi.” (1 Kor. 13:4, 5) Tji twa ṱiza ongore, matu zunḓa oupanga wetu kuna Jehova na wina ku novakambure ovakwetu. (Mat. 6:14, 15) Matu yenene okukumbira omundu ngwe tu hihamisa, okuraisa kutja tjiri twe mu isire.—Luk. 6:27, 28.

16. Omerizirira ngu tu pewa motjiungura tja Jehova tu sokuyevara vi?

16 Paha ombwiro ya varwe. Tji twa pewa omerizirira motjiungura tja Jehova, matu sokuyevara otjoruveze oruwa rokuraisira varwe kutja twe ve suvera tjiri, mokuhina ‘okuripahera ombwiro yetu porwayo, nungwari auhe nga pahe ombwiro yomukwao.’ (1 Kor. 10:24) Okutara kotjihorera, ovatjevere pomaworonganeno omanene ve vaza poruveze romaworonganeno ngunda ovandu varwe ave hiye ya. Moruveze rokuvara otjiungura tjawo hi otjotjiṋa tjokuripahera ovihaamwa ovisembasemba ku wo nomaṱunḓu wawo, ovarumendu ovakambure mba ve kahaama potuveze tu va toororerwa nandarire kutja katuveze tu mave vanga. Tji mave paha ombwiro ya varwe momuano mbwi, owo ve raisa kutja ve norusuvero rwouatjiri. Ove mo yenene vi okuhorera ku wo?

17. Omundu ngu norusuvero rwouatjiri ma sokutjita vi tja tjiti ourunde ounene?

17 Rihepura omauvi woye ngu wa tjita mohamunika, nu u poke ku wo. Ovakambure tjiva mba tjita ourunde ounene, ve kondja okuuhoreka mena rohoṋi poo okutira okuhihamisa varwe. (Omiano 28:13) Posi yokutja ongaro otja indjo kai raisa orusuvero, orondu i hihamisa ingwi ngwa katuka na varwe wina. Wina i ramba ombepo ya Mukuru, nu i isamo ohange mombongo. (Ef. 4:30) Ovakriste mbe norusuvero rwouatjiri tji va tjiti ourunde ounene, ve kahungira ku novanene vombongo kutja ve mune ombatero ndji mave hepa.—Jak. 5:14, 15.

18. Orusuvero rwouatjiri orunanḓengu pu pe ṱa pi?

18 Orusuvero ootjikaṋena otjinenenene mu avihe. (1 Kor. 13:13) Otjo tji tjiukisa ku varwe kutja oweṱe ovahongewa va Jesus, nokutja tu horera ku Jehova ku ku za orusuvero. (Ef. 5:1, 2) Paulus wa tja: Tji mbi “hi norusuvero, indino ami hitjiṋa.” (1 Kor. 13:2) Nga rire onḓero yetu okuraisa orusuvero. Nu aru rire “omambo nokuhungira porwakwo” nungwari ngaru rire orusuvero “rwouatjiri, nu ngaru riraise oruini movitjitwa.”