Twende kovidio oini

Twende komurya

Ovahongonone vaJehova

Toorora eraka Otjiherero

 ORUPA RWOMAKONḒONONENO 47

Omapu ngu matu rihongo okuza kembo ra Levitikus

Omapu ngu matu rihongo okuza kembo ra Levitikus

“Omatjangwa aehe ya tjangwa nombatero yOmbepo ya Ndjambi, nowo otji ye nonḓengu onene.”—2 TIM. 3:16.

EIMBURIRO 98 Omatjangwa ya tjangwa nombatero yombepo yaMukuru

OMAPU KU MATU KATARA *

1-2. Ongwaye Ovakriste ndino tji ve sokukara nonḓero membo ra Levitikus?

OMUAPOSTELE Paulus wa zemburukisa epanga re Timoteus kutja “omatjangwa aehe ya tjangwa nombatero yOmbepo ya Ndjambi, nowo otji ye nonḓengu onene.” (2 Tim. 3:16) Nu iho tji kamburira mo embo ra Levitikus. Hapo ove u noumune uṋe ohunga nembo rOmbeibela ndo? Ovandu tjiva ve muna kutja oro embo ndi nomatwako omengi nu ngu tu ha ungurisa ndino, posi yokutja Ovakriste vatjiri kave munu nao.

2 Embo ra Levitikus ra tjangwa ozombura ape 3 500 nḓa kapita, posi yokutja Jehova ngamba u ungurisa embo ndo “okutuhonga.” (Rom. 15:4) Mena rokutja embo ra Levitikus ri tu vatera okutjiwa omeripura wa Jehova, eṱe matu sokurikonḓonona. Tjiri, pe novingi mbi matu yenene okurihonga okuza kembo ndo. Ngatu tare komapu yane.

OMUANO MU MATU YENENE OKUYAKURWA I JEHOVA

3. Ongwaye tjaa mu tjitwa ombunguhiro mEyuva enene rOhanganisiro?

3 Epu etenga: Omerikotameneno wetu maye sokutjata ku Jehova kutja me tu yakure. MEyuva enene rOhanganisiro ndjaa i tjitwa ombura aihe, otjiwaṋa tjOvaisrael aa tji ya pamwe nu omupristeri otjiuru ee ve tjitire ombunguhiro yotjinamuinyo. Ozombunguhiro nḓo aa ze zemburukisa Ovaisrael kutja mave hepa okukohororwa komauvi  wawo. Posi yokutja omupristeri otjiuru rutenga aa sokuungura otjiṋa tjarwe otjinanḓengu ngunda e hiya twara ombinḓu yotjinamuinyo mOtjouyapukeyapuke.

(Lesa oparagrafa 4) *

4. Otja ku Levitikus 16:12, 13, omupristeri otjiuru aa tjiti tjike otjikando otjitenga tja hiti mOtjouyapukeyapuke mEyuva enene rOhanganisiro? (Tara kotjiperendero tjokombanda yokambo nga.)

4 Lesa Levitikus 16:12, 13. Ripura uriri ohunga na imbi mbyaavi tjitwa mEyuva enene rOhanganisiro. Omupristeri otjiuru aa hiti mondanda yomaturiro. Nu eye aa hiti mOtjouyapukeyapuke povikando vitatu. Otjikando otjitenga aa tjindi otjitjuma tjomoro omuwa meke rimwe, nu mu indi orarwe aa tjindi otjikangero tji tjeura nomakara womuriro. Ngunda e hiya hita mOtjouyapukeyapuke eye aa kurama kaṱiṱi komurungu wonguyu. Eye aa hiti mOtjouyapukeyapuke nondengero, nu aa ka kurama komurungu wotjipwikiro tjomerikutirowapamwe. Omuano mbo au sasaneke kutja eye wa kurama komurungu wa Jehova Mukuru. Nu okuzambo omupristeri aa tirire ovyomoro omuwa kombanda yomakara womuriro okuṋukisa etuwo nawa. * Nu okuzambo aa hiti rukwao mOtjouyapukeyapuke okukapunguha ombinḓu yotjinamuinyo komakohororero wouvi. Eye aa twimisa ovyomoro omuwa ngunda e hiya tjita ombunguhiro yomakohororero wouvi.

5. Hapo matu rihongo tjike komatwimisiro womoro omuwa mEyuva enene rOhanganisiro?

5 Hapo matu rihongo tjike komatwimisiro womoro omuwa mEyuva enene rOhanganisiro? Ombeibela i raisa kutja ozongumbiro zovakarere va Jehova ovaṱakame ze ri tjimuna ovyomoro omuwa. (Eps. 141:2; Omavan. 5:8) Zemburuka kutja omupristeri otjiuru aa eta ovyomoro omuwa komurungu wa Jehova nondengero. Momuano otjingewo, indu tji matu kumbu ku Jehova tu tjita nao nondengero. Eṱe tjiri tu nondangi kutja Omuute wevaverwa u tu yandjera okutumbuka ku ye mongumbiro, otja omuatje ku ihe. (Jak. 4:8) Eye u tu yakura otjomapanga we. (Eps. 25:14) Eṱe tu nondangi tjinene kondjingonekero ndjo nu kamaatu vanga okutjita otjiṋa tji matji mu hihamisa.

6. Matu rihongo tjike komuano omupristeri otjiuru maa twimisa ovyomoro omuwa ngunda e hiya tjita ozombunguhiro?

6 Zemburuka kutja omupristeri otjiuru aa sokutwimisa ovyomoro omuwa ngunda e hiya tjita ozombunguhiro. Indu tja tjiti nao, eye aa tjiwa kutja ozombunguhiro ze maze yakurwa i Mukuru. Matu rihongo tjike ku imbyo? Indu Jesus tja ri kombanda yehi, eye aa sokutjita otjiṋa otjinanḓengu tjinene ngunda e hiya yandja omuinyo we otjombunguhiro kovandu. Hapo tja ri otjikwaye? Eye aa sokukara nonḓuviro nouṱakame kutja Jehova ma yakure ombunguhiro ye. Momuano mbo, Jesus wa raisa kutja okutjita ombango ya Jehova oomuano omusemba wokuhupa. Nokutja omananeno wa Ihe oomasembasemba.

7. Ongwaye omuano Jesus maa hupu tja ri kombanda yehi tjaa u yorokisa Ihe?

7 Mehupo re kombanda yehi, Jesus wa ri nonḓuviro ku Jehova. Nandarire kutja Jesus aa munu omarorero nomauzeu nu aa tjiwa kutja ma ṱu onḓiro ombi nohihamise, eye we rimanenene okuraisa kutja omananeno wa Ihe omasemba. (Fil. 2:8) Indu tja munine omarorero, Jesus wa kumba “nondjuriro  onene nomahoze.” (Hebr. 5:7) Ozongumbiro ze okuza komutima za raisa kutja wa ri omuṱakame ku Jehova nu ze mupa omasa okukayenda komurungu okukara nonḓuviro. Ozongumbiro za Jesus ku Jehova za ri tjimuna omuṋuko womoro omuwa. Jesus aruhe aa yorokisa Ihe nu wa raisa kutja omananeno wa Jehova omasemba.

8. Matu horere vi komuano Jesus maa hupu?

8 Eṱe matu yenene okuhorera ku Jesus indu tji matu kara nonḓuviro nouṱakame komirari vya Jehova. Mena rokutja tu vanga okuyorokisa Jehova, tu kumba ku ye kutja me tu vatere tji matu munu omarorero. Tji matu tjiti oviṋa mbyo, tu yandja oruvara komananeno wa Jehova. Tu tjiwa kutja Jehova kamaa yakura ozongumbiro zetu indu tji matu tjiti imbi eye mbya tonda. Nungwari tji matu tjiti imbi eye mbya suvera, ozongumbiro zetu ku Jehova ma ze sana tjimuna omuṋuko womoro omuwa. Nu matu kara nongamburiro kutja okukara nonḓuviro nouṱakame ku yorokisa Tate wetu womeyuru.—Omiano 27:11.

ONDANGI NORUSUVERO VI TU HINGA OKUKARERA JEHOVA

(Lesa oparagrafa 9) *

9. Ongwaye ombunguhiro yohange tjaai tjitwa?

9 Epu oritjavari: Eṱe tu karera Jehova mena rokutja tu nondangi ku ye. Matu ke rihonga epu ndo tji matu konḓonona omuano otjiwaṋa tjOvaisrael maatji tjiti ombunguhiro yohange. * Membo ra Levitikus, Omuisrael aa yenene okutjita ombunguhiro yohange ‘yokutja okuhepa.’ (Lev. 7:11-13, 16-18) Eye kaa tjiti ombunguhiro ndjo mena rokutja aa sokuitjita, nungwari ya ri mena rokuvanga  okuitjita. Kunao indjo ya ri ombunguhiro omundu auhe ndjaa tjiti mena rorusuvero rwe ku Jehova Mukuru. Onyama ndja punguhwa aai riwa i omundu ngwe i yeta, eṱunḓu re novapristeri. Posi yokutja otupa tjiva aatu yandjwa ku Jehova. Otupa tuṋe?

(Lesa oparagrafa 10) *

10. Ombunguhiro yohange ndja tamunwa mu Levitikus 3:6, 12, 14-16 mai tu hongo tjike ohunga nomuano Jesus maa tjiti ombango ya Ihe?

10 Epu oritjatatu: Tu karera Jehova mena rokutja twe mu suvera. Jehova aa vara ozonḓura otja onyama ombwa kotjinamuinyo. Eye wina aa vara ozosyoti notupa twarwe otjonyama ombwa. (Lesa Levitikus 3:6, 12, 14-16.) Jehova wa ri nondjoroka tjinene indu Omuisrael tje mu punguhire otupa two. Omuisrael tja punguhire Jehova oviṋa mbyo eye aa raisa kutja ma vanga okuyandja imbi oviwaviwa ku ye. Momuano otjingewo, Jesus ee rikotamene ku Jehova nomutima we auhe mena rokutja we mu suverere. (Joh. 14:31) Nu okutjita ombango ya Mukuru aa ku mupe ondjoroka nu wa suverere omatwako we. (Eps. 40:8) Tjiri Jehova wa ri nondjoroka okumuna Jesus ame mu karere nonḓero ye omuini.

Orusuvero rwetu ku Jehova ru tu hinga kutja tu mu ungurire otja pu matu yenene (Lesa oparagrafa 11-12) *

11. Omomuano uṋe omerikotameneno wetu mu ye ri tjimuna ombunguhiro yohange, nu ongwaye iho tji tjiri otjihuhumiṋe?

11 Omeriyandjerero wetu ku Jehova ye ri tjimuna ozombunguhiro zohange. Eṱe tu yandja ku Jehova imbi oviwaviwa, mena rokutja twe mu suvera nomutima wetu auhe. Jehova tjiri u nonyuṋe okumuna ovandu ovengi mbe rikotamena ku ye mena rokutja ve mu suvera. Otjiṋa otjihuhumiṋe okutjiwa kutja Jehova u muna nu u vara oviungura vyetu, nu tjinenenene kutja matu vi tjitire tjike. Otjotjihorera, tji u ri omukurundu nu ko yenene okuungurira Jehova tjimuna tjoo ungura rukuru, kara nongamburiro kutja eye ma tjiwa ouzeu woye. Ove mape ya omunu kutja ko ungurire Jehova pu pa yenene, posi yokutja eye u muna orusuvero ndu ku hinga kutja u mu ungurire otja pu mo yenene. Nu eye u kara nondjoroka mu imbi mbi mo yenene okumuungurira.

12. Jehova wa ri noumune uṋe ohunga nozombunguhiro zohange, nu iho matji tu yanḓiparisa vi?

12 Hapo matu rihongo tjike kozombunguhiro zohange? Jehova wa ri nohange okumuna omuise tji mau rondo kombanda okuza kotjinamuinyo tji matji punguhwa. Kara nongamburiro kutja, Jehova wina u nohange momeriyandjerero woye okumukarera nomutima auhe. (Kol. 3:23) Ripura nomuano eye me nonyuṋe move. Eye u vara ozongondjero azehe nḓu u tjita motjiungura tje, otjovihuze mbye hina maa zembi.—Mat. 6:20; Hebr. 6:10.

JEHOVA U SERA OTJIRA TJE ONDAYA

13. Otja ku Levitikus 9:23, 24, Jehova wa raisa vi kutja u nohange novapristeri mba zikwa?

13 Epu oritjaine: Jehova u sera otjira tje tjokombanda yehi ondaya. Tara ku imbi mbya tjitwa mombura ndji 1512 K.O.Z. indu ondanda yomaturiro tji ya zikwa kehi yOndundu Sinai. (Eks. 40:17) Moses wa zikamisa otjitjitwa okuzika Aron novazandu ve okurira ovapristeri. Otjiwaṋa tjOvaisrael tja worongana pamwe okutarera ovapristeri tji mave tjiti ombunguhiro yawo ondenga. (Lev. 9:1-5) Omomuano uṋe Jehova ma raisa kutja u nohange novapristeri mba zikwa? Aron na Moses tjaave sere ovandu ondaya, Jehova wa hinda omuriro nowo wa seseta ombunguhiro oningiririsiwa.—Lesa Levitikus 9:23, 24.

14. Ongwaye omayakuriro wa Aron novazandona ve, tji ye ri omananḓengu kweṱe ndino?

 14 Hapo omuriro okuza keyuru aau raisa tjike? Jehova wa raisa kutja u nohange na Aron novazandona ve mba zikwa okurira ovapristeri. Indu Ovaisrael tji va muna kutja Jehova aa yandja oruvara kovapristeri, owo wina va muna kutja mave hepa okuvepa oruvara. Ongwaye omayakuriro wovapristeri moIsrael tji ye ri omananḓengu kweṱe ndino? Mena rokutja ovapristeri mbo aave kuramene po Kristus Omupristeri Otjiuru novapristeri varwe 144 000, mbu mave kanana puna ye meyuru.—Hebr. 4:14; 8:3-5; 10:1.

Jehova u sera ondaya nokuhongorera po otjira tje. Eṱe tu yandja oruvara okuura kotjira ho (Lesa oparagrafa 15-17) *

15-16. Jehova u raisa vi kutja u yandja oruvara ‘komukarere omuṱakame nomunazondunge’?

15 Mombura ndji 1919, Jesus wa zika okambumba okaṱiṱi kovatwirisiwa ku ke tjiukwa otja “omukarere omuṱakame nomunazondunge.” Okambumba ngo ke hongorera po otjiungura tjokuzuvarisa nokuyandja “ovikurya moruveze ndwa tuwa po.” (Mat. 24:45) Hapo oukahu kutja Mukuru u yandja oruvara komukarere omuṱakame nomunazondunge?

16 Satan na imba mbe mu pa oruvara ve kondja okutjaera otjiungura tjomukarere omuṱakame. Nokuhinombatero ya Jehova ma ri re ouzeu komukarere ngo okuyenenisa otjiungura ho. Nandarire kutja pa kara ovita ovitenga novitjavari mouye nomauzeu wotjimariva, nu ovakarere va Mukuru ve tatumisiwa nokutjindwa momuano omuhasemba. Omukarere omuṱakame ngunda u kayenda komurungu okuyandja oviṋa mbi kurisa oupanga wovakongorere va Kristus kuna Mukuru kombanda yehi. Ripura ohunga nomambo nge yandjwa otjari ndino momaraka wokombanda 900. Iho tji raisa oukahu kutja  Mukuru u yandja oruvara komukarere ngo. Otjiungura tjokuzuvarisa wina otjiraisiro tjokutja Jehova u sera ondaya komukarere ngo. Ombuze ombwa i zuvarisiwa “mouye auhe.” (Mat. 24:14) Nokuhina omakeyakeyero Jehova u hongorera po nokusera ondaya kotjira tje ndino.

17. Hapo matu yandja vi oruvara kotjira tja Jehova?

17 Ripura omuini epuriro ndi, ‘hapo mbi nondangi okurira orupa rotjira tja Jehova tjokombanda yehi?’ Moruveze rwa Moses, Jehova wa hinda omuriro okuza keyuru okuraisa kutja u nohange novandu mba toorora. Momuano otjingewo eye wina u tupa oviraisiro ovikahu kutja u ungurisa otjira tje ndino. Tjiri Jehova we tupa oviṋa ovingi mbi matu sokuraisa ko ondangi. (1 Tes. 5:18, 19) Hapo matu yandja vi oruvara kotjira tja Jehova? Eendu tji matu ṱakamisa oviṋa mbi tu rihonga momambo nga zikamena kOmbeibela, pozombongarero zombongo, na pomaworonganeno worukondwa nowotukondwa. Nu wina matu yenene okukara norupa motjiungura tjokuzuvarisa otja pu matu yenene.—1 Kor. 15:58.

18. Hapo ove we rimanene okutjita tjike?

18 Ngatu kayende komurungu okuṱakamisa omapu ngu twe rihongo okuza membo ra Levitikus. Eṱe tu vanga kutja Jehova ma yakure omerikotameneno wetu. Nu tu mu karera mena rokutja tu nondangi ku ye. Ngatu kayende komurungu okuungurira Jehova mena rokutja twe mu suvera nomutima wetu auhe. Nu ngatu yandje oruvara okuura kotjira tje ndino. Indu tji twa tjiti oviṋa mbyo, matu raisire Jehova kutja tu nondangi kondjingonekero yokurira Ovahongonone ve.

EIMBURIRO 96 Embo raMukuru otjihuze

^ par. 5 Embo ra Levitikus ri nomatwako Jehova nga yandja kotjiwaṋa tjOvaisrael otjikuru. Eṱe otjOvakriste katu ri kehi yomatwako ngo, posi yokutja owo ye yenena okutuvatera ndino. Morupa ndwi matu ke rihonga omapu omananḓengu okuza kembo ra Levitikus.

^ par. 4 Ovyomoro omuwa mbyaavi kangerwa pondanda yomaturiro aavi varwa otjoviṋa oviyapuke, nu moIsrael otjikuru aavi ungurisiwa komerikotameneno ku Jehova. (Eks. 30:34-38) Kape nomatjangwa nge raisa kutja Ovakriste veserewondo etenga aave ungurisa ovyomoro omuwa momerikotameneno wawo.

^ par. 9 Tji mo vanga ondjiviro yokomurungu ohunga nombunguhiro yohange, lesa embo ndi Insight on the Scriptures, Volume 2, omuk. 526.

^ par. 54 OMAKAHURURIRO WOVIPERENDERO: MEyuva enene rOhanganisiro, omupristeri otjiuru wOvaisrael aa hiti mOtjouyapukeyapuke a tjindi otjitjuma tjomoro omuwa notjikangero tji tjeura omakara womuriro nu iho aa tji tjiti kutja etuwo ri ṋuke nawa. Nu okuzambo a hiti rukwao mOtjouyapukeyapuke okukapunguha ombinḓu komakohororero wouvi.

^ par. 56 OMAKAHURURIRO WOVIPERENDERO: Omuisrael ma yandja onḓu otjombunguhiro yohange komupristeri okuraisa ondangi yeṱunḓu re ku Jehova.

^ par. 58 OMAKAHURURIRO WOVIPERENDERO: Motjiungura tje tjokuzuvarisa kombanda yehi, Jesus wa raisa orusuvero ku Jehova mokuṱakamisa omatwako we nokuvatera ovemukongorere okuyeṱakamisa wina.

^ par. 60 OMAKAHURURIRO WOVIPERENDERO: Omukazendu omukurundu ma zuvarisa okupitira mokutjanga orutuu nandarire kutja wa ngundipara morutu.

^ par. 62 OMAKAHURURIRO WOVIPERENDERO: Mu Februari 2019, Mbuti Gerrit Lösch wOrutu Orunane ma tjiukisa Ombeibela ndji New World Translation ndja ṱunwa meraka rOtjindoitji nu ovapuratene ve nondjoroka tjinene. Ndino, ovazuvarise moGermany ve nondjoroka okuungurisa Ombeibela ndjo motjiungura tjokuzuvarisa.